ខេត្តសៀមរាប៖នាព្រឹកថ្ងៃទី១១ ខែធ្នូ ឆ្នាំ២០១៤នេះ នៅសាលាស្រុកសូទ្រនិគម មានធ្វើពិធីប្រកាសចូលកាន់មុខតំណែង ជា អភិបាល អភិបាលរងស្រុក និង នាយករដ្ឋបាលសាលាស្រុក ក្រោមអធិបតីភាពលោក ប៊ុន ថាឬទ្ធិ អភិបាលរងខេត្ត សៀមរាប ដោយមានការចូលរួមពីសំណាក់អស់លោក លោកស្រី ជាថ្នាក់ដឹកនាំមន្ទីរ អង្គភាព ប្រធានក្រុមប្រឹក្សាស្រុក មន្ត្រីរាជការ កងកម្លាំងប្រដាប់អាវុធ មេឃុំ ផងដែរ ។
ក្នុងកិច្ចស្វាគមន៍របស់លោកអភិបាលស្រុកសូទ្រនិគមស្តីទី ក៏បានធ្វើសេចក្តីរាយការណ៍ពីសកម្មភាព លទ្ធផល ដែលបាន អនុវត្តបានកន្លងមក ព្រមទាំងសមទ្ធិផលដែលបានធ្វើ ការអភិវឌ្ឍន៍បាន សម្រាប់បម្រើជូនសាធារណៈជនជាតិ និង អន្តរជាតិ ។
បន្តមកលោក សយ សូផុន នាយកទីចាត់ការធនធានមនុស្សនៃរដ្ឋបាលសាលាខេត្តសៀមរាប បានអាននូវ អនុក្រឹត្យ ស្តីពីការតែងតាំងលោក ម៉ក់ ប្រុស ឋានន្តរស័ក្តិអនុមន្ត្រីថ្នាក់លេខ១២ ជាអភិបាលស្រុកសូនិគម និងសេចក្តីប្រកាសរបស់ក្រសួងមហាផ្ទៃ ស្តីពីការតំឡើងឋានន្តរស័ក្កិនិងតែងតាំងលោក ពិន សារិន ឋានន្តរស័ក្តិក្រមការដើមខ្សែថ្នាក់លេខ៧ឲ្យទៅជាឋានន្តរស័ក្កិនាយក្រមការថ្នាក់លេខ៦ទៅជាអភិបាលរងស្រុកសូទ្រនិគមនិង លោក ស្រី សូវ សុធារ៉ា ឋានន្តរស័ក្តិនាយលេខាធិការរដ្ឋបាល ថ្នាក់លេខ២ ទៅ ជានាយករដ្ឋបាល សាលាស្រុកសូទ្រនិគម ។
បន្ទាប់ពីការប្រគល់នូវអនុក្រឹត្យ សេចក្តីប្រកាស និង ត្រា ព្រមទាំងធ្វើការប្តេជ្ញាចិត្តរបស់លោកអភិបាលស្រុកថ្មីដែលទើបបានចូលកាន់តំណែងរួចមក មានប្រសាសន៍សំណេះសំណាលនោះដែរ លោកប៊ុន ថាឬទ្ធិអភិបាលរងខេត្តក៏បានលើកឡើងថា ការតែងតាំងនេះគឺក្រសួង ក៏ដូចជាអាជ្ញាធរខេត្ត បានពិនិត្យលើគុណសម្បត្តិយ៉ាងត្រឹមត្រូវរបស់មន្ត្រីរាជការដែលបានបម្រើការងារ ជូនប្រជាពលរដ្ឋ និង រាជរដ្ឋាភិបាល ដូច្នេះមន្ត្រីដែលបានទទួលការទុកចិត្ត ត្រូវខិតខំមប្រើការងារឲ្យបានល្អថែមទៀត ពិសេសត្រូវពង្រឹង លើកិច្ចសហប្រតិបត្តិការ សាមគ្គីភាពផ្ទៃក្នុងដើម្បីបម្រើប្រជាពលរដ្ឋស្របតាមគោលនយោបាយរបស់ រាជរដ្ឋាភិបាល នឹងក្រសួងមហាផ្ទៃបានដាក់ចេញ។ លោកក៏បានបន្តទៀតថា ស្រុកសូទ្រនិគម គឺជាបេះដូងរបស់ខេត្ត ដែលជារាធានីក្រុង ប្រវត្តិសាស្ត្រនៃព្រះរាជាណាចក្រកម្ពុជា ក្នុងការបម្រើដល់វិស័យទេសចរណ៍ ទាំងការសន្តិសុខសណ្តាប់ធ្នាប់ អនាម័យ បរិស្ថាន ក្នុងការទទួលស្វាគមន៍ភ្ញៀវជាតិ អន្តរជាតិ ចូលមកស្នាក់នៅ ទស្សនាកម្សាន្ត ។លោក ក៏ បាន បន្តទៀតថា ដើម្បីបន្តនិរន្តរភាព រដ្ឋបាល និង បន្តអនុវត្តស្នាដៃការងារឲ្យកាន់តែល្អថែមទៀតនោះលោកអភិបាលស្រុកដែលទើបចូលកាន់ដំណែងថ្មី