កំពង់ឆ្នាំង៖ឯកឧត្តមនាយឧត្តមសេនីយសៅ សុខា មេបញ្ជាការកងរាជអាវុធហត្ថលើផ្ទៃប្រទេសបានមានប្រសាសន៍នៅក្នុងឱកាស ពីធីប្រកាសផ្លាស់ប្តូរមុខដំណែងកងរាជអាវុធហត្ថខេត្តកំពង់ឆ្នាំង កាលពីព្រឹកថ្ងៃទី០១ ខែឧសភា ឆ្នាំ២០១៥ នៅទីបញ្ជាការកងរាជអាវុធហត្ថខេត្តកំពង់ឆ្នាំងថា៖ ចង់ដឹកនាំអោយទទួលបានជោគជ័យ ត្រូវមានការចូលរួម ហើយរាល់ការសម្រេចអ្វីមួយក៏ត្រូវមានការឯកភាពជាសមូហភាព និង ត្រូវទុកឱកាសអោយមានការចូលរួមពី លោកនាយ នាយរង សេនាធិការនិងពលកងរាជអាវុធហត្ថទាំងអស់ក្នុអង្គភាព ទើបការដឹកនាំទទួលបាននូវជោគជ័យល្អប្រសើរ។ ឯកឧត្តម នាយឧត្តមសេនីយបានបន្តថាៈ ភាពក្រីក្រ គឺជាសត្រូវរបស់ប្រជាពលរដ្ឋ ដើម្បីលប់បំ បាត់ភាពក្រីក្ររបស់ប្រជាពលរដ្ឋ គឺផ្តើមចេញពីការមានសុខសន្តិសុខនៅក្នុងសង្គមជាតិ ។ មេបញ្ជាការកងរាជអាវុធហត្ថខេត្តកំពង់ឆ្នាំងដែលផ្លាស់មកកាន់ដំណែងថ្មី ត្រូវតែអនុវត្តបញ្ជារអោយបានម៉ឺងម៉ាត់បំផុតទៅតាមច្បាប់ ហើយមេបញ្ជាការរង និងកងរាជអាវុធហត្ថ ទាំងអស់សូមយកចិត្តទុកដាក់សហការគ្នា និងគោរពមេបញ្ជាការរបស់ខ្លួន ក្នុងការបង្ក្រាបបទល្មើសផ្សេងៗអោយមានប្រសិទ្ធភាព ដើម្បីធានាបានសន្តិសុខ សុវត្តិភាពជូនប្រជាពលរដ្ឋក្នុងខេត្ត។ត្រូវត្រៀមកម្លាំងជួយប្រជាពលរដ្ឋក្នុងរដូវវស្សាដើមឆ្នាំនេះ ដែលតាមឧតុនិយមបានប្រកាសថាៈនឹងមានភ្លៀងធ្លាក់ខ្លាំងព្រមជាមួយខ្យល់ព្យុះកន្ត្រាក់ជាគ្រោះធម្មជាតិ ហេតុនេះកម្លាំងកងរាជអាវុធហត្ថខេត្ត ត្រូវត្រៀមកម្លាំងជានិច្ចក្នុងការជួយពួកគាត់ពេលជួបគ្រោះធម្មជាតិនេះ តែមុននិងជួយគេត្រូវចេះជួយខ្លួនឯងផងដែរ គឺមើលផ្ទះសំបែង មើលជំរុំជំរករបស់ខ្លួន ការពារអោយគត់មត់បានល្អ។ លោក ឈួរ ច័ន្ទឌឿន អភិបាលខេត្តកំពង់ឆ្នាំងបានលើកឡើងនៅក្នុងពិធីនេះថា៖សូមលោកនាយកងរាជអាវុធហត្ថខេត្តទាំងអស់ ពង្រឹងប្រសិទ្ធិភាពការងារ ស្របតាមគោលនយោបាយរបស់រាជរដ្ឋភិបាល និងការងារសន្តិសុខជាតិ ពង្រឹងសណ្តាប់ធ្នាប់សារធារណៈ គ្រប់មូលដ្ឋាន។ ត្រូវលប់បំបាត់ចោរលួច ចោរប្លន់ គ្រឿងញៀន ល្បែងស៊ីសងគ្រប់ប្រភេទ ។បើសិនមានចោរប្លន់ នៅកន្លែងណា ថ្នាក់ដឹកនាំកម្លាំងប្រដាប់អាវុធគ្រប់ប្រភេទនៅទីនោះ តើមានវិធានការទប់ស្កាត់សកម្មភាពបង្ក្រាបចោរប្លន់ ដែរឬទេ បើគ្មានទេ គឺត្រូវដកចេញភ្លាមៗ ដែលនេះគឺជាគោលការណ៏ថ្នាក់លើ។ អនុសាសន៍របស់ប្រមុខរាជរដ្ឋាភិបាល ត្រូវលប់បំបាត់អោយអស់ភាពអសកម្មរបស់ មន្ត្រីនានាក្នុងខេត្ត និងត្រូវអនុវត្តដីការចាប់ខ្លួនជនល្មើសដែលចេញពីតុលាការអោយបានអស់ព្រោះថា បើចាប់ជនល្មើសទាំងនោះមិនបានទេ ពួកគេទាំងនោះនៅតែបន្តសកម្មភាពនៅក្នុងមូលដ្ឋានរបស់យើងដដែល ។ការផ្លាស់ប្តូរមេបញ្ជាការនៅពេលនេះ គឺជាការអនុវត្តកំណែទម្រង់របស់កងរាជអាវុធហត្ថ ដែលកន្លងមកកងរាជអាវុធហត្ថខេត្ត បានចុះគ្រប់មូលដ្ឋាននិងធ្វើកិច្ចប្រតិបត្តិការយ៉ាងសកម្ម ក្នុងការងារ ការពារសន្តិសុខ សណ្តាប់ធ្នាប់បានល្អជូនប្រជាពលរដ្ឋ។ លោក មាស សុវណ្ណ មេបញ្ជាការកងរាជអាវុធហត្ថខេត្តដែលទើបចូលកាន់តំណែងថ្មី បានប្តេជ្ញា ចិត្ត ខិតខំស្តាប់ការចង្អុលបង្ហាញរបស់អគ្គមេបញ្ជាការកងរាជអាវុធហត្ថលើផ្ទៃប្រទេស ក៏ដូចជាស្តាប់ការ ណែនាំ របស់លោកអភិបាលខេត្ត និងយកអស់កម្លាំងកាយចិត្តដឹកនាំកងរាជអាវុធហត្ថខេត្តកំពង់ឆ្នាំង ក្នុងការបង្ក្រាបបទល្មើសនានា ធានាបានសន្តិសុខសណ្តាប់ធ្នាប់អោយបានល្អជូនប្រជាពលរដ្ឋ ។ដោយឡែកនៅក្នុងពិធីនេះលោក ជួន ជឿន អតីតមេបញ្ជាការកងរាជអាវុធហត្ថខេត្តកំពង់ឆ្នាំង ត្រូវបានផ្លាស់ប្តូរទៅកាន់ស្នងការសម្ភារៈបច្ចេកទេសនៃកងរាជអាវុធហត្ថលើផ្ទៃប្រទេស៕
ព័ត៌មានជាតិ
មតិយោបល់