ស្ទឹងត្រែង៖ថៅកែក្លិបអាម៉ាហ្សូននិងសន្តិសុខម្នាក់ ត្រូវបានឃាត់ខ្លួនដោយកងរាជអាវុធហត្ថខេត្តស្ទឹងត្រែងកាលពីវេលាម៉ោង៨យប់ ថ្ងៃទី២៥ខែវិច្ឆិកាឆ្នាំ២០១៤ពីបទ បង្ករបួសស្នាមដោយចេនា បញ្ជូន ទៅកាន់ទីបញ្ជាការដ្ឋានកងរាជអាវុធហត្ថ ដើម្បីធ្វើការសួរនាំ ។
គួរំលឹកផងដែរថាកាលពីយប់ថ្ងៃទី២២ខែវិច្ឆិកាឆ្នាំ២០១៤នៅវេលាម៉ោង២រំលងអធ្រាត្រឈានចូលថ្ងៃទី២៣ខែវិច្ឆិកាឆ្នាំ២០១៤ នៅក្នុងក្លឹបអាម៉ាហ្សូន មានការទាស់ពាក្យសំដីគ្នា រវាងសន្តិសុខក្លឹបនិង ភ្ញៀវ ដែលចូលទៅរាំលេងកម្សាន្តនៅទីនោះ សន្តិសុខបានប្រើដំបងឆក់ និងវាយទៅលើបុរសម្នាក់ឲ្យរងរបួសយ៉ាងធ្ងន់ធ្ងរ។
មន្ត្រីអាវុធហត្ថបានអោយដឹងថាជនរងគ្រោះក្នុងហេតុការណ៍នោះឈ្មោះទីន ជួប ភេទប្រុស អាយុ៣០ឆ្នាំរស់នៅភូមិ ព្រែក សង្កាត់/ក្រុង/ស្ទឹងត្រែង ។ចំណែកជនបង្កដែលសមត្ថកិច្ចឃាត់ខ្លួនមាន១ឈ្មោះឌុច សម្ភស្ស ភេទប្រុសអាយុ៣៤ឆ្នាំជាថៅកែក្លិបអាម៉ាហ្សូន និងហាងខារ៉ាអូខេសួនរីករាយ ២ ឈ្មោះឡុងទូច ហៅម៉ាប់ភេទប្រុសអាយុ២៧(ជនបង្ក) ជាសន្តិសុខក្លិបអាម៉ាហ្សូន និងមានទីលំនៅក្នុងភូមិរាជានុកូលសង្កាត់ ក្រុងស្ទឹងត្រែង ។
មន្ត្រីអាវុធហត្ថបានបន្តឱ្យដឹងទៀតថា យោងតាមពាក្យបណ្តឹងនៅយប់ថ្ងៃកើតហេតុជនរងគ្រោះរួមនិងមិត្តភក្តិជាច្រើននាក់ទៀតបាននាំគ្នាចូលទៅរាំកម្សាន្តក្នុងក្លឹបអាម៉ាហ្សូន។ក្រោយពីផឹកស៊ីអស់ជាច្រើនម៉ោង ជនរងគ្រោះក៏បានដើរចូលក្នុងបន្ទប់ទឹកតែម្នាក់ឯង។ពេលនោះដើរប៉ះទង្គិចគ្នាបានទាស់ពាក្សសម្តីជាមួយសន្តិសុខម្នាក់ តែរឿងនេះត្រូវបានបញ្ចាប់ហើយ។ប៉ុន្តែពេលដែលជនរងគ្រោះ និងមិត្តភក្តិចេញពីក្លឹបគោលបំណងមកផ្ទះ ក៏ត្រូវសន្តិសុខតាមដល់មាត់ច្រកចេញ វាយនឹងដំបងឆក់ បណ្តាលឲ្យរងរបួសបែកលើចិញ្ចើម ប៉ោងភ្នែក ហូរឈាមកក្លាក់ ភ្លាមនោះមិត្តភក្តិរួមដំណើរជាមួយបានដឹកយកទៅព្យាបាលនៅមន្ទីរពេទ្យបង្អែកខេត្តស្ទឹងត្រែង។
ក្រោយកើតហេតុនៅព្រឹកថ្ងៃទី២៣វិច្ឆកាជនរងគ្រោះ បានទៅដាក់ពាក្យបណ្តឹងនៅស្នងការនគរបាលខេត្តដើម្បីរកយុត្តិធមិ៍ តែមិនទាន់ឃើញមានចំណាត់ការ នៅព្រឹកថ្ងៃទី២៥ ជនរងគ្រោះបានដាក់ពាក្យបណ្តឹងទៅអាវុធហត្ថខេត្តបន្តទៀត។ក្រោយពីទទួលបានពាក្យបណ្តឹង ពីជនរងគ្រោះកម្លាំងកងរាជអាវុធហត្ថក៏បានចុះទៅ ធ្វើការឃាត់ខ្លួនជនបង្កជាសន្តិសុខម្នាក់ និងថៅកែយកមកធ្វើការសាសួរ ក្រោមចម្លើយសារភាពរបស់ឈ្មោះឡុង ទូច បានឆ្លើយចំពោះមុខសមត្ថកិច្ចថា ខ្លួនពិតជាបានឆក់និងវាយទៅលើជនរងគ្រោះពិតប្រាកដមែន ក្រោមការបញ្ជារបស់លោកឌុច សម្ភស្សថៅកែក្លឹបដោយសានៅថ្ងៃ២៥ខែតុលាមានការប្រជុំសន្តិសុខក្នុងក្លិប ប្រគល់ដំបងឆក់ទៅអោយសន្តិសុខថា បើមានរឿងត្រូវធ្វើការអប់រំ តែបើមិនស្តាប់ ឆក់ទៅថៅកែជាអ្នកទទួលខុសត្រូវ។
ប្រភពពីក្នុងក្លិបអាម៉ាហ្សូនបានទំលាយអោយដឹងថានៅព្រឹកថ្ងៃ២៦វិច្ឆកានេះ សន្តិសុខក្នុងក្លិបអាម៉ាហ្សូន មានការប្រជុំមួយក្រោមការរៀបចំរបស់ម្ចាស់ក្លិច ក្នុងការឆ្លើយបំភ្លឺនៅតុលាការ គេអោយឆ្លើយទម្លាក់កំហុសទាំងស្រុងទៅលើសន្តិសុខឈ្មោះឡុងទូចដើម្បីអោយថៅកែរូបនោះរួចផុតពីការចោទប្រកាន់ក្នុងករណីខាងលើនេះ និងធ្វើការរត់ការដោះជាក្រោយ។ ហើយករណីនេះក៏មានការអន្តរាគមន៍ ពីអ្នកមានណាចនៅពីក្រោយខ្នងផងដែរ។ប្រជាពលរដ្ឋកំពុងរងចាំមើលថាតើអ្នកមានលុយនិងអ្នកមានអំណាចអាចគេចរួចពីសំណាញ់ច្បាប់បានដែរឬអត់?។
បច្ចុប្បន្នឈ្មោះឌុច សម្ភស្សថៅកែក្លិបអាម៉ាហ្សូនរួមជាមួយសន្តិសុខម្នាក់ឈ្មោះឡុងទូចកំពុង ឃុំខ្លួន នៅទីបញ្ជាការកងរាជអាវុធហត្ថខេត្ត ស្ថិតក្រោមការសាកសួរពីជំនាញ ដើម្បីក៏សាងសំណុំរឿង នាំខ្លួនទៅកាន់តុលាការស៊ើបអង្កេតបន្ត ដើម្បីចាត់ការទៅតាមនីតិវិធី៕
មតិយោបល់