ភ្នំពេញ៖ ដូចអ្វីដែលយើងបានដឹងថា អ៊ុំ គន្ធា ក្រោយពីកើតជំងឺអេដស៍ បានចាកឆ្ងាយពីរង្វង់សិល្បៈ ព្រោះតែមានជំងឺឱកាសនិយម នៅក្នុងខ្លួន ស្របពេលដែល ឆាកតន្ត្រីមិនបានផ្តល់ឱកាសឲ្យនាង ។
ក្រោយពី បណ្តាញព័ត៌មានជាច្រើនបានចុះផ្សាយ ស្ថានីយ៍ទូរទស្សន៍ និងឆាកតន្ត្រី បានងាកមកផ្តោតផ្តល់ ឱកាសឲ្យនាងខ្លះ ដើម្បីបានថវិកាមួយចំនួន ជួយ បំនិតបំរុងគ្រួសារ និងកូនដែលផ្ទុកមេរោគអេដស៍ ដូចនាង ។
ទន្ទឹមជាមួយនឹងគ្នានេះដែរ លោក អ៊ឹម ជីវ៉ា ក៏បានផ្តោតអារម្មណ៍ និងចាប់ផ្តើមគំនិតឲ្យអ្នកក្នុងរង្វង់សិល្បៈ ដូចគ្នា កុំរើស អើង អ្នកនាង អ៊ុំ គន្ធា ការរើសអើងនេះ នឹងធ្វើឲ្យនាង កាន់តែចាកឆ្ងាយពីរង្វង់សិល្បៈ ។
ថ្មីៗនេះ លោក អ៊ឹម ជីវ៉ា បានប្រាប់ដល់សារព័ត៌មាន ដំណឹងថា “នៅថ្ងៃទី ១៣ កុម្ភៈ នេះ ខ្ញុំ និងអ្នកសិល្បៈប្រហែល ជា ៥០ នាក់បានផ្តួចផ្តើមគំនិត បង្កើតកម្មវិធីជប់លៀងមួយ ដោយញ៉ាំអាហាររួមគ្នា (ទីតាំង អ៊ឹម ជីវ៉ា មិនបញ្ចេញ) ជាមួយនឹង អ្នកនាង អ៊ុំ គន្ធា ។ ដោយកម្មវីធីនេះដែរ ក្រោមអធិបតីដ៏ខ្ពស់ខ្ពស់ចូលរួមរបស់ឯកឧត្តម ខៀវ កាញរិទ្ធ រដ្ឋមន្ត្រីក្រសួងព័ត៌មាន ” ។
លោក អ៊ឹម ជីវ៉ា បានបន្តថា ៖ គ្រាន់តែញ៉ាំអាហាររួមគ្នា ជាមួយនឹងអ្នកនាង អ៊ុំ គន្ធា វាមិនឆ្លងនោះទេ ដូច្នេះ អ្នកសិល្បៈកុំរើសអើង គាត់ធ្វើអ្វី នរណាទៅចង់កើតជំងឺ ឱកាសនិយម ដែលសង្គមខ្លាចរអាលនោះ ។
នៅថ្ងៃនេះដែរ អ៊ឹម ជីវ៉ា បានសរសេរបញ្ជាក់ជាថ្មីនៅលើហ្វេសប៊ុកថា “សិល្បករ សិល្បការនីល្បីៗចំនួន៥០នាក់ដូចជា: នាយកុយ នាយក្រឹម កញ្ញាប្រលិត នាយសានម៉ៅ កញ្ញាប្រិមប្រិយ នាយក្រិន អ្នកនាងកាតុ ,ណយ សំណាង ,ថន លក្ខិណា ,គង់ វង្សយ៉ាទី ,កុល ដាវី, លីចាន់សីហា, សូដានីតា , យូ ឌីស្កូ, ចាន់តារទី, ប៉ែនសុផានី,ម៉ារ៉ា បុណ្ណា, សុខរក្សារ, ពៅ លីដា,ស៊ុន ណារីម៉ូនីការ, ណូ ម័រ.លីហួរ , វីស្សារ .ប៊ុននាង.ល.និងតារាល្បីៗជាច្រើនរូបទៀតនិងចូលរួមកម្មវិធី ” ពិធីសំណេះសំណាល និងពិសារបាយសាមគ្គីជាមួយសិល្បករ” ក្រោមអធិបតិដ៏ខ្ពង់ខ្ពស់ ឯកឧត្តម ខៀវ កាញារីទ្ធ រដ្ឋមន្ត្រី ក្រសួងពត៌មាន កម្មវិធីនេះប្រារព្វធ្វើនៅថ្ងៃសុក្រ ទី១៣ ខែកុម្ភះ ឆ្នាំ២០១៥ វេលារម៉ោង ៩:00ព្រឹកតទៅ! កម្មវិធីនេះធ្វើឡើងក្នុងគោលបំណង :
១:ជួយលើកស្ទួយអភិរក្សវិស័យវប្បធម៌ខ្មែរ,
២:ផ្តល់កម្លាំងទឹកចិត្តចំពោះអ្នកសិល្បដែលកំពុងមានជំងឺនិងជួបការខ្វះខាត ,
៣:ធ្វើអោយសិល្បករចេះស្រលាញ់រួបរួមសាមគ្គីគ្នា,
៤: ធ្វើអោយសិល្បករត្រូវចេះជួយគ្នាក្នុងគ្រាមានអាសន្ន, .ល. ។
ចំពោះកម្មវិធីនេះក៏មានការផ្តល់នៅ អំណោយនិងថវិការមួយចំនួន ជូនដល់អ្នកនាង អ៊ុំ គន្ធារ តារាចំរៀង ដែលកំពុងកើតមេរោគអេដស៍ផងដែរ! ចំពោះសិល្បកដែលចូលរួម ចង់ផ្តល់អំណោយដល់អ្នកនាងអ៊ុំគន្ធារ សូមត្រៀមនៅអំណោយនិងថវិការជូនគាត់ដោយផ្ទាល់ដៃ។ សង្ឃឹមថាសិល្បករទាំងអស់និងផ្តល់ក្តីស្រលាញ់និងកាចេះចែកំលែកចំពោះសិល្បករដូចគ្នា! ពត៌មានលំអិតសូមទាក់ទងតាមលេខទូរស័ព្ទ: 069 66 06 91 ដោយក្តីគោរពអំពីខ្ញុំបាទ: អ៊ឹម ជីវ៉ា”។
រំឭកឡើងវិញថា អ៊ុំ គន្ធា មានកូន ពីរនាក់ ជាមួយនឹងអតីតប្តីរបស់នាង លោក ផាន សុផាត ដោយក្នុងចំណោមកូននាងទាំងពីរ មានតែម្នាក់គត់ ដែលឆ្លងជំងឺអេដស៍ពីនាង ៕
មតិយោបល់