កាលពីថ្ងៃច័ន្ទ ប្រធានាធិបតីប្រទេសរុស្ស៊ីលោក Vladimir Putin និងសមភាគីប្រធានាធិបតីប្រទេសចិនលោក Xi Jinping បានប្រកាសអំពីការបន្តសន្ធិសញ្ញាមិត្តភាព និងកិច្ចសហប្រតិបត្តិការដែលមានអាយុកាល ២០ ឆ្នាំរវាងប្រទេសទាំងពីរ ខណ:ដែលប្រទេសទាំងពីរមានទំនាក់ទំនងមិនសូវល្អជាមួយលោកខាងលិច ។
ថ្លែងទៅកាន់ប្រធានាធិបតីប្រទេសចិនលោក Xi Jinping តាមរយ:ជំនួបតាមប្រព័ន្ធវីដេអូប្រធានាធិបតី ប្រទេសរុស្ស៊ីលោក Putin បាននិយាយថា សន្ធិសញ្ញាមិត្តភាពរវាងប្រទេសចិន និងប្រទេសរុស្ស៊ីដែលបានចុះហត្ថលេខានៅឆ្នាំ ២០០១ បានចែងអំពីការគាំទ្រដល់មហាអំណាចទាំងពីរក្នុងការការពារឯកភាពជាតិ និងបូរណភាពទឹកដី ខណ:ដែលទីក្រុងម៉ូស្គូ និងទីក្រុងប៉េកាំងមានទំនាក់ទំនងមិនសូវល្អជាមួយនឹងបណ្តាប្រទេសលោកខាងលិចលើបញ្ហាជាច្រើន។
វិមានក្រឹមឡាំងបានស្រង់សម្តីប្រធានាធិបតីប្រទេសរុស្ស៊ីលោក Putin ថា “នៅក្នុងពិភពលោកសព្វថ្ងៃនេះ កិច្ចព្រមព្រៀងបែបនេះពិតជាមានសារ:សំខាន់ណាស់ ។ នៅក្នុងបរិបទនៃការកើនឡើងនូវភាពច្របូកច្របល់ខាងភូមិសាស្ត្រនយោបាយ ការរំលាយកិច្ចព្រមព្រៀងនៃការគ្រប់គ្រងអាវុធ និងការកើនឡើងនៃជម្លោះធំៗនៅតំបន់ផ្សេងក្នុងពិភពលោកនោះ ការសហការគ្នារវាងរុស្ស៊ី និងចិនដើរតួនាទីក្នុងការរក្សាស្ថេរភាពក្នុងកិច្ចការពិភពលោក” ។
ប្រធានាធិបតីប្រទេសរុស្ស៊ីលោក Putin បាននិយាយថា កិច្ចព្រមព្រៀងនេះនឹងត្រូវបានបន្តដោយស្វ័យប្រវត្តិក្នុងរយ:ពេលប្រាំឆ្នាំថែមទៀតបន្ទាប់ពីផុតកំណត់នៅខែកុម្ភ:ឆ្នាំ ២០២២ ។
ទំនាក់ទំនងរបស់រុស្ស៊ីជាមួយសហរដ្ឋអាមេរិក និងបណ្តាប្រទេសលោកខាងលិចដទៃទៀតកំពុងស្ថិតក្នុងសភាពតានតឹងនៅក្រោយសង្គ្រាមត្រជាក់ជុំវិញបញ្ហានានាចាប់តាំងពីការបញ្ចូលតំបន់ Crimea ដោយទីក្រុងម៉ូស្គូ រហូតដល់ការចោទប្រកាន់អំពីការជ្រៀតជ្រែករបស់រុស្ស៊ីនៅក្នុងការបោះឆ្នោតអាមេរិក។
នៅដើមខែនេះ ប្រធានាធិបតីប្រទេសរុស្ស៊ីលោក Putin បានបើកកិច្ចប្រជុំកំពូលមួយជាមួយសមភាគីសហរដ្ឋអាមេរិក គឺប្រធានាធិបតីលោក Joe Biden ដែលពួកគេបានសម្រេចចិត្តធ្វើកិច្ចសហប្រតិបត្តិការនៅក្នុងវិស័យមួយចំនួនទោះបីជាទំនាក់ទំនងរវាងប្រទេសទាំងពីរមានភាពតានតឹងក៏ដោយ ៕
មតិយោបល់