ផ្ទះ ព័ត៌មានជាតិ អ្នកនាំពាក្យព...

អ្នកនាំពាក្យព្រឹទ្ធសភា៖ បញ្ជាក់អំពីជំហររបស់ខ្លួនជុំវិញការលើកអភ័យឯកសិទ្ធសភា អ្នកស្រីថាក់ ឡានី

0

ភ្នំពេញ: នាថ្ងៃទី៣១ ខែសីហា ឆ្នាំ ២០១៦ ក្រុមសមាជិកព្រឹទ្ធសភា មកពីគណបក្សសម រង្ស៊ី បានចេញសេចក្តីថ្លែងការណ៏មួយ គូសបញ្ជាក់អំពី ជំហររបស់ខ្លួនជុំវិញការលើកអភ័យឯកសិទ្ធសភា អ្នកស្រី ថាក់ ឡានី សមាជិកព្រឹទ្ធសភា មណ្ឌលភូមិភាគទី២ មកពីគណបក្សសម រង្ស៊ី ។

ក្នុងសេចក្តីថ្លែងការណ៏បានឲ្យដឹងថា ដើម្បីចៀសវាងការភ័ន្តច្រឡំក្នុងសាធារណ:មតិ និងការបំពុលបរិយាកាសរួម អ្នកនាំពាក្យព្រឹទ្ធសភាសូមគូសបញ្ជាក់អំពី ករណីនេះដូចតទៅរួមមាន អំពើរំលោភបំពានច្បាប់ តាមរយ:ការថ្លែងការ​ណ៏មួលបង្កាច់ វាយប្រហារ បរិហាកេរ្តិ៏ ធ្វើឲ្យប៉ះពាល់ដល់កិត្តយសរបស់អ្នកដទៃ ដល់ទំនៀមទម្លាប់របស់សង្គម ដល់​សណ្តាប់ធ្នាប់សាធារណ: និងដល់សន្តិសុខជាតិ ពុំអាចចាត់ទុកជាការសម្តែងមតិបានឡើយ ។

មាត្រ១០៤ថ្មី នៃរដ្ឋធម្មនុញ្ញនៃព្រះរាជាណាចក្រកម្ពុជា និងច្បាប់ស្តីពីលក្ខន្តិក: សមាជិកព្រឹទ្ធសភា បានបញ្ជាក់​ច្បាស់​អំពី ការលើកអភ័យឯកសិទ្ធិសភារបស់សមាជិកព្រឹទ្ធសភា ដែលមានជាអាទិ៍ដូចតទៅ មាត្រា ៥៖សមាជិក​ព្រឹទ្ធសភា មិនអាចឆ្លៀតប្រើអភ័យឯកសិទ្ធិសភានេះដោយរំលោភនាំឲ្យប៉ះពាល់ដល់កិត្តយសរបស់បុគ្គលដទៃ ដល់​ទំ​នៀបទម្លាប់ល្អរបស់សង្គម ដល់សណ្តាប់ធ្នាប់សាធារណ: និងដល់សន្តិសុខជាតិបានឡើយ ។ មាត្រា៧ ៖ សមា​ជិ​កព្រឹទ្ធសភា ដែលបានប្រព្រឹត្តបទល្មើសព្រហ្មទណ្ឌ នឹងអាចអនុញ្ញាតិបើកឲ្យធ្វើការចោទប្រកាន់ ការចាប់ខ្លួន ការ​ឃា​ត់ខ្លួន ឬការឃុំខ្លួនតាមច្បាប់ និងនីតិវិធីបានលុះត្រាតែ មានការលើកអភ័យឯកសិទ្ធិសភាជាមុនសិន ។ មាត្រា​៨៖ សេចក្តីស្នើសុំលើកអភ័យឯកសិទ្ធិសភារបស់សមាជិកព្រឹទ្ធសភាពរូបណាមួយ ត្រូវធ្វើឡើងដោយអគ្គព្រះ​រាជអា​ជ្ញាអមសាលាឧទ្ធរណ៏ តាមរយ:រដ្ឋមន្ត្រីក្រសួងយុត្តិធម៌ ដោយមានភ្ជាប់សេចក្តីថ្លែងហេតុមកជាមួយផង ផ្ញើជូនប្រ​ធា​នព្រឹទ្ធសភា ។មាត្រ៩ ៖ ការលើកអភ័យឯកសិទ្ធិសភា ក្នុងរយ:ពេលសម័យប្រជុំព្រឹទ្ធសភា ត្រូវអនុវត្តតាមនីតិវិធី​ដូចជា ព្រឹទ្ធសភាអាចប្រជុំជាសម្ងាត់តាមការស្នើសុំពីប្រធាន ឬសមាជិកព្រឹទ្ធសភាចំនួនមួយភាគដប់យ៉ាងតិច ពីព្រះ​មហាក្សត្រ ពីនាយករដ្ឋមន្ត្រី ឬពីប្រធានរដ្ឋសភា , កូរ៉ុមប្រជុំលើសពី ពីរភាគបីនៃសមាជិកព្រឹទ្ធសភាទាំងមូល , ការអនុម័ត តាមមតិភាគច្រើន ពីរភាគបីនៃចំនួនសមាជិកព្រឹទ្ធសភាទាំងមូល ។

យោងតាមលិខិត ៧៣១ មហក/១៦ ចុះថ្ងៃទី ២៦ ខែសីហា ឆ្នាំ ២០១៦ បានអគ្គព្រះរាជអាជ្ញាអមសាលា​ឧទ្ធរ​ណ៍​អមដោយសេចក្តីថ្លែងហេតុលេខ ៧៣២ ហមក/១៦ ចុះថ្ងៃទី២៦ ខែសីហា ឆ្នាំ២០១៦ ដែលបានផ្ញើជូនសម្តេច​វិបុល​សេនាភក្តី សាយ ឈុំ ប្រធានព្រឹទ្ធសភា តាមរយ:រដ្ឋមន្ត្រីក្រសួងយុត្តិធម៌ តាមលិខិតលេខ១៤៦១​/គយ​.ព្រទ​.យអ/១៦ ចុះថ្ងៃទី២៩ ខែសីហា ឆ្នាំ ២០១៦ លោកស្រី ថាក់ ឡានី ត្រូវបានជាប់សង្ស័យក្នុងសំណុំរឿង​ព្រហ្ម​ទណ្ឌ​លេខ ៣៦៥៤ ចុះថ្ងៃទី១ សីហា ឆ្នាំ២០១៦ ដោយបានប្រព្រឹត្តិអំពើបរិហារកេរ្ត៏ ជាសាធារណ: និងអំពើបង្ករ​ឲ្យ​​មានភាពវឹងវរធ្ងន់ធ្ងរ ដល់សន្តិសុខសង្គម ដែលជាបទល្មើសព្រហ្មទណ្ឌមានចែងក្នុងមាត្រា៣០៥ មាត្រា៤៩៤ និងមាត្រ ៤៩៥ នៃក្រមព្រហ្មទណ្ឌនៃព្រះរាជាណាចក្រកម្ពុជា ៕

អ្នកនាំពាក្យព្រឹទ្ធសភា អ្នកនាំពាក្យព្រឹទ្ធសភា

មតិយោបល់

Loading...