បាងកក៖ និស្សិតថៃស្រី-ប្រុស វ័យក្មេងចំនួន ២រូប ត្រូវបានតុលាការថៃកាត់ទោសឲ្យជាប់គុកចំនួន ២ឆ្នាំកន្លះ បន្ទាប់ពីពួកគេបានសម្ដែងល្ខោននៅក្នុងសកលវិទ្យាល័យប្រមាថដល់រាជានិយម នេះបើយោងតាមការចុះផ្សាយរបស់ Channel News Asia ចេញផ្សាយនៅថ្ងៃចន្ទ ទី២៣ ខែកុម្ភៈ។
លោក Patiwat Saraiyaem វ័យ ២៣ឆ្នាំ និងនាង Porntip Mankong វ័យ ២៦ឆ្នាំ ត្រូវបានកាត់ទោសឲ្យចាប់គុក បន្ទាប់ពីឃាត់ខ្លួនកាលពីខែសីហា ពីបទ «បំផ្លាញរាជានិយម»។ ចៅក្រម បានថ្លែងឲ្យដឹងថា តាមច្បាប់អ្នកទាំងពីរនាក់នេះ ត្រូវជាប់គុក ៥ឆ្នាំ ប៉ុន្តែក្រោយពីការសម្រេចរបស់ប្រធានតុលាការ ក៏បានបន្ថយទោសមកនៅត្រឹម ២ឆ្នាំកន្លះ។
គួរបញ្ជាក់ផងដែរថា នេះមិនមែនជាលើកទីមួយនោះទេសម្រាប់ប្រទេសថៃ ដោយមានមនុស្សជាច្រើននាក់មកហើយ បានចាប់គុកដោយសារតែមើលងាយរាជានិយម ជាពិសេសគឺមើលងាយដល់ព្រះមហាក្សត្រថៃ Bhumibol Adulyadej៕
មតិយោបល់