កំពង់ចាមៈ កូនប្រុសអកតញ្ញូម្នាក់ ត្រូវបានឪពុកម្តាយបង្កើតប្តឹងសមត្ថកិច្ចឲ្យចាប់​ខ្លួនបន្ទាប់​ពីកូនប្រុសរបស់គាត់បានធ្លាក់ខ្លួនទៅជាមនុស្សញៀនថ្នាំវាយធ្វើបាបឪពុកម្តាយ និងគំរាមកំហែងលួចយកប្រាក់​អស់​ជាច្រើនលើក ហើយត្រូវបានសមត្ថកិច្ច ចាប់ខ្លួន កាលពីថ្ងៃទី០១ ខែកញ្ញា ឆ្នាំ២០១៦ ក្នុងភូមិស្វាយម៉ូ ឃុំ​ព្រែក​ដំបូក ស្រុកស្រីសន្ធរ ខេត្តកំពង់ចាម ។

នគរបាលស្រុកស្រីសន្ធរ បានឲ្យដឹងថា នៅយប់ថ្ងៃទី៣០ ខែសីហា ឆ្នាំ ២០១៦ មានជនរងគ្រោះ២នាក់ប្តីប្រពន្ធ​ឈ្មោះ. កៅ ពៅ អាយុ៦៧ឆ្នាំ និង ប្រពន្ធឈ្មោះ អេង សារ៉ាន់ អាយុ ៦០ ឆ្នាំ មានទីលំនៅភូមិស្វាយម៉ូ ឃុំព្រែក​ដំ​បូកស្រុក​ស្រីសន្ធរ ខេត្តកំពង់ចាម បានមកប្តឹងនគរបាលប៉ុស្តិ៍ព្រែកដំបូក ឲ្យធ្វើការចាប់ខ្លួនកូនប្រុសអកតញ្ញូ របស់​ពួកគាត់មានឈ្មោះ កៅ ឆៃ អាយុ២០ឆ្នាំ រស់ក្នុងបន្ទុកគ្រួសារ ពីបទគំរាមកំហែងលើពួកគាត់ និងវាយបំផ្លិចបំផ្លាញ​ទ្រព្យសម្បត្តិ និងលួចយកលុយ ។ ក្រោយពីទទួលបណ្តឹង របស់ជនរងគ្រោះរួចមក សមត្ថកិច្ច បានតាម រកកូន​ប្រុសកំហូចខាងលើ តែរកមិនឃើញ ។ លុះរំលងបានមួយថ្ងៃ ក្រោយមកទើប សមត្ថកិច្ចចាប់ខ្លួនកូនប្រុស​អកតញ្ញូ​ឈ្មោះ កៅ ឆៃ បាននាំមកអធិការដ្ឋានបំពេញសំណុំរឿងបញ្ជូនជនសង្ស័យ ទៅកាន់តុលាការ ពីបទគំរាមកំហែង​ឪពុកម្តាយ ៕