រដ្ឋាភិបាលកម្ពុជា និងក្រុមហ៊ុនរុករកប្រេងរបស់សិង្ហបុរី «KrisEnergy» កំពុងស្វែងរកទីផ្សារនាំចេញប្រេងដែលផលិតបានដំបូងនៅក្នុងប្លុកA ទៅកាន់ទីផ្សារអន្តរជាតិ ខណៈទិន្នផលបូមប្រេងដំណាក់កាលដំបូងនោះ មិនអាចហុចផលដូចការរំពឹងទុក។ បើទោះជាបែបនេះក្តី ក្រុមហ៊ុនបូមប្រេងមួយនេះ នៅតែបន្តប្រតិបត្តិការខ្លួននៅឡើយ។ នេះបើតាមការអោយដឹងពីអគ្គនាយកនៃអគ្គនាយកដ្ឋានប្រេងកាត ក្រសួងរ៉ែ និងថាមពល តាមរយៈវិទ្យុបារាំង នាថ្ងៃទី១៥ឧសភានេះ។
ក្រុមហ៊ុន «Kris Energy» បានបង្ហាញទិន្នផលប្រេងដំបូងរបស់កម្ពុជាចេញពីអណ្តូងប្រេងទាំង៥ ដែលបានដំណើររួច ដោយគិតចាប់ពីថ្ងៃបញ្ចេញដំណក់ប្រេងដំបូង ដល់ថ្ងៃទី៣០ ខែមីនា ឆ្នាំ២០២១ ជាមធ្យម ក្រុមហ៊ុនបូមប្រេងបានត្រឹម ២ ៤៩៣ ប៉ារ៉ែលក្នុងមួយថ្ងៃប៉ុណ្ណោះ ដែលទាបជាងផែនការដែលចង់បានខ្លាំង ពោលគឺប្រមាណ ៧ ៥០០ ប៉ារែលក្នុងមួយថ្ងៃ។
នៅចំពោះមុខនៃទិន្នផលបូមប្រេងទាបជាងផែនការនេះ ក្រសួងរ៉ែនិងថាមពល និងក្រុមហ៊ុន ក៏កំពុងតែចាត់ចែងរៀបចំផែនការបន្ត សម្រាប់ជំហានបន្តទៀត ដើម្បីអភិវឌ្ឍធនធាននៅតំបន់ប្លុក A ដែលក្រុមហ៊ុនកំពុងដំណើរការបូម។
គួរជ្រាបដែរថា កាលពីថ្ងៃទី២៨មេសាកន្លងទៅ ក្រុមហ៊ុន «KrisEnergy» បានចេញសេចក្តីប្រកាសមួយ បន្ទាប់ពីខ្លួន ក្រោមជំនួយរបស់ក្រុមហ៊ុនហូឡង់ «Sewell & Associates, Inc. (“NSAI”)» បានធ្វើការវិភាគទៅលើទិន្នផលអណ្តូងទាំង ៥នោះឡើងវិញ។ តាមរយៈការវិភាគនោះ បានបង្ហាញថា ប្រតិបត្តិការបូមប្រេងនៅតំបន់អប្សរា ហាក់មិនអាចផ្តល់ទិន្នផលច្រើនដូចការរំពឹងទុកនោះទេ មូលហេតុចម្បងនោះគឺ មកពីលាក់ខណ្ឌនៃតំបន់ភូមិសាស្ត្រក្នុងដែនដីក្រោមសមុទ្រកម្ពុជាដែលមានលក្ខណៈស្មុគ្រស្មាញខ្លាំង។
ប្រភព៖ RFI
មតិយោបល់