ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបញ្ជាក់ថា ដំណើរការចាក់វ៉ាក់សាំងលើក្រុមអាទិភាពនៅទូទាំងប្រទេសបាននិងកំពុងដំណើរការ ប៉ុន្តែបើពិនិត្យស្ថានភាពខាងមុខ ជំហានបន្តគឺត្រូវគ្រប់គ្រង(ការរីករាលដាលនៅ)រាជធានីភ្នំពេញ និងខេត្តកណ្ដាលឱ្យខានតែបាន។ សម្តេចតេជោ បានបន្ថែមថា ចាំបាច់ត្រូវតែមានភាពសាំ នៅរាជធានីភ្នំពេញ និងខេត្តកណ្ដាល ដូច្នេះ ធ្វើផែនការរៀបចំសម្រាប់ចាក់វ៉ាក់សាំងបន្ត នៅពេលវ៉ាក់សាំងថ្មីមកដល់ ត្រូវសំដៅឆ្ពោះទៅលើរាជធានីភ្នំពេញ និងខេត្តកណ្ដាល។
ក្នុងសារជាសំឡេងនោះ សម្ដេចបានចេញបញ្ជាឲ្យរដ្ឋលេខាធិការក្រសួងសុខាភិបាល លោកជំទាវ ឱ វណ្ណឌីន និងឯកឧត្ដម វង្សី វិស្សុទ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ គិតគូររៀបចំផែនការ ដើម្បីចាក់វ៉ាក់សាំងឲ្យប្រជាជនទូទៅនៅក្នុងរាជធានីភ្នំពេញ និងខេត្តកណ្ដាល (ក្នុងចំណុចភូមិសាស្ត្រ ដែលមានរោងចក្រច្រើនដូចជាផ្លូវជាតិលេខ ៣ លេខ ៤ និងលេខ ២ ជាដើម) នៅពេលដែលវ៉ាក់សាំងថ្មីមកដល់កម្ពុជា។
ឆ្លៀតក្នុងឱកាសនោះដែរ សម្ដេចក៏បានលើកឡើងថា នាពេលអនាគតទៅការចាក់វ៉ាក់សាំងកូវីដ-១៩ អាចនឹងក្លាយជាកាតព្វកិច្ច មិនមែនជាការស្ម័គ្រចិត្តដូចឥលូវនោះទេ បានសេចក្ដីថា អ្នកដែលមិនទាន់បានចាក់វ៉ាក់សាំងអាចនឹងប្រឈមមិនទទួលបានការងារធ្វើជាដើម។ យ៉ាងណាមិញ ករណីនេះមិនទាន់អនុវត្តទេ នៅកម្ពុជាយើងក្នុងពេលនេះ។
សូមជម្រាបជូនថា យ៉ាងតិចជិត ៦០ម៉ឺននាក់ទទួលបានវ៉ាក់សាំងកូវីដនៅក្នុងកម្ពុជា ខណៈកម្ពុជាប្រើវ៉ាក់សាំង ៣ប្រភេទគឺ ស៊ីណូវ៉ាក់ ស៊ីណូហ្វាម និងកូវីសែល (របស់ក្របខ័ណ្ឌកូវ៉ាក់)។ វ៉ាក់សាំងស៊ីណូវ៉ាក់ចំនួន ៤លានដូសគ្រោងនឹងត្រូវទិញបន្ថែមនាពេលឆាប់ៗខាងមុខ៕
មតិយោបល់