អាជ្ញាធររដ្ឋបង់ហ្កាល់ខាងកើត បានចេញបញ្ជាឲ្យបិទព្រលានយន្តហោះក្រុងកាលគូតា។ ដូចគ្នាដែរ រដ្ឋ អូឌីស្ហា ក៏បានចេញបញ្ជាឲ្យផ្អាកដំណើរការព្រលានយន្តហោះ ក្រុងភូបានេសវ៉ារ។ ក្រុមសង្គ្រោះប្រមាណ៥ពាន់នាក់ ត្រូវបានគេបញ្ជូនឲ្យត្រៀម ដើម្បីជួយប្រជាជន នៅតាមរដ្ឋទាំង២ ដែលជាផ្លូវឆ្លងកាត់របស់ខ្យល់ព្យុះYaas។
សូមរំលឹកថា កាលពីថ្ងៃទី១៧ឧសភា ខ្យល់ព្យុះស៊ីក្លូនមួយទៀត ឈ្មោះTauktae បានបោកបក់លើរដ្ឋគូចារ៉ាត របស់ឥណ្ឌារួចម្តងហើយ ដោយបានផ្តាច់ជីវិត មនុស្សប្រមាណ១៥៥នាក់។ លោក Udaya Regmi មន្ត្រីទទួលបន្ទុកសហភាពអន្តរជាតិកាកបាទក្រហម និងអឌ្ឍចន្ទក្រហម ប្រចាំតំបន់អាស៊ីខាងត្បូង បានលើកឡើងថា ប្រជាជនឥណ្ឌា កំពុងតែរងទុក្ខផ្ទួនៗគ្នា ដោយសារតែបញ្ហាកូវីដ១៩ និងបន្ថែមជាមួយនឹងគ្រោះធម្មជាតិ ខ្យល់ព្យុះសង្ឃរាទាំង២លើកនេះទៀត។
គិតមកត្រឹមពេលនេះ កូវីដ១៩ បានផ្តាច់ជីវិតប្រជាជនឥណ្ឌា ចំនួនប្រមាណ៣១ម៉ឺននាក់។ប្រជាជនឥណ្ឌាជាច្រើន បានរងគ្រោះដោយបាត់បងសមាជិកគ្រួសារ ស្លាប់ដោយសារតែកូវីដ១៩ តែពេលនេះ ពួកគេត្រូវឆ្លងកាត់ ខ្យល់ព្យុះនៅតាមតំបន់ឆ្នេរខាងកើត។ ទីទាំងចាក់វ៉ាក់សាំង និងធ្វើតេស្តយកសំណាកមួយចំនួន នៅក្រុងកាល់គូតា និងក្នុងរដ្ឋបង់ហ្កាល់ខាងកើត ត្រូវបង្ខំចិត្តផ្អាកដំណើរការដោយសារតែខ្យល់ព្យុះ។
យោងតាមអ្នកជំនាញ ខ្យល់ព្យុះដែលមានកម្លាំងខ្លាំង នឹងមានកាន់តែញឹកញាប់ នៅតាមតំបន់ឆ្នេរ ទាំងសងខាងប្រទេសឥណ្ឌា ដែលនេះគឺជាផលវិបាកនៃការកើនឡើងកម្ដៅផែនដី និងកម្ដៅនៃ ទឹកសមុទ្រ។ ឈូងសមុទ្របង់ហ្កាល់ គឺជាតំបន់ប្រឈមរងគ្រោះធ្ងន់ធ្ងរបំផុត ជាក់ស្តែងនៅឆ្នាំ១៩៧០ ព្យុះស៊ីក្លូន បានផ្តាច់ជីវិតមនុស្សប្រមាណ៥សែននាក់ នៅបង់ក្លាដេស។ នៅឆ្នាំ១៩៩៩ ព្យុះស៊ីក្លូនមួយទៀត បានផ្តាច់ជីវិតមនុស្សប្រាមណ១ម៉ឺននាក់ នៅរដ្ឋអូឌីស្ហា របស់ឥណ្ឌា៕
មតិយោបល់