ក៏ដូចមន្ត្រីដែលទើបបានតែង តាំង ត្រូវបង្កើនស្មារតីយកចិត្តទុកដាក់ និង ការទទួលខុសត្រូវខ្ពស់ក្នុងការបំពេញភារកិច្ច នឹង ត្រូវពង្រឹងកិច្ចសហ-ប្រតិបត្តិការល្អជាមួយ មន្ទីរ អង្គភាព ភូមិ ឃុំនិង វិស័យពាក់ព័ន្ធនានា សំខាន់ការសាមគ្គីភាពផ្ទៃក្នុង ។ ដើម្បីបញ្ជាក់ជាសក្ខីភាពឆ្លើយតបទៅនឹងទំនុកចិត្តរបស់ថ្នាក់ដឹកនាំក្រសួង គណៈអភិបាលខេត្ត ដែលបានផ្តល់នូវជំនឿទុកចិត្ត ចំពោះលោកអភិបាលស្រុកតែងតាំងថ្មី ។ លោក ក៏បានគូសបញ្ជាក់ថា ខេត្តសៀមរាបជាតំបន់ទេសចរណ៍ បាន ជាប់លំដាប់ថ្នាក់លេខ២ ក្នុងទីកន្លែងដែលល្អស្រស់ចាប់ចិត្តចូលមកទស្សនា ក្នុងតំបន់អាស៊ី ហើយជាប់លំដាប់ថ្នាក់លេខ១ ជាតំបន់បេតិកភណ្ឌដ៏ធំនៅលើពិភពលោក ដែលបច្ចុប្បន្នបានកំពុងទាក់ទាញភ្ញៀវទេសចរ ចូលមកទស្សនាយ៉ាងច្រើន ដោយបានអន្តរជាតិផ្តល់នូវតម្លៃ និង ទទួលស្គាល់ពី សន្តិសុខ សុវត្ថិភាព នៃគោលនយោបាយភូមិឃុំ មានសុវត្ថិភាព ។ កត្តានេះហើយអាជ្ញាធរ កម្លាំងសមត្ថកិច្ចគ្រប់ថ្នាក់នៃស្រុកសូទ្រនិគម ត្រូវចូលរួមថែរក្សា នូវសណ្តាប់ធ្នាប់សាធារណៈ ត្រូវបង្កើតឲ្យមាន ក្នុង គោលដៅបម្រើដល់វិស័យទេសចរណ៍ និង ដើម្បីផលប្រយោជន៍ជីវភាពរបស់ប្រជាពលរដ្ឋផងដែរ ។ លោកក៏បាន ធ្វើការផ្តាំផ្ញើ ត្រូវខិតខំបំពេញការងារទ្វេដង ដោយស្មារតីយកចិត្តទុកដាក់ នឹងមានការទទួលខុសត្រូវខ្ពស់ ព្រមទាំងប្រឹងប្រែងឲ្យអស់ពីកម្លាំងកាយចិត្ត បញ្ញាញាណ និងប្រាជ្ញាស្មារតី ដើម្បីបំពេញការងារជូនតម្រូវការរបស់ប្រជាជនឲ្យកាន់ តែសកម្មខ្លាំងក្លា និង ត្រូវគោរពរដ្ឋធម្មនុញ្ញ ច្បាប់ និងលិខិតបទដ្ឋានគតិយុត្តជាធរមាន របស់រាជរដ្ឋាភិបាល ក្រសួងមហាផ្ទៃ និង សេចក្តីណែនាំ រដ្ឋបាលខេត្ត ព្រមទាំងក្រសួងស្ថាប័នពាក់ព័ន្ធទាំងអស់ ពិសេសចូលរួម អនុវត្តកម្មវិធីនយោបាយ និងយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល និង គោលនយោបាយចាត់តាំង នឹងដឹកនាំរបស់គណៈបញ្ជាការឯកភាពរដ្ឋបាលខេត្ត និង រក្សាសាមគ្គីភាព ឯកភាពផ្ទៃក្នុងនៃជួរគណៈអភិបាល ក្រុមប្រឹក្សា និងមន្ត្រីក្រោមឱវាទ រដ្ឋបាល សាលាស្រុក ដោយប្រកាន់ខ្ជាប់ នូវគោលការណ៍គ្រឹះទាំង៤សម្រាប់មន្ត្រីមុខងារសាធារណៈ គឺ ឆន្ទៈ ម្ចាស់ការ មាន ភក្ដីភាព មនសិការវិជ្ជាជីវៈ និងវប្បធម៌សេវាសាធារណៈ ក្នុងការចូលរួមកិច្ចសហប្រតិបត្តិការល្អ ជាមួយបណ្តាមន្ទីរ អង្គភាពរដ្ឋ ខេត្ត ក្រុង ស្រុក សម្ព័ន្ធមេត្រីភាព អង្គការសង្គមស៊ីវិល ក៏ដូចជាវិស័យឯកជន ដើម្បីវឌ្ឍនៈភាព និងការអភិវឌ្ឍន៍នៃទីក្រុងបុរាណប្រវត្តិសាស្ត្រ ឲ្យកាន់តែមានសោភណ្ឌស្រស់បំព្រង និងរីកចម្រើន ថែមទៀត ៕
មតិយោបល់