(បន្ទាយមានជ័យ)ថ្ងៃទី ២១ ខែឧសភា ឆ្នាំ២០២១ ក្រុមគ្រូពេទ្យជួរមុខ តំបន់ប្រតិបត្តិការសឹករងបន្ទាយមានជ័យបន្តចុះយកសំណាកនៅក្រុងប៉ោយប៉ែត ខេត្តបន្ទាយមានជ័យ និងក្រុមគ្រូពេទ្យមន្ទីរសុខាភិបាលខេត្ត បន្តពន្លឿនការយកសំណាកជូនប្រជាពលរដ្ឋខ្មែរ និងជនបរទេស ជំរុញការកាត់ផ្តាច់ការឆ្លងរីករាលដាលជំងឺកូវីដ-១៩ ។

លោកឧត្តមសេនីយ៍ត្រី ជឹម ប៊ុនអាន មេបញ្ជាការតំបន់ប្រតិបត្តិការ សឹករង បានបញ្ជាក់ថាចាប់តាំង ពីថ្ងៃទី ១២ ខែឧសភា ឆ្នាំ២០២១ មកដល់ថ្ងៃទី២១ នេះគឺកងកម្លាំងយោធិនសុខាភិបាល បំពេញប្រតិបត្តិការ យ៉ាងយកចិត្តទុកដាក់ និងប្រុងប្រយ័ត្នខ្ពស់បំផុត ដែលអនុវត្តន៍តាមបទបញ្ជារបស់ថ្នាក់ដឹកនាំ កងទ័ពតាមឋានានុក្រម និងឣាជ្ញាធរខេត្តបន្ទាយមានជ័យ ដើម្បីធានាបានសុខសុវត្ថិភាពជូនប្រជាពលរដ្ឋ កាត់ផ្តាច់ការឆ្លងរីករាលដាលដែលជាហានិភ័យធ្វើឣោយប៉ះពាល់លើគ្រប់វិស័យ ដល់ជីវភាពរស់នៅប្រចាំថ្ងៃរបស់ប្រជាពលរដ្ឋ និងសង្គមជាតិផងដែរ៕