បាត់ដំបង: មន្ត្រីប៉េអឹមមួយរូបដែលមានលក្ខណ:ស្រវឹងជោកជាំបានទាញដំបងដើរវ៉ៃមនុស្សប្រមាណជាងដប់នាក់ទោះបីជាអ្នកទាំងនោះមានផ្ទៃពោះឬក៏ជាកុមារទើបតែមានអាយុជាងមួយឆ្នាំក៏ដោយគឺគេបានប្រព្រឹត្តឡើងទាំងកំរោលកាលពីថ្ងៃទី 14-2-15 វេលាម៉ោងប្រមាណ 2 រសៀល ត្រង់ចំនុចសំណង់អនាធិបតេយ្យក្នុងស្ថានីយ៍រថភ្លើង(រ៉ាជង្រុក) ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបងបន្ទាប់ពីមន្ត្រីប៉េអឹមរូបនេះខឹងបាត់ខោលីអូនិងអាវទ្រនាប់របស់ប្រពន្ធដែលហាលនៅខាងក្រៅផ្ទះ។ ក្នុងស្ថានីយ៍រថភ្លើង មានប្រជាពលរដ្ឋជាច្រើននាក់បានមកចោមរោម ព្រមទាំងបានរៀបរាប់ថា នៅមុនពេលកើតហេតុគឺពួកគេទាំងអស់គ្នាកំពុងអង្គុយលេងដោយមិនបានដឹងខ្លួនអ្វីទាំងអស់ រំពេចនោះស្រាប់តែមានមន្ត្រីប៉េអឹមខេត្តមួយរូបឈ្មោះ ម៉ន ហៅប្រុស ជាមន្ត្រីបប៉េអឹមខេត្ត នៅក្នុងមន្ទីរស្រាវជ្រាវ ដោយមានផ្ទះជួលនៅខាងក្រោយបញ្ជាការដ្ឋានកងរាជអាវុធហត្ថខេត្តតែម្តងព្រមទាំងមានចំងាយពីស្ថានីយ៍រថភ្លើងប្រហែល 150 ម៉ែត្រ និងបក្ខពួកម្នាក់ទៀត ដែលមានលក្ខណ:ស្រវឹងផងនោះបានជិះម៉ូតូចូលមកក្នុងស្ថានីយ៍រថភ្លើងដោយមិនបាននិយាយស្តីឬសួរនាំអ្វីឡើយគឺគេបានទាញដំបងប្រវែងជាងមួយម៉ែត្រមកដេញវ៉ៃមនុស្សមិនថាក្មេងឬចាស់ឡើយ ដែលធ្វើអោយមានការភ្ញាក់ផ្អើលយ៉ាងខ្លាំង ដោយក្នុងចំណោមមនុស្សប្រមាណជាង 10 នាក់គឺមានកុមារ តូចៗដែលមានអាយុជាងមួយឆ្នាំ និងនារីដែលមានផ្ទៃពោះជាងពីរខែម្នាក់ផង។
ប្អូនប្រុស ផល សាវ័ន្ត អាយុ 19 ឆ្នាំ ដែលជាជនរងគ្រោះដែរនោះបានរៀបរាប់ថា ពេលដែល លោកប៉េអឹមនោះមកដល់បានវាយមកលើខ្លួនទាំងមិនដឹងរឿងអ្វីទាំងអស់គឺត្រូវយ៉ាងដំណំ ដោយឃើញហេតុការបែបនេះប្រពន្ធរបស់ខ្លួនដែលមានឈ្មោះ ផល អ៊ី អាយុ 17 ឆ្នាំដែលនាងមានផ្ទៃពោះជាងពីរខែផងនោះបានស្ទុះមកជួយ និងសុំអង្វរកុំអោយគេវាយតទៅទៀត តែត្រូវលោកប៉េអឹមរូបនោះវាយត្រូវមួយដំបងកណ្តាលក្បាល ហើយលើកជើងអុកមួយជង្គង់ថែមទៀតចំដើមទ្រូងបណ្តាលអោយដួលសន្លប់បាត់មាត់ឈឹងតែម្តង រួចទើបគេដើរទៅវាយអ្នកដទៃទៀតដែលក្នុងនោះគេបានវាយចំជើងក្មេងដែលមានអាយុជាងមួយឆ្នាំឡើងជាំព្រមទាំងបានចាប់ជើងទាំងពីរបំរុងបោកទៅនឹងដីថែមទៀត ប៉ុន្តែត្រូវបានម្តាយលើកដៃសំពះអង្វរកុំអោយធ្វើបាបកូនដែលនៅតូចមិនទាន់ដឹងខ្យល់អ្វីសោះនោះទើបជនកំណាចនេះទាត់ទៅលើម្តាយវិញបណ្តាលអោយដួលទៅនឹងដី ។
