យោងតាមការបង្ហោះព័ត៌មាននៅលើ Facebook Page របស់លោក Jan Koum សហស្ថាបនិក និងជានាយកប្រតិបត្តិ WhatsApp បានឲ្យដឹងថា នៅពេលនេះ ចំនួនអ្នកប្រើ WhatsApp បានកើនឡើងដល់ ៨០០លាននាក់ ជារៀងរាល់ថ្ងៃ ហើយអាចនឹងឈានដល់ ១ពាន់លាន​នាក់នៅចុងឆ្នាំ។

សារព័ត៌មាន Wall Street Journal បានចុះផ្សាយថា លោក Jan Koum បានបង្ហោះថាកាលពីថ្មីៗនេះ ដោយបានបញ្ជាក់ថា ចំនួនអ្នកប្រើប្រាស់​បានកើនឡើង ១០០លាននាក់ ជារៀងរាល់ ៤ខែម្ដង ពោលគឺចាប់តាំងពីខែសីហា ឆ្នាំ ២០១៤ ដែលកាលនោះមានត្រឹមតែ ៦០០លាននាក់ ហើយ​កាលពីខែមករា ឆ្នាំ ២០១៥ មានចំនួន ៧០០លាននាក់។

គួរបញ្ជាក់ផងដែរថា WhatsApp ត្រូវបានបង្កើតឡើងតាំងពីឆ្នាំ ២០០៩ ដោយអតីតបុគ្គលិកក្រុមហ៊ុន Yahoo ចំនួនពីររូបគឺលោក Brian Acton និង Jan Koum ហើយក្រោយមកនៅខែកុម្ភៈឆ្នាំ ២០១៤ ក៏ត្រូវបាន Facebook ទិញយកក្នុងតម្លៃ១៩ពាន់លានដុល្លារអាមេរិក ដោយគិតទាំងពន្ធ មានតម្លៃរហូតដល់ជាង ២២ពាន់លានដុល្លារអាមេរិក៕