កាលពីថ្ងៃអាទិត្យ ក្រុមមន្ត្រីសន្តិសុខអ៊ីរ៉ាក់បាននិយាយថា គ្រាប់រ៉ុក្កែតចំនួន ០២គ្រាប់បានធ្លាក់នៅក្នុងតំបន់ជនបទមួយនៅជិតមូលដ្ឋានទ័ពអាកាសអ៊ីរ៉ាក់ ដែលជាកន្លែងស្នាក់នៅរបស់អ្នកម៉ៅការមួយចំនួនរបស់សហរដ្ឋអាមេរិក ប៉ុន្តែមិនមានអ្នកស្លាប់ និងរងរបួសទេ។
យោធាអ៊ីរ៉ាក់បាននិយាយថា គ្រាប់រ៉ុក្កែតជាច្រើនបានធ្លាក់នៅលើរបងខាងក្រៅនៃមូលដ្ឋានយោធាអ៊ីរ៉ាក់។
ក្រុមមន្ត្រីសន្តិសុខបាននិយាយថា ការស៊ើបអង្កេតដំបូងបានបង្ហាញថាវាយប្រហារសំដៅទៅលើមូលដ្ឋានទ័ពអាកាស Balad ភាគខាងជើងនៃក្រុងបាកដាដ ប៉ុន្តែគ្រាប់រ៉ុក្កែតជាច្រើនបានធ្លាក់ខុសគោលដៅ ហើយបានធ្លាក់ទៅលើភូមិ al-Bu Asi នៅភាគអាគ្នេយ៍។
ការវាយប្រហារចុងក្រោយទៅលើមូលដ្ឋានទ័ពអាកាស Balad គឺនៅថ្ងៃទី១៥ ខែមីនា នៅពេលដែលគ្រាប់រ៉ុក្កែតយ៉ាងតិចចំនួន ០៥គ្រាប់ បានវាយប្រហារទៅលើមូលដ្ឋាននោះ។
មិនមានក្រុមណាមួយទទួលខុសត្រូវចំពោះការវាយប្រហារនេះភ្លាមៗនោះទេ ប៉ុន្តែមន្ត្រីអ៊ីរ៉ាក់មួយចំនួនបាននិយាយថា ក្រុមប្រដាប់អាវុធទាំងនោះត្រូវបានគាំទ្រដោយអ៊ីរ៉ង់ ដោយបានអះអាងថាមានឧប្បត្តិហេតុស្រដៀងគ្នានេះបានកើតឡើងកាលពីពេលកន្លងមក។
ក្រុមមន្ត្រីសហរដ្ឋអាមេរិកស្តីបន្ទោសកងជីវពលដែលគាំទ្រដោយអ៊ីរ៉ង់ចំពោះការវាយប្រហាររ៉ុក្កែតជាប្រចាំទៅលើទីតាំងរបស់សហរដ្ឋអាមេរិកនៅអ៊ីរ៉ាក់ រួមទាំងនៅក្បែរស្ថានទូតសហរដ្ឋអាមេរិកនៅទីក្រុងបាកដាដផងដែរ ៕
ប្រភព៖ អគ្គស្នងការដ្ឋាននគរបាលជាតិ
មតិយោបល់