កាលពីថ្ងៃអង្គារ ៦រោច ខែ ជេស្ឋ ឆ្នាំឆ្លូវ ត្រីស័ក ពស ២៥៦៥ ត្រូវ និងថ្ងៃទី០១ ខែ មិថុនា ឆ្នាំ ២០២១ វេលាម៉ោង ១១និង ២៣នាទីយប់ មានករណីគ្រោះថ្នាក់ចរាចរណ៍បង្កឡើងដោយរថយន្តមិនស្គាល់ម៉ាកបានបុកមនុស្សដើរថ្មើរជើងច្រាសទិសពីជើងទៅត្បូង នៅចំណុចវត្តពពេចនៅលើផ្លូវលេខ៥៥ ស្ថិតនៅក្នុងភូមិក្របៅជ្រុំឃុំបាក់ចិញ្ចៀន ស្រុកភ្នំក្រវាញ ខេត្តពោធិ៍សាត់ បណ្តាលជនរងគ្រោះស្លាប់នៅហ្នឹងកន្លែង។

យោងតាមរបាយការណ៍របស់ អធិការដ្ឋាននគរបាលស្រុកភ្នំក្រវាញ បានឲ្យដឹងថា ជនរងគ្រោះខាងលើមានឈ្មោះ ឡាយ សុខាន់ភេទប្រុសអាយុ ៣៣ ឆ្នាំរស់នៅក្នុងភូមិក្រូចឆ្មារឃុំលាចស្រុកភ្នំក្រវាញ ខេត្តពោធិ៍សាត់ បានរត់គេចចេញពីមណ្ឌលចត្តាឡីស័ក ដែលមានទីតាំងនៅឃុំបាក់ចិញ្ចៀន រួចដើរតាមបណ្ដោយផ្លូវលេខ ៥៥ ឆ្ពោះទៅទិសខាងត្បូង មកដល់ចំណុចកើតហេតុខាងលើ ត្រូវបានរថយន្តមិនស្គាល់ម៉ាកបានបុកចំពីមុខបណ្ដាលឱ្យជនរងគ្រោះស្លាប់នៅហ្នឹងកន្លែងកើតហេតុ រីឯអ្នកបើកបរបានបើករថយន្តគេចខ្លួនបាត់។

តាមប្រភពដដែលបានបន្តថា ជនរងរូបនេះធ្លាប់ប្រើប្រាស់នូវសារធាតុញៀនផងដែរ។ ចំពោះសាកសពសមត្ថកិច្ច បានប្រគល់ជូនក្រុមគ្រួសារ យកទៅធ្វើបុណ្យតាមប្រពៃណី ៕

ប្រភព៖​ អគ្គស្នងការដ្ឋាននគរបាលជាតិ