ករណីនេះកេីតឡេីងត្រង់ចំណុចមុខផ្ទះលេខ៣១២ ផ្លូវលំ ក្រុម២ ភូមិសន្សំកុសល៣ សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ កាលពីថ្ងៃទី២៥ ខែឧសភា ឆ្នាំ២០២១ វេលាម៉ោង ០១ម៉៣០នាទីរំលងអាធ្រាត្រ បង្កឡេីងដោយជនសង្ស័យឈ្មោះ កែវ យិនភី ហៅ តួ ភេទប្រុស អាយុ ២៧ឆ្នាំ ជនជាតិខ្មែរ ទីលំនៅផ្ទះលេខ៣៧ ផ្លូវ៤៥BT ភូមិត្នោតជ្រុំ៣ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ មុខរបរ រត់ម៉ូតូកង់បីឥណ្ឌា (មានផ្ទុកសារធាតុញៀន) និងជនសង្ស័យម្នាក់ទៀតឈ្មោះ រ៉េត បញ្ញា ហៅ ម៉ុក ភេទប្រុស អាយុ ២៤ឆ្នាំ ជនជាតិខ្មែរ ទីលំនៅផ្ទះលេខ១១៧ ផ្លូវលំ ក្រុម៤ ភូមិ ៣ សង្កាត់បឹងសាឡាង ខណ្ឌ ទួលគោក រាជធានីភ្នំពេញ មុខរបរកម្មករមើលម៉ូតូនៅផ្សារបឹងទំពន់ មានផ្ទុកសារធាតុញៀន
ជនរងគ្រោះឈ្មោះ ម៉ុក អង្គាររស្មី ភេទប្រុស អាយុ ៣៥ឆ្នាំ ជនជាតិខ្មែរ ទីលំនៅផ្ទះជួល ផ្លូវបេតុង ភូមិសន្សំកុសល៣ សង្កាត់បឹងទំពន់ទី១ ខណ្ឌមានជ័យ រាជធានីភ្នំពេញ មុខរបរមិនពិតប្រាកដ ។
វត្ថុតាងចាប់យក ម៉ូតូកង់បីឥណ្ឌាចំនួន ០១គ្រឿង ពណ៌ស ពាក់ស្លាកលេខ ១IQ-១៨០៨ លេខតួ=MD២A៤៥AY៦KWB៥៨៦០៨ លេខម៉ាស៊ីន=AAWKB០០១២៩ ។
ហេតុការណ៍ ៖ កាលពីថ្ងៃទី ២៥ ខែឧសភា ឆ្នាំ២០២១ វេលាម៉ោង ០១ម៉៣០ នាទីរំលងអាធ្រាត្រ ជនសង្ស័យឈ្មោះ កែវ យិនភី ហៅ តួ ភេទ ប្រុស អាយុ ២៧ ឆ្នាំ និងជនសង្ស័យឈ្មោះ រ៉េត បញ្ញា ហៅ ម៉ុក ភេទ ប្រុស អាយុ ២៤ ឆ្នាំ បានផឹកស្រាបៀរអស់ម្នាក់ចំនួន ០២ កំប៉ុងនៅមុខផ្សារបឹងទំពន់ ពេលផឹករួចក៏បើកម៉ូតូកង់បីឥណ្ឌាចំនួន ០១ គ្រឿង ពណ៌ ស ពាក់ស្លាកលេខ ១IQ-១៨០៨ ឡើងទៅលើផ្លូវ ២៧១ ក៏បានប្រទះឃើញជនរងគ្រោះឈ្មោះ ម៉ុក អង្គាររស្មី ភេទ ប្រុស អាយុ ៣៥ ឆ្នាំ កំពុងជិះម៉ូតូកង់បីខ្មែរ (ធ្លាប់មានទំនាស់គ្នាប្រហែលកន្លះខែមុនជាមួយជនសង្ស័យឈ្មោះ កែវ យិនភី) ហើយជនរងគ្រោះឈ្មោះ ម៉ុក អង្គាររស្មី បានចុះពីលើម៉ូតូកង់បីខ្មែរមកប្រតាយប្រតប់គ្នាទៅវិញទៅមកជាមួយជនសង្ស័យឈ្មោះ កែវ យិនភី ហៅ តួ ខណៈនោះជនរងគ្រោះបានរត់ទៅយកបន្ទះឈើទទឹងប្រវែង ០២តឹក បណ្ដោយប្រវែង ១ម៉ែត្រ មកវាយជនសង្ស័យឈ្មោះ កែវ យិនភី ហៅ តួ ឲ្យរបួសដៃខាងឆ្វេង បន្ទាប់មកជនសង្ស័យឈ្មោះ រ៉េត បញ្ញា ហៅ ម៉ុក បានចូលទៅជួយបក្ខពួកខ្លួន ស្រាប់តែជនរងគ្រោះបានរត់ចេញហើយទៅវាយកញ្ចក់មុខម៉ូតូកង់បីឥណ្ឌារបស់ជនសង្ស័យឈ្មោះ កែវ យិនភី ហៅ តួ បណ្តាលឲ្យបែកខ្ទេច ហើយក៏បានរត់គេចខ្លួន ពេលនោះជនសង្ស័យ ០២ នាក់ ឈ្មោះ កែវ យិនភី ហៅ តួ និងឈ្មោះ រ៉េត បញ្ញា ហៅ ម៉ុក បានបើកម៉ូតូកង់បីឥណ្ឌាដេញតាមពីក្រោយមកដល់នៅចំណុចមុខផ្ទះលេខ ៣១២ ផ្លូវ លំ ក្រុម ២ ភូមិ សន្សំកុសល៣ សង្កាត់ បឹងទំពន់ទី១ ខណ្ឌ មានជ័យ រាជធានីភ្នំពេញ (កន្លែងកើតហេតុ) ក៏បំបុកជនរងគ្រោះឈ្មោះ ម៉ុក អង្គាររស្មី ភេទ ប្រុស អាយុ ៣៥ ឆ្នាំពីខាងក្រោយបណ្ដាលឲ្យដួលដាច់ផ្ងារ និងបានយកដុំថ្មទម្រជើងឆ័ត្រវាយបន្ថែមទៀតបណ្តាលឲ្យស្លាប់) ហើយបានបើកម៉ូតូកង់បីឥណ្ឌានោះរត់គេចខ្លួនបាត់តែម្ដង ។
រហូតមកដល់វេលាម៉ោង ០៩ម៉០០នាទីថ្ងៃទីខែឆ្នាំដដែល កម្លាំងអធិកាដ្ឋានរនគរបាលខណ្ឌមានជ័យ និងកម្លាំងប៉ុស្តិ៍នគរបាលបឹងទំពន់ទី១ បានសហការជាមួយកម្លាំងការិយាល័យព្រហ្មទណ្ឌកម្រិតធ្ងន់ បានចុះធ្វើការស្រាវជ្រាវឃាត់ខ្លួនជនសង្ស័យទាំង ០២ នាក់ឈ្មោះ កែវ យិនភី ហៅ តួ នៅចំណុចផ្លូវ ៤៥BT ភូមិ ត្នោតជ្រុំ៣ សង្កាត់ បឹងទំពន់ទី២ ខណ្ឌ មានជ័យ និងជនសង្ស័យឈ្មោះ រ៉េត បញ្ញា ហៅ ម៉ុក នៅចំណុចមុខផ្សារបឹងទំពន់ ផ្លូវ ៣៣BT ភូមិ សន្សំកុសល៣ សង្កាត់ បឹងទំពន់ទី១ ខណ្ឌ មានជ័យ យកមកទីស្នាក់ការប៉ុស្តិ៍នគរបាលបឹងទំពន់ទី១ ធ្វើការសាកសួរតែម្តង ។
នៅពេលឃាត់ខ្លួនជនសង្ស័យទាំង ០២នាក់ខាងលើ សមត្ថកិច្ចជំនាញបានធ្វើការចាប់យកវត្ថុតាង ៖ ម៉ូតូកង់បីឥណ្ឌាចំនួន ០១ គ្រឿង ពណ៌ស និងដុំថ្មទម្រជើងឆ័ត្រចំនួន ០១ ដុំ ។ ក្នុងពេលនោះឈ្មោះ វ៉ាត ចាន់កេសី ភេទ ស្រី អាយុ ៣៩ ឆ្នាំ (ត្រូវជាមីងរបស់ជនរងគ្រោះ) បានមកដាក់ពាក្យបណ្តឹងនៅស្នាក់ការនគរបាលប៉ុស្តិ៍បឹងទំពន់ទី១ឲ្យសមត្ថកិច្ចចាត់ការតាមច្បាប់ ចំណែកឯសពជនរងគ្រោះឈ្មោះ ម៉ុក អង្គាររស្មី បានប្រគល់ឲ្យក្រុមគ្រួសារ យកទៅធ្វើបុណ្យតាមប្រពៃណីនៅវត្តចាក់អង្រែក្រោម សង្កាត់ ចាក់អង្រែក្រោម ខណ្ឌ មានជ័យ រាជធានីភ្នំពេញ ។
បច្ចុប្បន្នជនសង្ស័យទាំង ០២នាក់ឈ្មោះ កែវ យិនភី ហៅ តួ ភេទ ប្រុស អាយុ ២៧ ឆ្នាំ និងជនសង្ស័យឈ្មោះ រ៉េត បញ្ញា ហៅ ម៉ុក ភេទ ប្រុស អាយុ ២៤ ឆ្នាំ កំពុងឃាត់ខ្លួននៅអធិការដ្ឋាននគរបាលខណ្ឌមានជ័យ ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់ ៕
ប្រភព៖ ស្នងការដ្ឋាននគរបាលរាជធានីភ្នំពេញ
មតិយោបល់