ឯកឧត្តម អ៊ុំ រាត្រី អភិបាលខេត្តបន្ទាយមានជ័យ អញ្ជើញចុះចែកស្បៀងអាហារ ជូនបងប្អូនប្រជាពលរដ្ឋរស់នៅក្នុងតំបន់បិទខ្ទប់ នាព្រឹកថ្ងៃទី២៩ ខែមេសា ឆ្នាំ២០២១នេះ ចំនួន២០០គ្រួសារ ចំនួន៣ភូមិ គឺភូមិក្បាលស្ពាន១ ៨០គ្រួសារភូមិសាមគ្គីមានជ័យ ចំនួន៦០គ្រួសារ និងភូមិព្រៃព្រិច ៦០គ្រួសារ ។
អំណោយទទួលបានក្នុង១គ្រួសារៗ ទទួលបានអង្ករ២៥គីឡូក្រាម,មី១កេស និងទឹកស៊ីអុីវ ៣ដប ។
ក្នុងឱកាសនោះ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានលើកថា ទោះបីជាយើងទទួលរងគ្រោះនៃការរីករាលនៃជំងឺកូវីដ១៩ ត្រូវបានបិទខ្ទប់មិនអនុញ្ញាត្តិឲ្យចេញចូលពីផ្ទះ ជាការគិតគូររបស់ សម្តេចតេជោ ហ៊ុន សែន នាយករដ្ឋមន្ត្រី និងសម្តេចកិត្តព្រឹទ្ធបណ្ឌិត ប៊ុន រ៉ានី ហ៊ុន សែន សម្តេចទាំងទ្វេ តែងតែគិតគូរជានិច្ចពីសុខទុក្ខលំបាករបស់ប្រជាគ្រប់ពេលវេលា។
ឯកឧត្តម អ៊ុំ រាត្រី អភិបាលខេត្ត អំពាវនាវសូមពុកម៉ែបងប្អូនប្រជាពលរដ្ឋទាំងអស់ មានការយោគយល់ ចូលរួមសហការជាមួយអាជ្ញាធរ កងកម្លាំងមានសមត្ថកិច្ចទាំងអស់ ដើម្បីទប់ស្កាត់ឲ្យបាននូវការរីករាលដាលនៃជំងឺកូវីដ១៩ ដ៍កាចសាហាវនេះ សូមបងប្អូន កុំចេញក្រៅផ្ទះ បេីមិនចាំបាច់ខ្លាំង ។
ជាមួយគ្នានោះ ឯកឧត្តម សូមពុកម៉ែបងប្អូនទាំងអស់ដែលរស់នៅតំបន់បិទខ្ទប សូមចូលរួមធ្វើអនាម័យឲ្យបានគ្រប់ៗគ្នា ត្រូវចូលរួមអនុវត្តឲ្យបាន៣ការពារ និង៣កុំ តាមអនុសាសន៍របស់ប្រមុខរាជរដ្ឋាភិបាល សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ ក្នុងនោះមាន ៖ ៣ការពារ ៣កុំ គឺត្រូវឧស្សាហ៍លាងដៃនឹងសាប៊ូ អាល់កុល ឬជែល កុំទៅចូលក្នុងចំណោមច្រើនកកកុញ កុំចាប់ដៃគ្នា ឬឱបថើបគ្នា កុំចូលទីកន្លែងបិទ គ្មានខ្យល់ចេញចូល និងមិនត្រូវប្រើម៉ាស៊ីនត្រជាក់ច្រើនពេក៕
មតិយោបល់