សារព័ត៌មាន​កីឡា​អ៊ីតាលី​មួយ​បាន​ចុះផ្សាយ​ថា Manchester United នឹង​ផ្តល់​កិច្ចសន្យា ២ឆ្នាំ​ប្រសិន Cristiano Ronaldo សំរេចចិត្ត​ត្រលប់​មកកាន់ Old Trafford វិញ​។

​​កីឡាករ​វ័យ ៣៦​ឆ្នាំ​រូបនេះ​នឹង​ឈានចូល​រដូវ​កាល​ចុងក្រោយ ​នៃ​កិច្ចសន្យា​ជាមួយ​ក្រុម​សេះបង្កង់ Juventus តែ​ត្រូវបាន​គេ​ដឹងថា កីឡាករ​ព័រទុយហ្កាល់​រូបនេះ​ចនឹង​ចាកចេញ​នៅ​រដូវក្តៅ​ខាងមុខ​។ ​​សារព័ត៌មាន​អ៊ីតាលី Gazzetta dello Sport បាន​សរសេរ​ទៀតថា Cristiano Ronaldo កំពុង​ពិចារណា​សំណើ​កិច្ចសន្យា ២ឆ្នាំ​របស់ Manchester United អម​ជាមួយនឹង​ប្រាក់​ឈ្នួល​ជាង ១៧លាន​ផោន​ក្នុង​មួយឆ្នាំ​រឺ ៣៣ម៉ឺន​ផោន​ក្នុង​មួយ​សប្តាហ៍​។

​រំលឹកថា Cristiano Ronaldo ធ្លាប់បាន​ចំណាយពេល ៦ឆ្នាំ​ជាមួយ Manchester United ពី​ឆ្នាំ ២០០៣ ដល់ ២០០៩ ឈ្នះ​ជើងឯក English Premier League ៣លើក, FA Cup ១​លើក, League Cup ២លើក, UEFA Champions League ១លើក និង FIFA Club World Cup ១​លើក​។ ​​ជាមួយ Real Madrid , Ronaldo ឈ្នះ​ពាន La Liga ២លើក, Copa del Rey ២លើក, UEFA Champions League ៤លើក និង FIFA Club World Cup ៣លើក មុន​មកដល់ Juventus ឈ្នះ​ពាន Serie A ២លើក និង Coppa Italia ១លើក​៕