ភ្នំពេញ៖នៅពេលដែល តារាចម្រៀង យេៗ អ៊ុំ គន្ធា ធ្លាក់ខ្លួនដុនដាប ដោយសារតែមានផ្ទុកមេរោគអេដស៍ នៅក្នុងខ្លួន បានធ្វើឲ្យជីវភាពនាង ជួបភាព លំបាកជាច្រើន ហើយនាងក៏អស់លទ្ធភាព ឲ្យកូនទាំងពីរ របស់នាង បន្តសិក្សានោះដែរ ។
ក្នុងពិធីសំណេះសណាល ញ៉ាំបាយសាមគ្គី កាលពីថ្ងៃទី ១៣ ខែ កុម្ភៈ ឆ្នាំ ២០១៥ នៅភោជនីយដ្ឋាន អូប៉េរ៉ា ក្រោមអធិបតីភាព ឯកឧត្តមខៀវ កាញារិទ្ធ រដ្ឋមន្ត្រីក្រសួងព័ត៌មាន អមដំណើរដោយមន្ត្រីអ្នកមុខអ្នកការ ក្រោមឱវាទ បានថ្លែងប្រាប់ដល់ តារាចម្រៀង អ៊ុំ គន្ធាថា “លោក នឹងជួយជ្រុំជ្រែង ឲ្យកូនទាំងពីរ របស់ តារាចម្រៀងយេៗ បានបន្តការសិក្សាទៅមុខទៀត ដើម្បីយកចំណេះដឹង មកជួយដល់ប្រទេសជាតិ” ។
ថ្លែងទាំងទឹកចិត្តរំភើប លាយឡំ នឹងទឹកភ្នែករលីង រលោង នៅមុខតារាជាច្រើននាក់ និង រដ្ឋមន្ត្រីក្រសួងព័ត៌មាន អ្នកនាង អ៊ុំ គន្ធា បាននិយាយថា “នាងពិតជាអរគុណណាស់ ដល់ឯកឧត្តម ខៀវ កាញារិទ្ធ ដែលមើលមិនរំលង ភាពខ្វះខាតរបស់ អ្នកសិល្បៈ ក៏ដូចជាប្រជាពលរដ្ឋផ្សេងទៀត ហើយនាងក៏គ្មានអ្វីតបស្នងវិញដែរ ក្រៅពីពាក្យជូនពរ ឲ្យឯកឧត្តម ជួបតែសេចក្តីសុខ គ្រប់កាលៈទេសៈ និងរាល់ភារៈកិច្ចប្រកបដោយភាពជោគជ័យ” ។
បញ្ជាក់ផងដែរថា កម្មវីធី “សំណេះសណាល ញ៉ាំបាយសាមគ្គី ” នេះដែរ ជាកម្មវីធី រៀបចំឡើងដោយ លោក អ៊ឹម ជីវ៉ា បន្ទាប់ពីមានការលើកទឹកចិត្តឲ្យធ្វើកម្មវីធីនេះឡើង ពីសំណាក់ ឯកឧត្តម ខៀវ កាញារិទ្ធ ៕
មតិយោបល់