បើទោះបីជានៅសល់ក្ដីសង្ឃឹមតិចតូចក្ដី ក៏សាច់ញាតិរបស់អ្នកដំណើរនៅលើយន្តហោះ Malaysia Airlines MH 370 ទាំងអស់ នៅតែរំពឹងថា សាច់ញាតិខ្លួននៅរស់ ហើយសង្ឃឹមថានឹងរកឃើញ ខណៈដែលគិតមកដល់ថ្ងៃទី០៨ ខែមីនា ឆ្នាំ ២០១៥ នេះ ជាថ្ងៃគម្រប់ខួប១ឆ្នាំនៃការបាត់យន្តហោះ MH 370។
Malaysia Airlines MH 370 បានហោះហើរពីទីក្រុង Kuala Lumpur ប្រទេសម៉ាឡេស៊ី ទៅកាន់ក្រុងប៉េកាំង ប្រទេសចិន នៅថ្ងៃទី ០៨ខែមីនា ឆ្នាំ ២០១៤ ជាមួយនឹងមនុស្ស ២៣៩នាក់ និងបាត់ពីប្រព័ន្ធរ៉ាដានៅតំបន់សមុទ្រចិនខាងត្បូង ដោយត្រូវបានគេប៉ាន់ប្រមាណថា បានធ្លាក់នៅលើក្នុងសមុទ្រឥណ្ឌា។
យោងតាមរបាយការណ៍របស់ក្រុមហ៊ុនអាកាសចរណ៍ម៉ាឡេស៊ីបានឲ្យដឹងថា នៅលើយន្តហោះ មានអ្នកដំណើរចំនួន ២២៧នាក់ និងសហនាវិកចំនួន ១២នាក់ ដោយក្នុងនោះមានជនជាតិចិន ១៥២នាក់,អូស្ត្រាលី ៦នាក់, កាណាដា ២នាក់, បារាំង ៤នាក់, ហុងកុង ១នាក់, ឥណ្ឌា ៥នាក់, ឥណ្ឌូនេស៊ី ៧នាក់, អ៉ឺរ៉ាក់ ២នាក់, ម៉ាឡេស៊ី ៥០នាក់, ហូឡង់ ១នាក់, ញូវែលសេឡង់ ២នាក់, រុស្ស៊ី ១នាក់, តៃវ៉ាន់ ១នាក់, អ៊ុយក្រែន ២នាក់ និងសហរដ្ឋអាមេរិក ៣នាក់។
ក្រោយពីការបាត់យន្តហោះ MH 370 មានប្រទេសជាច្រើនបានចូលរួមស្វែងរក ដោយប្រើប្រាស់នាវាចម្បាំង យន្តហោះ ផ្ដាយរណប និងឧបករណ៍ស្គែនបាត់សមុទ្រ ប៉ុន្តែគិតមកដល់ពេលនេះ អស់រយៈពេល ១២ខែហើយ នៅតែគ្មានតម្រុយ និងដានអ្វីទាំងអស់៕
មតិយោបល់