បន្ទាយមានជ័យ ៖ នៅថ្ងៃទី០២ ខែមេសា ឆ្នាំ២០២១នេះ នៅទូទាំងខេត្តបន្ទាយមានជ័យបានបើកយុទ្ធនាការចាក់វ៉ាក់សាំងការពារជំងឺកូវីដ-១៩ ជំហានដំបូងជូនមន្ត្រីរាជការ នៅសេសសល់ អាជ្ញាធរដែនដី អាជីវករ អ្នករត់តាក់ស៊ី ម៉ូតូឌុប និងប្រជាពលរដ្ឋ ។
ជាមួយគ្នានៃការចាប់ផ្តើមយុទ្ធនាការចាក់វ៉ាក់សាំងនោះដែរ ឯកឧត្ដម អ៊ុំ រាត្រី អភិបាលនៃគណ:អភិបាលខេត្តបន្ទាយមានជ័យ អមដំណើរដោយ អភិបាលរងខេត្ត អភិបាលក្រុងសិរីសោភ័ណ មន្ទីរពាក់ព័ន្ធ បានចុះពិនិត្យមើលដោយផ្ទាល់ និងបានជួបសំណេះសំណាលជាមួយបងប្អូនដែលបានមកទទួលវ៉ាក់សាំងស៊ីណូវ៉ាក់ (SINOVAC) នៅទីតាំងទាំង២ ក្នុងក្រុងសិរីសោភ័ណ គឺមន្ទីរពេទ្យបង្អែកក្រុងសិរីសោភ័ណ និងវិទ្យាល័យសិរីសោភ័ណ ។
ថ្លែងក្នុងឱកាសនោះ ឯកឧត្ដម អ៊ុំ រាត្រី បានអំពាវនាវដល់បងប្អូនអាជីវករ អ្នករត់តាក់ស៊ី ម៉ូតូឌុប និងប្រជាពលរដ្ឋ ដែលបានមកចាក់វ៉ាងសាំង និងមិនទាន់ចាក់ សូមបន្តអនុវត្តាមវិធានការរបស់ក្រសួងសុខាភិបាលឲ្យបានខ្ជាប់ខ្ជួនទាំងអស់គ្នា
ជាមួយគ្នានោះ ឯកឧត្ដមអភិបាលខេត្ត ក៏បានបញ្ជាក់ថា៖ សម្រាប់វ៉ាក់សាំងស៊ីណូវ៉ាក់ (SINOVAC) នេះ គឺអាចចាក់បានពីអាយុ១៨ឆ្នាំឡើងទៅ មិនមែនពី១៨ឆ្នាំទៅ៥៩ឆ្នាំនោះទេ ។
គួរបញ្ជាក់ផងដែរថា ៖ សម្រាប់យុទ្ធនាការចាក់វ៉ាក់សាំង អាជ្ញាធរខេត្តបន្ទាយមានជ័យ បានរៀបចំ៩ទីតាំង លើ៩ក្រុង/ស្រុក និងមានក្រុមគ្រូពេទ្យ ១៣ក្រុម ដោយក្នុងនោះក្រុងសិរីសោភ័ណ ២ក្រុម ២ទីតាំង គឺនៅមន្ទីរពេទ្យបង្អែកក្រុង និងសាលាវិទ្យាល័យសិរីសោភ័ណ ។ ក្រុងប៉ោយប៉ែត ២ក្រុម ២ទីតាំង គឺនៅមន្ទីរពេទ្យបង្អែកក្រុង និងស្ថានីយ៍រថភ្លើងក្រុងប៉ោយប៉ែត ។ ស្រុកព្រះនេត្រព្រះ ២ក្រុម ២ទីតាំង គឺនៅក្នុងមន្ទីរពេទ្យបង្អែកស្រុកព្រះនេត្រព្រះ ។ ស្រុកមង្គលបូរី ២ក្រុម ២ទីតាំង គឺនៅមន្ទីរពេទ្យខេត្ត និងការិយាល័យស្រុកប្រតិបត្តិស្រុកមង្គលបូរី និងបណ្តា៥ស្រុកផ្សេងៗ ១ក្រុម ១ទីតាំង នៅតាមមន្ទីរពេទ្យបង្អែកស្រុក ។ ក្នុងថ្ងៃយុទ្ធនាការចាក់ គឺចាក់ជូនមន្ត្រីរាជការ នៅសេសសល់អាជ្ញាធរដែនដីមូលដ្ឋាន ប្រជាពលរដ្ឋប្រឈម ដូចជាអាជីវករ អ្នករត់តាក់ស៊ី ម៉ូតូឌុប និងប្រជាពលរដ្ឋទូទៅ ៕
ប្រភព៖ អគ្គស្នងការដ្ឋាននគបាលជាតិ
មតិយោបល់