កោះកុង ៖ សម្រាប់ពីធីបុណ្យសមុទ្រឆ្នាំនេះ ដែលត្រូវរៀបចំធ្វើឡើងនៅខេត្តកោះកុងនោះ គេរំពឹងថា អាចនឹងមានភ្ញៀវទាំងជាតិ និងអន្តរជាតិចូលរួមប្រមាណជាជាង៥ម៉ឺននាក់។
ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានមានប្រសាសន៍ថា លោកមានសុទិដ្ឋិនិយមថា ភ្ញៀវចំនួន៥ម៉ឺននាក់ នឹងទៅចូលរួមក្នុងពិធីបុណ្យសមុទ្រប្រចាំឆ្នាំលើកទី៣ ដែលធ្វើឡើងនៅខេត្តកោះកុង ចាប់ពីថ្ងៃទី១២ ខែធ្នូ រហូតដល់ថ្ងៃទី១៤ ខែធ្នូ ឆ្នាំ២០១៤។
ជាមួយនឹងការរំពឹងទុកថា លោក ប៊ុន បៀវ ប្រធានមន្ទីរទេសចរណ៍ខេត្តកោះកុង ក៏បានអះអាងដែរថា ខេត្តកោះកុង ក៏បានត្រៀមខ្លួនរួចជាស្រេចហើយដែរ សម្រាប់ទទួលភ្ញៀវទេសចរណ៍។ លោកថា ពេលនេះ នៅក្នុងខេត្តកោះកុងទាំងមូលរាប់ទាំងសណ្ឋាគារ និងផ្ទះសំណាក់ មានបន្ទប់សរុបប្រហែល១៧០០ តែវាមិនទាន់គ្រប់គ្រាន់សម្រាប់ការស្នាក់នៅរបស់ភ្ញៀវនោះទេ ដូច្នេះទើបខេត្តបានជំរុញឲ្យប្រជាជននៅក្នុងស្រុកសម្រាប់ជួល ប្រសិនបើអាច។
បើតាមលោក ប៊ុន បៀវ ខេត្តក៏បានត្រៀមរៀបចំផងដែរនូវសំពត់តង់សម្រាប់ជួល និងមានទីវាលទំនេ ដែលអាចជួយដល់ការស្នាក់នៅរបស់ភ្ញៀវផងដែរ។
យោងតាមសេចក្តីប្រកាសព័ត៌មានរបស់ក្រសួងទេសចរណ៍ នៅក្នុងពិធីបុណ្យសមុទ្រឆ្នាំ២០១៤នេះ គេនឹងគ្រោងរៀបចំធ្វើពិធីបើកជាផ្លូវការនៅរាត្រីថ្ងៃទី១៣ ខែធ្នូ ឆ្នាំ២០១៤ ក្រោមអធិបតីភាពរបស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវ។
ក្នុងពិធីបើកនោះ គេនឹងមានរៀបចំនូវការបាញ់កាំជ្រួចដើម្បីអបអរ ព្រមទាំងការសម្តែងរបាំង របស់ប្រទេសកម្ពុជា ប្រទេសថៃ និងប្រទេសវៀតណាម ។ ក្នុងនោះ ក៏មានការបង្ហាញនូវក្បាច់គុនល្បុក្កតោដោយសហព័ន្ធល្បុក្កតោកម្ពុជា, ក្បាច់គុណតៃក្វាន់ដូ ដោយវីរៈកីឡាការិនី ស៊ន សៀវម៉ី និងការបង្ហាញក្បាច់គុណចំបាប់ ដោយកញ្ញា និ សំណាង ម្ចាស់មេដាយសំរិទ្ធ Asean Beach Game របស់សហព័ន្ធកីឡាចំបាប់កម្ពុជា។
ក្រៅពីនោះ ក៏មានការរៀបចំនូវមហោស្រពម្ហូបអាហារ និងការលេងកីឡាលើទឹក លើឆ្នេរ ដើម្បីជាការអបអរដល់ពិធីបុណ្យសមុទ្រឆ្នាំនេះផងដែរ៕
មតិយោបល់