មណ្ឌលគិរី៖ នាព្រឹកថ្ងៃអង្គារ ១រោច ខែពិសាខ ឆ្នាំឆ្លូវ ត្រីស័ក ព.ស ២៥៦៥ ត្រូវនឹងថ្ងៃទី២៧ ខែមេសា ឆ្នាំ២០២១ លោកឧត្តមសេនីយ៍ត្រី សៅ សាវ៉ាត ស្នងការរងទទួលផែនការងារធនធានមនុស្ស តំណាងដ៏ខ្ពង់ខ្ពស់លោកឧត្តមសេនីយ៍ទោ ឡោ សុខា ស្នងការនគរបាលខេត្ត បានដឹកនាំក្រុមការងារនៃស្នងការដ្ឋាននគរបាលខេត្តមណ្ឌលគិរី អញ្ជេីញចុះជួបសំណេះសំណាលសួរសុខទុក្ខ ដល់កងកម្លាំងនគរបាលដែលកំពុងធ្វើចត្តាឡីស័កត្រង់ចំណុចបិទខ្ទប់ ស្ថិតនៅក្នុងភូមិអូស្ពាន សង្កាត់ស្ពានមានជ័យ ក្រុងសែនមនោរម្យខេត្តមណ្ឌលគិរី។
ស្ថិតក្នុងឱកាសនោះដែរ លោកឧត្តមសេនីយ៍ស្នងការរង បាននាំយកគ្រឿងឧបភោគ បរិភោគនិងថវិកា របស់លោកឧត្តមសេនីយ៍ស្នងការផ្ទាល់ ផ្តល់ជូនដល់កងកម្លាំងនគរបាលដែលកំពុងធ្វើចត្តាឡីស័ករយ:ពេល១៤ថ្ងៃនៅក្នុងផ្ទះ និងបានពាំនាំនូវការសួរសុខទុក្ខពីសំណាក់លោកឧត្តមសេនីយ៍ស្នងការ ដែលជានិច្ចកាលលោកតែងតែគិតគួរនិងយកចិត្តទុកដាក់ដល់កងកម្លាំងដែលជួបទុក្ខលំបាកដូចជាពេលនេះ មិនតែប៉ុណ្ណោះលោកបានផ្តាំផ្ញើដល់មន្រ្តីនគរបាលដែលកំពុងធ្វើចត្តាឡីស័កទាំងអស់ត្រូវខិតខំថែរក្សាសុខភាពឲ្យបានល្អប្រសើរ និងធ្វើអនាម័យជាប្រចាំ ដោយត្រូវចូលរួមអនុវត្តវិធានការរបស់អាជ្ញាធរមូលដ្ឋាន ក្រសួងសុខាភិបាល និងបទបញ្ជារបស់រាជរដ្ឋាភិបាលកម្ពុជា ជាពិសេស វិធានការ ៣ការពារ និង៣កុំ របស់សម្តេចអគ្គមហាសេនាបតីតេជោ ហ៊ុនសែន នាយករដ្ឋមន្រ្តី នៃព្រះរាជាណាចក្រកម្ពុជា ដើម្បីទប់ស្កាត់ និងប្រយុទ្ធប្រឆាំងនឹងជំងឺកូវីដ-១៩។
អំណោយដែលបានប្រគល់សរុបចំនួន ០៧គ្រួសារ, ក្នុងមួយគ្រួសារៗទទួលបាន: អង្ករ ៥០គីឡូក្រាម មី ០១កេស ត្រីខ ០២យួរ ទឹកអាកុល ០២ដប ម៉ាស់ ០២ប្រអប់ និងថវិកាចំនួន ៣០ ម៉ឺនរៀល និងផ្តល់ថវិកាជូនមន្ត្រីនគរបាលដែលយាមគោលដៅចំនួន ៣៣នាក់, ក្នុងម្នាក់ៗទទួលបានថវិកាចំនួន ០២ម៉ឺនរៀល ក្នុងមួយថ្ងៃ រហូតដល់១៤ថ្ងៃ សម្រាប់ជួយសម្រួលដល់ការហូបចុកបានមួយផ្នែកផងដែរ ៕
មតិយោបល់