ភ្នំពេញ៖ យុវជនពីរនាក់ បានរងរបួសសុះសាច់ស្ទើរបាត់បង់ជីវិត ដោយសារតែ មានក្រុមក្មេងស្ទាវប្រមាណគ្នា ១០នាក់ ប្រដាប់ដោយដាវសាមូរ៉ៃ ដើរសំដៅមកកាប់លើយុវជនទាំងពីរនាក់។

យោងតាមសំដីរបស់សមត្ថកិច្ចបានឲ្យដឹងថា នៅវេលាម៉ោងប្រមាណជា
១០៖០០នាទីយប់ ថ្ងៃទី២៤ ខែមិថុនា ឆ្នាំ២០១៥នេះ ស្ថិតតាមផ្លូវ២៦១ កែងផ្លូវ១៨៦ ក្នុងសង្កាត់ទឹកល្អក់៣ ខណ្ឌទួលគោក មានក្មេងស្ទាវមួយក្រុម មានគ្នាជិត១០នាក់ ធ្វើដំណើរដោយថ្មើរជើងប្រដាប់ដោយដាវសាមូរ៉ៃ បានរត់ទៅកាប់យុវជន២នាក់ ដែលកំពុងជិះម៉ូតូមួយគ្រឿង ពណ៌ខ្មៅដែលបណ្តាលឲ្យរបួសសុះសាច់តែម្តង។

ក្រោយពីកើតហេតុ អាជ្ញាធរបានឲ្យដឹងថា ជនរងគ្រោះបញ្ជូនទៅកាន់មន្ទីរពេទ្យកាល់ម៉ែត្រ ចំណែកក្រុមក្មេងស្ទាវ ដែលដេញកាប់គេបានរត់គេចខ្លួនបាត់អស់ បន្សល់ទុកនៅតែដាវសាមូរ៉ៃ២ដើមនៅកន្លែងតែប៉ុណ្ណោះ។ កម្លាំងសមត្ថកិច្ចប៉ុស្តិ៍ទឹកល្អក់៣ បាននិយាយប្រាប់ថា មិនទាន់ដឹងជាគុំនុំរឺជារឿងអ្វីនោះទេ៕