នៅព្រឹកថ្ងៃទី១៤ ខែមិថុនា ឆ្នាំ២០២១ វេលាម៉ោង៧:០០ ព្រឹក ក្រុមការងារចាក់វ៉ាក់សាំងទាំងពីរគោលដៅបានដំណើរការចាក់ព្រមគ្នាទៅតាមទីតាំងដែលបានកំណត់យើងបានបែងចែកជាពីរគោលដៅដោយក្រុមការងារគោលដៅទី១ ទទួលភារកិច្ចចាក់នៅ មូលដ្ឋានការពារអាកាស ទួលត្រាច ចាក់ជូនប្រជាពលរដ្ឋនៅភូមិព្រៃទា១ ភូមិព្រៃទា២ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ និងក្រុមគោលដៅទី២ ឈរជើងនៅសាលាបឋមសិក្សាតាំងកសាងខាងត្បូង ទទួលភារកិច្ចចាក់ជូនប្រជាពលរដ្ឋមកពីភូមិទាំង៥ របស់សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ។

ជាបន្តបន្ទាប់យើងបានណែនាំផ្សព្វផ្សាយអំពីគោលការណ៍របស់រាជរដ្ឋាភិបាល និងវិធានការការពាររបស់ក្រសួងសុខាភិបាល ៣ ការពារ ៣កុំ ឲ្យបានខ្ជាប់ខ្ជួន ជាពិសេសទោះបីបងប្អូនបានចាក់វ៉ាក់សាំងរួចហើយក៏ដោយក៏នៅតែបន្តអនុវត្តវិធានការរបស់ក្រសួងសុខាភិបាលដដែល សូមឱ្យរក្សារគម្លាតសង្គម ពាក់ម៉ាស់ឧស្សាហ៍លាងដៃ និងសាប៊ូ បាញ់អាល់កុលសំអាតដៃជានិច្ច។

មានកិច្ចសហការល្អជាមួយអាជ្ញាធរដែនដីគ្រប់លំដាប់ថ្នាក់ ក្នុងការរក្សាសណ្ដាប់ធ្នាប់សន្តិសុខសាធារណៈ និងផ្សព្វផ្សាយឃោសនាព័ត៌មានអំពីសារៈសំខាន់ និងគុណតម្លៃនៃវ៉ាក់សាំង ដើម្បីអោយបងប្អូនប្រជាពលរដ្ឋយើងបានយល់ជ្រួតជ្រាបនឹងមកទទួលយកសេវាវ៉ាក់សាំងទាំងអស់គ្នាដើម្បីបញ្ចប់បញ្ហាកូវីដ-១៩។

ក្នុងនាមកងឯកភាព បញ្ជាការដ្ឋានការពារអាកាស កងទ័ពជើងគោក អាជ្ញាធរដែនដីគ្រប់លំដាប់ថ្នាក់ ក៏ដូចជាក្រុមគ្រួសារកងទ័ព ប្រជាពលរដ្ឋ និយោជិត កម្មករ កម្មការិនីទាំងអស់ សូមគោរពថ្លែងអំណរគុណយ៉ាងខ្ពង់ខ្ពស់ចំពោះ សម្ដេច អគ្គមហាសេនាបតីតេជោ ហ៊ុន សែន ប្រមុខដឹកនាំដ៏ឈ្លាសវៃ ក្នុងកាលៈទេសៈដ៏លំបាកមួយនេះសម្ដេចតែងតែពុះពារគ្រប់ឧបសគ្គស្វះស្វែងរកជំនួយវ៉ាក់សាំងពីជាតិ អន្តរជាតិនឹងទិញវ៉ាក់សាំងមកចាក់ជូន ក្រុមគ្រួសារកងទ័ព កងកម្លាំងប្រដាប់អាវុធ មន្ត្រីរាជការស៊ីវិល និងប្រជាពលរដ្ឋដោយឥតគិតថ្លៃ៕