ប្រព័ន្ធផ្សព្វផ្សាយក្នុងស្រុកបានរាយការណ៍ថា ឧបនាយករដ្ឋមន្ត្រីថៃ លោក Prawit Wongsuwon បានណែនាំដល់ក្រសួងសេដ្ឋកិច្ចឌីជីថល និងសង្គម (DES) និងទីភ្នាក់ងារសន្តិសុខឱ្យចាត់វិធានការណ៍ឱ្យបានតឹងរឹងក្នុងការប្រឆាំងនឹងអ្នកដែលផ្សព្វផ្សាយព័ត៌មានក្លែងក្លាយ។
លោក Prawit បានបញ្ជាឱ្យបណ្តាទីភ្នាក់ងាររបស់រដ្ឋដែលរួមមានមជ្ឈមណ្ឌលប្រឆាំងព័ត៌មានក្លែងក្លាយ ប៉ូលិសថៃ ក្រសួងយុត្តិធម៌ និងក្រសួង DES ត្រូវសហការគ្នាដើម្បីឆ្លើយតបយ៉ាងឆាប់រហ័សចំពោះការផ្សព្វផ្សាយព័ត៌មានក្លែងក្លាយនៅលើបណ្តាញផ្សព្វផ្សាយសង្គម ហើយចាត់វិធានការតាមផ្លូវច្បាប់។
លោក Patchasak Patirupanont ជំនួយការអ្នកនាំពាក្យរបស់ឧបនាយករដ្ឋមន្ត្រីបាននិយាយថា ព័ត៌មានក្លែងក្លាយ និងព័ត៌មានមិនពិតបានបង្កភាពច្របូកច្របល់ក្នុងចំណោមសាធារណជនដែលធ្វើឱ្យប៉ះពាល់ដល់ប្រតិបត្តិការគ្រប់គ្រងជំងឺកូវីដ-១៩ របស់រដ្ឋាភិបាលថៃក្នុងកំឡុងពេលដែលកំពុងមានជំងឺរាតត្បាតនេះ។ លោកបាននិយាយថា នាយកដ្ឋានទំនាក់ទំនងសាធារណ:ក៏ត្រូវបានគេប្រាប់ឱ្យផ្សព្វផ្សាយព័ត៌មានត្រឹមត្រូវដល់សាធារណ:ជនផងដែរ។
នាយករដ្ឋមន្ត្រីថៃ លោក ប្រាយុធ ចានអូចា ក៏បានណែនាំដល់ក្រុមប្រឹក្សារដ្ឋដែលជាស្ថាប័នប្រឹក្សាផ្នែកច្បាប់របស់រដ្ឋាភិបាលឱ្យសិក្សាអំពីច្បាប់ និងបទប្បញ្ញត្តិនានា រួមទាំងច្បាប់ទាំងនោះនៅបរទេសផងដែរ ដើម្បីដោះស្រាយបញ្ហានៃការផ្សព្វផ្សាយព័ត៌មានក្លែងក្លាយ។
អ្នកនាំពាក្យរដ្ឋាភិបាលថៃ លោក Anucha Burapachaisri បាននិយាយថា ការរកឃើញរបស់ក្រុមប្រឹក្សានឹងត្រូវបានបង្ហាញទៅគណ:រដ្ឋមន្ត្រី ហើយនឹងត្រូវបានប្រើប្រាស់ដើម្បីកែលម្អច្បាប់នានានៅពេលបច្ចុប្បន្ន៕
មតិយោបល់