ភ្នំពេញ៖ យោងតាម Facebook Page របស់លោក លោក សម រង្ស៊ី ប្រធានគណបក្សសង្គ្រោះជាតិ បានឲ្យដឹងថា មានក្រុមហ៊ុនឯកជនមួយបានសហការជាមួយនឹងគណបក្សសង្គ្រោះជាតិ ដោយបាននឹងកំពុងតែរៀបចំទាំងផ្នែកបច្ចេកទេស និងហិរញ្ញវត្ថុ សម្រាប់ត្រៀមការចាប់ផ្ដើមដំណើរការផ្សាយ «ទូរទស្សន៍ ព្រះអាទិត្យ ឬ ទូរទស្សន៍សង្គ្រោះជាតិ» នៅក្នុងឆ្នាំនេះ។
នៅលើ Facebook Page របស់លោក លោក សម រង្ស៊ី បានសរសេរថា «យើងទើបតែបានទទួលដំណឹងថា ក្រុមហ៊ុនទូរទស្សន៍ឯកជនមួយដែលមានសមានចិត្តចំពោះគណបក្សសង្គ្រោះជាតិ ហើយដែលបានទទួលអាជ្ញាបណ្ណ ពីក្រសួងព័ត៌មាន ដើម្បីផ្សព្វផ្សាយកម្មវិធីទូរទស្សន៍កំពុងត្រៀមលក្ខណៈទាំងផ្នែកបច្ចេកទេស ទាំងផ្នែកហិរញ្ញវត្ថុ ដើម្បីចាប់ផ្តើមដំណើរការ ក្នុងឆ្នាំ ២០១៥ នេះ។ ស្ថានីយ៍ទូរទស្សន៍ថ្មីនេះដែលប្រជារាស្រ្តខ្មែររង់ចាំយូរមកហើយ ហើយដែលអាចមានឈ្មោះថា “ទូរទស្សន៍ ព្រះអាទិត្យ” ក៏ជាលទ្ធផលមួយទៀត នៃវប្បធម៌សន្ទនា បន្ទាប់ពីការបង្កើត គ.ជ.ប.ថ្មីមួយ ដែលយើងអាចជឿទុកចិត្តបាន ដើម្បីរៀបចំការបោះឆ្នោតដោយសេរី ត្រឹមត្រូវ និងយុត្តិធម៌ នៅឆ្នាំ ២០១៧ និង ២០១៨ហើយបន្ទាប់ពីការដោះលែងពីពន្ធនាគារ នូវសកម្មជនសិទ្ធិមនុស្ស សកម្មជនដីធ្លី និងសកម្មជនគណបក្សសង្រ្គោះជាតិដែលត្រូវបានអាជ្ញាធរចាប់យកទៅឃុំឃាំងពាក់ព័ន្ធទៅនឹងព្រឹត្តិការណ៍នយោបាយផ្សេងៗ ក្រោយពីការបោះឆ្នោត ថ្ងៃ ២៨ កក្កដា ២០១៣»៕
មតិយោបល់