កំពង់ឆ្នាំង៖នៅវេលាម៉ោង១១និង៣០នាទី ថ្ងៃទី០៣ ខែឧសភា ឆ្នាំ២០១៥ រថយន្តក្រុងVIP បុករថយន្តហាយឡេនឌ័រពេញទំហឹង ធ្លាក់ពីលើផ្លូវជាតិ ខណៈបើកបរក្នុងទិសដៅច្រាស់គ្នា បណ្តាលអោយស្លាប់ស្ត្រីម្នាក់ និងកូនចៅ៣នាក់ទៀត រងរបួសធ្ងន់ស្រាល ។ហេតុការណ៍នេះ បានកើតឡើងលើកំណាត់ផ្លូវជាតិលេខ៥ នៅចំណុចផ្លូវបត់កោង ចន្លោះគីឡូម៉ែត្រលេខ១៣១និង១៣២ ស្ថិតក្នុងភូមិត្រពាំងចាន់ ឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ។សមត្ថកិច្ចនគរបាលចរាចរណ៍ ស្រុកបរិបូណ៌ បានបញ្ជាក់អោយដឹងថា ស្ត្រីរងគ្រោះដែលបានស្លាប់នៅក្នុងហេតុការណ៍នោះ មានឈ្មោះ អោ សួង អាយុ៦៩ឆ្នាំ ដោយឡែកអ្នករងរបួសធ្ងន់ មានឈ្មោះ ម៉ុម ណោ ភេទស្រី អាយុ៣២ឆ្នាំ បានរងរបួសធ្ងន់ធ្ងរ គាត់ជាកូនរបស់ស្ត្រីដែលស្លាប់ និងជាអ្នកបើកបររថយន្តហាយឡេនឌ័រ,ឈ្មោះ ម៉ុម ស៊ីវ័ន ភេទស្រី អាយុ៤៧ឆ្នាំ រងរបួសធ្ងន់ និងកុមារា អ៊ឹង ជីហ៊ា អាយុ១១ឆ្នាំ រងរបួសស្រាល ពួកគេរស់នៅក្នុងភូមិថ្មគោល ឃុំតាម៉ឺន ក្រុងបាត់ដំបង ខេត្តបាត់ដំបង ។ សមត្ថកិច្ចបានអោយដឹងទៀតថា មុនពេលកើតហេតុ គេឃើញរថយន្តម៉ាកហាយឡេនឌ័រ ពណ៌ស្ករ ពាក់ស្លាក់លេខ ភ្នំពេញ 2U-7974 បើកបរដោយស្ត្រី ម៉ុម ណោ ក្នុងទិសដៅពីជើងទៅត្បូង លុះមកដល់ចំណុចកើតហេតុ ក៍មានរថយន្តក្រុង VIP ពណ៌ស ពាក់ស្លាក់លេខ ភ្នំពេញ 3A-8038 មួយគ្រឿង បើកបរក្នុងទិសដៅច្រាស់គ្នា ក្នុងល្បឿនយ៉ាងលឿន លុះដល់ចំណុចផ្លូវបត់កោង ក៍បានឡើងជែងរថយន្តមួយគ្រឿងទៀត ហើយក៍បានរេចង្កូត មកបុករថយន្តហាយឡេនឌ័រពេញទំហឹង ធ្លាក់ពីលើផ្លូវជាតិ បណ្តាលអោយស្ត្រីម្នាក់បែកលលាដ៍ក្បាល ធ្លាយខួរពេញរថយន្ត ស្លាប់នៅនិងកន្លែងកើតហេតុ និងកូនចៅ៣នាក់ទៀត រងរបួសដេកក្នុងរថយន្តតែ ម្តង ។ក្រោយពេលកើតហេតុ ក្រុមគ្រួសារជនរងគ្រោះ បានដឹកបញ្ជូនជនរងគ្រោះទាំងអស់ ទៅសង្គ្រោះព្យាបាលនៅមន្ទីរពេទ្យ ខេត្តបាត់ដំបង ចំណែកសពស្ត្រីរងគ្រោះ ដឹកទៅធ្វើបុណ្យតាមប្រពៃណី នៅឯលំនៅដ្ឋាន ។ ដោយឡែកអ្នកបើកបររថយន្តក្រុង ក្រោយពេលបង្កហេតុ បានរត់គេចខ្លួនបាត់ស្រមោល ទុករថយន្តចោលនៅកន្លែងកើតហេតុ ។ រថយន្តហាយឡេនឌ័រ បានខូចខាតធ្ងន់ និងបែកកង់អស់៣គ្រាប់ ឯរថយន្តក្រុង ខូចខាតមធ្យម ។ រថយន្តទាំង២គ្រឿង ត្រូវបានសមត្ថកិច្ច នគរបាលចរាចរណ៍ ខេត្តកំពង់ឆ្នាំង អូសនិងស្ទួចយកមករក្សាទុក នៅស្នងការដ្ឋាននគរបាល ខេត្តកំពង់ឆ្នាំង ដើម្បីកសាងសំណុំរឿង តាមនិតិវិធីបញ្ជូនទៅតុលាការខេត្ត ចាត់ការបន្តតាមផ្លូវច្បាប់៕
ព័ត៌មានជាតិ
មតិយោបល់