បន្ទាយមានជ័យៈ នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិៈ លោកនឹងផ្តល់រង្វាន់ជាទីគាប់ចិត្តបើបង្ក្រាបបានមេក្លោងធំជួញដូរគ្រឿងញៀនព្រោះថាបទល្មើសគ្រឿងញៀន វាមានការប្រទាក់ក្រឡាគ្នា ពីកទៅខ ពីខទៅគ ដូច្នេះលោកស្នើអោយ សមត្ថកិច្ចនគរបាល និងអាវុធហត្ថខេត្ត រួមគ្នាបង្ក្រាប។
ការថ្លែងដូចនេះក្នុងពិធីផ្សព្វផ្សាយ សន្និបាតរបស់ក្រួងមហាផ្ទៃ អគ្គស្នងការនគរបាលជាតិ គណៈបញ្ជាការឯកភាពខេត្ត និងប្រកាសផ្ទេរភារកិច្ចតែងតាំងមុខតំណែង បំពាក់ឋានន្តរស័ក្តមន្ត្រីនគរបាលជាតិនៃស្នងការនគរបាលខេត្តបន្ទាយមានជ័យ ក្រោមការចូលរួមពីសំណាក់ឯកឧត្តម គោស៊ុំ សារឿត អភិបាលខេត្តបន្ទាយមានជ័យ និងមន្ត្រីនគរបាលទូទាំងខេត្ត ។
លោកឧត្តមសេនីយ៍ ខេង សុមេធ បានអោយដឹងទៀតថា កន្លងមកតាមរយៈសាព័ត៍មានខេត្តបន្ទាយមានជ័យ មិនថាប៉ូលីស ឬប៉េអឹម បង្ក្រាបបានករណីគ្រឿងញៀនបន្តបន្ទាប់គ្នា តែនៅមិនទាន់ឃើញបង្ក្រាបបានមេក្លោងក្នុងការជួញដូរនៅឡើយទេ ។ ក្នុងនោះលោកពុំជឿរថា អ្នកជួញដូរគ្រឿងញៀន ជិះយន្តហោះ ឬមកពីទីឆ្ងាយឡើយ គឺប្រាកដជាអ្នកប្រើប្រាស់ទៅទិញអ្នកចែកចាយ ហើយអ្នកចែកចាយ ទៅយកបន្តមានន័យថា កទៅខ ខទៅគ បើយើងចាប់បានម្នាក់ក្នុងចំនោមហ្នឹង ហេតុអ្វីយើងមិនអាចបង្ក្រាបបានអ្នកពាក់ព័ន្ធក្នុងរឿងគ្រឿងញៀននេះបាន ។ ដើម្បីយុវជនជាទំពាំងស្នងឬស្សី អាណាព្យាបាល និងសង្គម លោកសូមអោយសមត្ថកិច្ចរួមគ្នា បង្ក្រាបអោយបានមុខសញ្ញាជួញដូរធំ ៗ លោកនឹងផ្តល់រង្វាន់ជាទីគាប់ចិត្ត ។
យោងតាមរបាយការណ៍ បូកសរុបការងាររបស់ស្នងការនគរបាលខេត្តបន្ទាយមានជ័យក្នុងឆ្នាំ ២០១៤ បទល្មើសគ្រឿងញៀន ត្រូវបានសមត្ថកិច្ចនគរបាលខេត្តបន្ទាយមានជ័យ បង្ក្រាបបាន៨៤លើក ឃាត់ខ្លួនជនសង្ស័យបាន៣០៩នាក់ ក្នុងនោះស្រី២៧នាក់ ដកហូតវត្ថុតាងនៅថ្នាំញៀនចំនួន១៥,៦៨៩គ្រាប់ ម៉ាទឹកកក២៧៩កូនថង់តូច ស្មើរនិង៧៤៨,៨ក្រាម ថ្នាំកេតាមីន ២០ប្រអប់ ស្មើរនិង៥០០ដប រថយន្ត៣គ្រឿងម៉ូតូ២៧គ្រឿង ប្រាក់ខ្មែរ ប្រាក់ថៃ និងដុល្លា សរុបជិត៣លានរៀល ៕
ព័ត៌មានជាតិ
មតិយោបល់