នៅក្នុងរយ:ពេលជិតមួយម៉ោងដែលមន្ត្រីប៉េអឹមរូបនេះបានធ្វើសកម្មភាពវាយមនុស្សពេញភូមិដោយគេបានឈរស្រែកថាអាណាមិនសុខចិត្ត ចង់ប្តឹងអញ្ជើញតាមចិត្ត ហើយពួកអ្ហែងទាំងអស់គ្នាប្រយ័ត្នអញយកឡានមកដឹកយកទៅទាំងអស់ ដោយសារតែពួកអ្ហែងនេះដើររើសអេតចាយ ហើយហ៊ានលួចខោអាវរបស់គេទៀត ព្រោះថ្មីៗនេះប្រពន្ធរបស់អញបានបាត់ខោលីអូនិងអាវទ្រនាប់ដែលដាក់ហាលនៅខាងក្រៅផ្ទះគឺគ្មានអាណាលួចក្រៅពីពួកអ្ហែងហ្នឹងទេ ។ បញ្ហានេះដែរក៏មានការរិះគន់ពីសំណាក់មជ្ឈដ្ឋានជាច្រើនដែលគេបានចោទសួរថា ក្នុងនាមជា មន្ត្រីប៉េអឹមមួយរូបដែលជាអ្នកកាន់ច្បាប់ ហើយហ៊ានដើរចោទគេចោទឯងដោយគ្មានភស្តុតាងបែបនេះតើត្រឹមត្រូវដែរឬទេ? មិនត្រឹមតែប៉ុណ្ណោះទេថែមទាំងដើរវ៉ៃមនុស្សទាំងតូចទាំងធំគ្មានការសួរនាំអោយបានច្បាស់លាស់ទាល់តែសោះ ។ បច្ចុប្បន្នមនុស្សមួយចំនួនត្រូវបានបញ្ជូនទៅកាន់មន្ទីរពេទ្យ ដោយឡែកស្ត្រីដែលមានផ្ទៃពោះត្រូវបានលោកវេជ្ជ:បណ្ឌិត លី ឡូត ប្រចាំនៅមន្ទីរពហុព្យាបាល វិសាលសុខបាត់ដំបងធ្វើការ បំភ្លឺថាជាសំណាងល្អដែលកូននៅក្នុងផ្ទៃមិនមានការប៉ះពាល់ព្រោះក្រោយពីមានការឆ្លុះអេកូត្រួតពិនិត្យឃើញថាបេះដូងរបស់ទារកមានចង្វាក់ 160 ក្នុងមួយនាទីជាធម្មតាដោយប៉ះពាលតែលើរាងកាយរបស់ម្តាយតែប៉ុណ្ណោះ ហើយនាងក៏មិនបានទាមទារអ្វីអោយធ្ងន់ធ្ងរដែរដោយគ្រាន់តែអោយជនបង្កជួយចេញថ្លៃព្យាបាលទៅបានហើយ នេះជាសំដីដែលនាងបាននិយាយនៅពេលដែលមានសមត្ថកិច្ចប៉ូលីសចុះទៅសាកសួរព័ត៌មានដល់មន្ទីរពេទ្យកាលពីល្ងាចថ្ងៃទី 14កុម្ភ: ។ក្រោយពីមានមន្ត្រីប៉េអឹមដទៃទៀតចុះមកនាំខ្លួនចូលទៅក្នុងបន្ទាយវាហាក់បីដូចជានាំយកចេញពីកន្លែងកើតហេតុដើម្បីអោយផុតពីការចោទប្រកាន់តែប៉ុណ្ណោះដោយពុំបានដាក់ទោសទណ្ឌអ្វីទៅលើបុគ្គលនេះឡើយ ប៉ុន្តែគេមិនទាន់ដឹងថាតើរឿងនេះលោកព្រះរាជអាជ្ញាបានជ្រាបដែរឬអត់នោះទេបើលោកបានជ្រាបគួរណាស់តែបញ្ជា អោយសមត្ថកិច្ចនាំខ្លួនជននេះចូលទៅបំភ្លឺតាមផ្លូវច្បាប់ទើបពិតជាត្រឹមត្រូវ និងជាអ្នកកាន់យុត្តិធ៌មយ៉ាងពិតប្រាកដ ៕
មតិយោបល់