វ៉ាក់សាំង Moderna ដែលជាផ្នែកមួយនៃកម្មវិធីផ្តល់ថ្នាំវ៉ាក់សាំង ៨០ លានដំបូងដែលលោកប្រធានាធិបតី ចូ បៃដិន បានសន្យាថានឹងទំនុកបម្រុងនៅទូទាំងពិភពលោក ទំនងជាដឹកបញ្ជូនទៅដល់ប្រទេសវៀតណាមនៅក្នុងសប្តាហ៍នេះ។ នេះបើតាមមន្ត្រីសេតវិមានម្នាក់និយាយក្នុងលក្ខខណ្ឌមិនបញ្ចេញឈ្មោះប្រាប់ទីភ្នាក់ងារសារព័ត៌មាន AFP។
សហរដ្ឋអាមេរិកបានចាប់ផ្តើមសកម្មភាពដឹកបញ្ជូនវ៉ាក់សាំងបង្ការកូវីដ១៩ ទៅតំបន់អាស៊ីអាគ្នេយ៍ហើយ។ ជាក់ស្តែង វ៉ាក់សាំងមួយលានដូសទើបត្រូវបានអាមេរិកបញ្ជូនទៅដល់ប្រទេសម៉ាឡេស៊ីកាលពីថ្ងៃច័ន្ទ ទី៥ កក្កដា ហើយកាលពីសប្តាហ៍មុន សេតវិមានបានប្រកាសចែកចាយវ៉ាក់សាំងចំនួន ៤ លានដូសផ្សេងទៀតទៅដល់ឥណ្ឌូណេស៊ីដែលជាប្រទេសកំពុងរងគ្រោះខ្លាំងពីកូវីដជាងគេបំផុតនៅអាស៊ី។
បណ្តាប្រទេសផ្សេងទៀតដែលនឹងទទួលបានវ៉ាក់សាំងពីអាមេរិកដែរសម្រាប់ជើងដំបូងដែលមានចំនួន ៨០លានដូសនេះ រួមមាន ប្រទេសកម្ពុជា ថៃ ឡាវ ហ្វីលីពីន និងប៉ាពូអាស៊ីនូវែលហ្គីណេ។
វៀតណាមកុម្មុយនិស្តដែលមានព្រំប្រទល់ជាប់នឹងចិន ត្រូវបានគេមើលឃើញថាជាប្រទេសគំរូ ក្នុងការចាត់វិធានការទប់ស្កាត់កូវីដ តាមរយ:ការពិនិត្យតាមដាន និងការចាត់ឲ្យធ្វើចត្តាឡីស័កយ៉ាងម៉ត់ចត់។ រដ្ឋាភិបាលក្រុងហាណូយ បានរាយការណ៍ថា មានអ្នកស្លាប់តែ៩០ នាក់ប៉ុណ្ណោះក្នុងចំណោមអ្នកឆ្លងកូវីដសរុប ២១ ០០០ ករណី។
តែទោះជាបែបនេះក្តី អត្រាចាក់វ៉ាក់សាំងមានកម្រិតទាបខ្លាំងនៅប្រទេសវៀតណាមដែលមានប្រជាជនសុរបប្រមាណ ៩៧ លាននាក់ ហើយប៉ុន្មានសប្តាហ៍ចុងក្រោយនេះ គេសង្កេតឃើញថាការឆ្លងកូវីដបានកើនឡើងយ៉ាងខ្លាំងមកវិញ។
មតិយោបល់