អង្គការកិច្ចសហប្រតិបត្តិការម៉ូស្លីម (OIC) មានស្នាក់ការនៅប្រទេស អារ៉ាប៊ីសាអូឌីត គ្រោងនឹងដាក់ពាក្យប្តឹង ទស្សនាវដ្ដីបារាំង Charlie Hebdo បន្ទាប់ពីទស្សនាវដ្ដីបារាំងមួយនេះ បានបោះពុម្ពផ្សាយលេខចុងក្រោយ ដោយនៅលើក្របខាងមុខមានរូប Mohammed ដែលមានលក្ខណមើលងាយដល់សាសនាម៉ូស្លីម។
សារព័ត៌មាន Independent អង់គ្លេស បានចេញផ្សាយនៅថ្ងៃទី១៩ ខែមករា ឆ្នាំ២០១៥ ម្សិលមិញនេះថា អតីតរដ្ឋមន្ត្រីក្រសួងវប្បធម៌ និងបច្ចុប្បន្នជាប្រធានរបស់អង្គការ OIC លោក Iyad Madani បានរិះគន់ថា ការបោះពុម្ពច្បាប់ថ្មីរបស់ Charlie Hebdo ជាការធ្វើរឿងល្ងីល្ងើ ដែលទាមទារឲ្យមានការចាត់វិធានការណ៍ស្របច្បាប់។
លោក Iyad Madani បន្តទៀតថា បច្ចុប្បន្នកំពុងសិក្សាច្បាប់នៅអឺរ៉ុប និងបារាំង ដើម្បីប្តឹងប្រឆាំងទស្សនាវដ្ដី Charlie Hebdo ព្រោះបានមើលងាយដល់សាសនារបស់ពួកគេ។
គួរបញ្ជាក់ផងដែរថា កាលពីថ្ងៃទី០៧ ខែមករា ឆ្នាំ ២០១៥ កន្លងទៅនេះ មានខ្មាន់កាំភ្លើង ៣នាក់បានបើកការបាញ់ប្រហារទៅលើទីស្នាក់ការទស្សនាវដ្ដី Charlie Hebdo នៅក្នុងទីក្រុងប៉ារីស ប្រទេសបារាំង ដែលបណ្ដាលឲ្យស្លាប់មនុស្ស ១២នាក់ ក្នុងនោះមានបុគ្គលរបស់ទស្សនាវដ្ដី Charlie Hebdo ជាច្រើនរូប ហើយខ្មាន់កាំភ្លើងត្រូវបានគេដឹងថា ជាក្រុមអាល់កៃដា កាន់សាសនាម៉ូស្លីម៕
មតិយោបល់