ផ្អែកតាមរព័ត៌មានបឋមពីស្នងការដ្ឋាននគរបាលខេត្តស្វាយរៀ បានឲ្យថា នៅថ្ងៃទី ០៤.មិថុនា.២០២១ វេលាម៉ោង ០៨:២០នាទី នៅលើផ្លូវជាតិលេខ១ ចន្លោះគីឡូម៉ែត្រ១៤៨-១៤៩ ស្ថិតក្នុងភូមិជ្រៃធំ សង្កាត់ព្រៃអង្គុញ ក្រុងបាវិត ខេត្តស្វាយរៀង មានករណីគ្រោះថ្នាក់ចរាចរណ៍មួយកើតឡើង ដោយរថយន្ដដឹកដី ម៉ាកហ៊ីយ៉ាន់ដាយ ចំណុះ៥តោន ពណ៌ខៀវ ស្លាកលេខភ្នំពេញ3D- 4459 ធ្វើដំណើរពីលិច ទៅកើត បើកបរដោយឈ្មោះ ឈឿន សុខា ភេទប្រុស អាយុ២៨ឆ្នាំ ជនជាតិខ្មែរ មុខរបរបើកបររថយន្ដ មានទីលំនៅភូមិជៃក្រោម ឃុំរាធ័រ ស្រុកព្រះស្តេច ខេត្តព្រៃវែង ។

មកដល់ចំណុចកើតហេតុ បានវ៉ាជែងរថយន្តមួយទៀត ក៏បានបុកនឹងមន្រ្តីនគរបាលកំពុងឈរជើងលើដងផ្លូវដែលកំពុងបំពេញភារកិច្ចអនុវត្តច្បាប់ចរាចរណ៍ផ្លូវគោក បណ្តាលឲ្យរងរបួសធ្ងន់ បាក់ជើងស្ដាំ ។

– ជនរងគ្រោះ ឈ្មោះ កែម តារា ភេទប្រុស អាយុ៤៣ឆ្នាំ ជនជាតិខ្មែរ តួនាទី អធិការរងទទួលការងារចរាចរណ៍ នៃអធិការដ្ឋាននគរបាលក្រុងបាវិត បានបញ្ជូនមកសង្គ្រោះ នៅមន្ទីរពេទ្យបង្អែកខេត្តស្វាយរៀង ។

*បច្ចុប្បន្នជនបង្ក និងវត្ថុតាងត្រូវបានសមត្ថកិច្ចឃាត់ និងកំពុងកសាងសំនុំរឿងចាត់ការតាមនីតិវិធីច្បាប់ ។