វ៉ាន់ស៊ីនតោន៖ របាយការណ៍ថ្មីមួយដែលចេញផ្សាយដោយគេហទំព័រ Intercept បានបង្ហាញថា អាមេរិក និងចក្រភពអង់គ្លេសបានលួច Hack ចូលក្រុមហ៊ុនផលិតស៊ីមកាតធំជាងនៅលើពិភពលោក ក្នុងគោលបំណងស៊ើបការ និងតានដានការនិយាយទូរស័ព្ទ។ នេះបើយោងតាមការចុះផ្សាយរបស់ Channel News Asia ចេញផ្សាយនៅថ្ងៃទី២៣ ខែកុម្ភៈ។
គេហទំព័រ Intercept បានចុះផ្សាយនូវអត្ថបទមួយ ដែលបានផ្ដល់ដោយលោក Edward Snowden អតីតសមាជិទីភ្នាក់ងារសន្តិសុខជាតិអាមេរិក ដោយនៅក្នុងអត្ថបទនោះបានបញ្ជាក់ថា ទីភ្នាក់ងារសន្តិសុខជាតិអាមេរិក រួមនឹងចក្រភពអង់គ្លេសបានសហការគ្នាលួចចូល ក្រុមហ៊ុនផលិតស៊ីមកាត Gemalto ដើម្បីគ្រប់គ្រងទៅលើលេខកូដសម្ងាត់ដែលអាចឲ្យពួកគេចូលទៅកាន់ស៊ីមកាតទាំងអស់ទូទាំងពិភពលោក ហើយលួចស្តាប់ការសន្ទនា។
បន្ទាប់ពីមានការចេញផ្សាយនូវព័ត៌មាននេះ ប្រធានទីភ្នាក់ងារសន្តិសុខជាតិអាមេរិក បានចេញមុខច្រានចោល និងបាននិយាយថា ទីភ្នាក់ងារសន្តិសុខជាតិអាមេរិកគឺធ្វើទៅតាមច្បាប់ និងគោរពច្បាប់ មិនបានធ្វើដូចការលើកឡើងនោះទេ។
គួរបញ្ជាក់ផងដែរថា កាលពីចុងឆ្នាំ ២០១៣ លោក Edward Snowden បច្ចុប្បន្នកំពុងរស់នៅក្នុងប្រទេសរុស្ស៊ី ជាអតីតសមាជិទីភ្នាក់ងារសន្តិសុខជាតិអាមេរិក ដែលអាមេរិក បានហៅថា ជាជនក្បត់នោះ បានបង្ហាញរបាយការណ៍សម្ងាត់ជាច្រើនពាក់ព័ន្ធនឹងទីភ្នាក់ងារសន្តិសុខជាតិអាមេរិក លួចយកការណ៍ និងតាមដានរាល់សកម្មភាពរបស់ថ្នាក់ដឹកនាំនៃប្រទេសធំៗ ជាច្រើន ក្នុងនោះ ក៏មានខ្មែរផងដែរ៕
មតិយោបល់