តើវីរុសកូវីដ១៩ មានប្រភពមកពីណាពិតប្រាកដ តើវាឆ្លងលើមនុស្សយ៉ាងម៉េច និងដោយរបៀបណាទៅ? ទាំងនេះសុទ្ធសឹងជាសំណួរដែលនៅមិនទាន់មានចម្លើយច្បាស់លាស់នៅឡើយទេ។ អ៊ីចឹងហើយបានជានាឱកាសមហាសន្និបាតប្រចាំឆ្នាំលើកទី៧៤ របស់អង្គការសុខភាពពិភពលោក WHO ពេលនេះ មានប្រទេសជាច្រើន ក្នុងនោះមានអាមេរិក អូស្រា្តលី ជប៉ុន ឬព័រទុយហ្កាល់បានស្នើឲ្យ WHO បើកការសិក្សា ស្រាវជ្រាវស៊ីជម្រៅបន្ថែមទៀត។ លោកហ្សេរ៉េមី កូនីឌី អ្នកតំណាងអាមេរិកដែលចូលរួមនៅក្នុងមហាសន្និបាត WHO បានគូសបញ្ជាក់ពីសារ:សំខាន់នៃការមានការស៊ើបអង្កេតដំណាក់ការទី២ រឹងមាំ ពេញលេញ និងដឹកនាំដោយក្រុមអ្នកជំនាញឯករាជ្យ។
លោកហ្សេរ៉េមី កូនីឌីបានយល់ឃើញថា ការសិក្សា ស្រាវជ្រាវនៅក្នុងដំណាក់ការទី២ គួរត្រូវធ្វើឡើងដោយផ្អែកលើវិទ្យាសាស្រ្ត និងឯករាជ្យភាព។ តាមអ្នកតំណាងអាមេរិករូបនេះដដែល គោលដៅនៃការសិក្សា ស្រាវជ្រាវមិនស្វែងរកអ្នកទទួលខុសត្រូវទេ។ តែដើម្បីស្វែងយល់ពីប្រភពដើម និងការចម្លងរបស់វីរុសកូវីដ១៩ ក្នុងការជួយពិភពលោកកុំជួបរឿងនេះជាថ្មីនាពេលខាងមុខ។ ដោយឡែក ក្រុមអ្នកជំនាញបានផ្តល់អនុសាសន៍ឲ្យបន្តការស្រាវជ្រាវលើសម្មតិកម្មសំខាន់ និងលើសេណារីយ៉ូផ្សេងទៀត។ តែសេណារីយ៉ូមួយដែលក្រុមជំនាញយល់ថាមិនគួរចាប់អារម្មណ៍ គឺវីរុសធ្លាយចេញពីមន្ទីរពិសោធន៍ក្រុងវូហាន។
ការលើកឡើងនេះបានបង្កឲ្យមានការភ្ញាក់ផ្អើល និងត្រូវបានអគ្គនាយក WHO លោកទេដ្រូសធ្វើការកែសម្រួលភ្លាមៗដោយធានាថា គ្មានសម្មតិកម្ម និងសេណារីយ៉ូណាមួយត្រូវបានទាត់ចោលទេ។ ទន្ទឹមគ្នានេះ លោកទេដ្រូសឆ្លៀតរិះគន់ចិនពីកង្វះតម្លាភាពក្នុងការបង្ហាញទិន្នន័យ។ ចំណែកប្រធានគណ:ប្រតិភូអ្នកវិទ្យាសាស្រ្តអន្តរជាតិលោក Peter Ben Embarek បានឆ្លើយតបវិញថា នៅចិនក៏ដូចជានៅកន្លែងផ្សេងដែរ មានទិន្នន័យខ្លះមិនអាចចែកចាយបានទេដោយសារត្រូវគោរពសិទ្ធិជីវិតឯកជន។
គួររម្លឹកថា របាយការណ៍ផ្សព្វផ្សាយក្នុងខែមីនារបស់ក្រុមអ្នកជំនាញ WHO ដែលបានចុះទៅស្រាវជ្រាវនៅក្រុងវូហានដោយមានការសហការពីក្រុមអ្នកវិទ្យាសាស្រ្តចិនឲ្យដឹងថា ប្រភពដើមវីរុសកូវីដ១៩ មានពីសត្វប្រចៀវ រួចឆ្លងទៅសត្វមួយទៀត មុននឹងឆ្លងទៅមនុស្ស។ តែគេនៅមិនដឹងច្បាស់ថា តើសត្វមួយទៀតហ្នឹងជាសត្វអ្វីទេ៕
មតិយោបល់