បន្ទាយមានជ័យ: ស្ថានីយ៍ប្រេងឥន្ធន:ចំនួន១០ ទីតាំង ដែលកំពុងប្រតិបត្តិការលក់ចែកចាយ ដល់អតិថិជនក្នុងស្រុកចំនួនបីនៃខេត្ត បន្ទាយមានជ័យ ត្រូវបានមន្ត្រីសាខាកាំកុងត្រូលខេត្ត សហការជាមួយមន្ទីរពាណិជ្ជកម្មខេត្ត ចុះត្រួតពិនិត្យការលក់ ដែលមិនអនុលោមទៅច្បាប់កំណត់ គៃបន្លំបរិមាណ គុណភាព តម្លៃស្តង់ដាបច្ចេកទេស។
ប្រតិបត្តិការត្រួតពិនិត្យនេះធ្វើឡើងពេញមួយថ្ងៃ គឺនៅថ្ងៃទី០៥ ខែធ្នូ ឆ្នាំ២០១៨ ក្រោមការសម្របសម្រួល ពីព្រះរាជអាជ្ញាអមអយ្យការខេត្តបន្ទាយមានជ័យ។
លោក សាន វិជ្ជាសារ៉ាវុធ ប្រធានសាខាកាំកុងត្រូលខេត្ត បានថ្លែងប្រាប់អ្នកសារព័ត៌មានថា ដោយមានការណែនាំពីអគ្គនាយកនៃអគ្គនាយកដ្ឋានកាំកុងត្រូលលើការលក់ប្រេងមិនអនុលោមភាព និងក្រោមការដឹកនាំត្រួតពិនិត្យពីលោក ម៉ក់ ពេជ្ជរុន ប្រធាននាយកដ្ឋានពិសោធន៍កម្លាំងជំនាញ បានធ្វើការពិនិត្យតាមរយ:រថយន្តមន្ទីរពិសោធន៍ចល័តប្រេងឥន្ធន: របស់អគ្គនាយកដ្ឋានកាំកុងត្រូលចំនួន១០កន្លែង ក្នុងស្រុកចំនួនបីជាប់ព្រំដែន ស្រុក អូរជ្រៅ ស្រុកស្វាយចេក និងស្រុកថ្មពួក ឃើញថា មានស្ថានីយ៍តែមួយគត់ ដែលបានអនុលោមតាមច្បាប់ត្រឹមត្រូវ រីឯ០៩ស្ថានីយ៍ផ្សេងទៀត គឺមិនបានអនុលោមតាមច្បាប់កំណត់ទេ លក់ប្រេងបន្លំគុណភាព គៃបន្លំបរិមាណមិនគ្រប់លីត្រនិងតម្លៃទីផ្សារខុសពីការណែនាំរបស់ក្រសួងពាណិជ្ជកម្ម ។
លោកប្រធានសាខាបញ្ជាក់ថាមានស្ថានីយ៍ប្រេងខ្លះកេងបន្លំអតិថិជន រហូតដល់ទៅ៨លីត្រ ក្នុងចំណុះប្រេង១០០លីត្រ និងស្ថានីយ៍ខ្លះកេងបន្លំប្រេង ២-៣រហូតដល់៥លីត្រ ក្នុងចំណុះប្រេង១០០លីត្រ។ លោក សាន វិជ្ជាសារ៉ាវុធ បានបញ្ជាក់បន្ថែមផងដែរថា ក្រោយពីរកឃើញ ការលក់មិនមានភាពត្រឹមត្រូវតាមច្បាប់មន្ត្រីជំនាញបានធ្វើការណែនាំ និងកិច្ចសន្យាលើកទី១ កែសម្រួលឡើងវិញ ធ្វើយ៉ាងណាឲ្យមាននិរន្តភាព និងមានគុណភាពបរិមាណកម្រិតស្តង់ដា។ ហើយបើម្ចាស់ស្ថានីយ៍ទាំងអស់ មន្ត្រីជំនាញរកឃើញថា មិនមានការកែសម្រួលឡើងវិញទេ នោះម្ចាស់ស្ថានីយ៍ ត្រូវប្រឈមជាមួយនឹងការឡើងតុលាការ និងពិន័យជាប្រាក់ពី៥លានរៀលទៅ១០លានរៀល រួមទាំងត្រូវផ្តន្ទាទោសពី១ខែទៅ១ឆ្នាំ៕
មតិយោបល់