លោក កុយ គួង អ្នកនាំពាក្យក្រសួងការបរទេសកម្ពុជា បានឲ្យដឹងថា ក្នុងដំណើរទស្សនកិច្ចមកកាន់តំបន់អាស៊ីអាស៊ីអាគ្នេយ៍ លោកស្រី Wendy Sherman អនុរដ្ឋមន្ត្រីការបរទេសអាមេរិក ឬ មានន័យថាមន្ត្រីជាន់ខ្ពស់ការបរទេសអាមេរិក លំដាប់ទី២ នឹងអញ្ចើញមកកាន់ទីក្រុងភ្នំពេញ នៅថ្ងៃទី ១ខែមិថុនា ដើម្បីជួបសម្តែងការគួរសម ជាមួយលោកនាយករដ្ឋមន្ត្រីហ៊ុន សែន។ បន្ទាប់មក លោកស្រី នឹងជួបពិភាក្សាការងារបន្ថែម ជាមួយលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសកម្ពុជា។
តាមលោក កុយ គួង ខ្លឹមសារនៃជំនួបរវាងមន្ត្រីជាន់ខ្ពស់ការបរទេសអាមេរិក ជាមួយរដ្ឋាភិបាលកម្ពុជា គឺផោ្តតជាសំខាន់លើទំនាក់ទនង និងកិច្ចសហប្រតិតបត្តិការទ្វេភាគីរវាងសហរដ្ឋអាមេរិក និងកម្ពុជា។ កម្ពុជា រំពឹងថា ដំណើរទស្សនកិច្ចរបស់លោកស្រី Sherman ដែលជាស្ត្រីអនុរដ្ឋមន្ត្រីដំបូង ក្នុងរដ្ឋបាលលោកប្រធានាធិបតីអាមេរិកថ្មី ចូ បាយឌិន នឹងធ្វើឲ្យទំនាក់ទំនងទ្វេភាគីរវាងប្រទេសទាំង ២ កាន់តែល្អប្រសើរថែមមួយកម្រិតទៀត។ ប៉ុន្តែអ្នកធ្វើការងារខាងសិទ្ធិមនុស្សនៅកម្ពុជា ចង់ឲ្យលោកស្រី Wendy Sherman លើកយកបញ្ហានយោបាយ និងសិទ្ធិមនុស្ស ទៅនិយាយជាមួយលោកនាយករដ្ឋមន្ត្រីហ៊ុន សែន។
សូមបញ្ជាក់ថា តាមគម្រោងក្នុងដំណើរទស្សនកិច្ចរយ:ពេល ១១ថ្ងៃ ពីថ្ងៃទី២៥ ខែឧសភា ដល់ថ្ងៃទី៤ ខែមិថុនា នៅអឺរុប និងអាស៊ីអាគ្នេយ៍ លោកស្រី Sherman បានទៅបំពេញទស្សនកិច្ចដំបូង ក្នុងទីក្រុងព្រុចសែល ប្រទេសបែលហ្ស៊ិក ដើម្បីពិភាក្សាការងារយុទ្ធាស្ត្ររវាងអាមេរិក និងអឺរុប ទាក់ទងនឹងឥទ្ធិពលរបស់ចិន។ រួចហើយ លោកស្រី បាននិងកំពុងធ្វើដំណើរទៅកាន់ទីក្រុង អង់ការ៉ា និងអ៊ីស្តង់ប៊ុល នៃប្រទេសតួកគី ដើម្បីនិយាយពីបញ្ហាសិទ្ធិមនុស្ស និងការពង្រឹងកម្លាំងទ័ពជាមួយអង្គការណាតូ។
បន្ទាប់មក លោកស្រីនឹងធ្វើដំណើរមកកាន់តំបន់អាស៊ីអាគ្នេយ៍ ដោយផ្តើមដំបូងគឺទៅទីក្រុងហ្សាកាតា ប្រទេសឥណ្ឌូនេស៊ី ដើម្បីពិភាក្សាស្វែងរកដំណោះស្រាយគន្លឹះពីបញ្ហាភូមា និងការពង្រឹងបន្ថែមទំនាក់ទំនងអាមេរិក អាស៊ាន។ រួចហើយទើបលោកស្រី ធ្វើដំណើរមកកាន់រាជធានីភ្នំពេញ នៅថ្ងៃទី ១ខែមិថុនា មុននឹងបន្តដំណើរទៅកាន់ទីក្រុងបាងកក ប្រទេសថៃ ដើម្បីពិភាក្សាដដែលពីបញ្ហាភូមា បញ្ហាតំបន់ទន្លេមេគង្គ និងបញ្ហាផ្សេងទៀត ជាមួយរដ្ឋាភិបាលថៃ៕
មតិយោបល់