(បរទេស)៖ ជាការពិតណាស់ កាលពីថ្ងៃទី១១ ខែកក្កដា ថ្មីៗនេះមហាសេដ្ឋីអង់គ្លេស លោក Richard Branson ដែលជាស្ថាបនិកក្រុមហ៊ុនអាកាសចរណ៍អាវកាស Virgin Galactic និងមនុស្ស ០៥នាក់ទៀត បានទទួលជោគជ័យ ក្នុងការធ្វើដំណើរទេសចរណ៍ទៅកាន់ទីអវកាសដែលធ្វើឲ្យពិភពលោកមានការភ្ញាក់ផ្អើលយ៉ាងខ្លាំង។ យ៉ាងណាមិញ នៅពេលនេះ មានសេចក្តីរាយការណ៍ថា មានមនុស្សប្រហែលជា ៦០០នាក់ហើយ បានកក់សំបុត្រ ដើម្បីទៅធ្វើដំណើរកំសាន្តទៅទីអវកាស តាមរយៈក្រុមហ៊ុនមួយនេះ ក្នុងចំណោមនោះ ក៏មានតារាល្បីៗលំដាប់ពិភពលោកជាច្រើនផងដែរ។

តាមប្រភពបានឲ្យដឹងថា មានមនុស្សប្រហែលជា ៦០០នាក់រួចទៅហើយ ដែលបានកក់សំបុត្រធ្វើដំណើរទៅកាន់ទីអវកាសរបស់ ក្រុមហ៊ុនអវកាសអាមេរិក-អង់គ្លេស វើជីន ហ្គាឡាទិច (Virgin Galactic) ដោយក្នុងមួយសំបុត្រមានតម្លៃត្រឹមតែ $២៥០,០០០ ប៉ុណ្ណោះ ។

បើតាមតារាងឈ្មោះអ្នកកក់សំបុត្រ ត្រូវបានក្រុមហ៊ុនបានបង្ហាញថា មនុស្ស ៦០០ នាក់នោះ គឺមកពី ៥៨ ប្រទេសខុសៗគ្នា ប៉ុន្ដែក្នុងនោះក៏មានឈ្មោះតារាល្បីៗលំដាប់អន្ដរជាតិផងដែរ ដូចជា Leonardo DiCaprio, Tom Hanks, Brad Pitt, Angelina Jolie, Russell Brand, Lady Gaga, Katy Perry, Justin Bieber, និង Ashton Kutcher ជាដើម

គួរបញ្ជាក់ថា កាលពីថ្ងៃអាទិត្យ ទី១១ ខែកក្កដា ឆ្នាំ២០២១ថ្មីៗនេះ ស្ថាបនិកក្រុមហ៊ុន Virgin Galactic គឺលោកមហាសេដ្ឋី រីឆាដ ប្រ៊ែនសុន (Richard Branson) និងមនុស្ស ០៥នាក់ទៀត បានជិះយន្តហោះអវកាស VSS Unity ទៅកាន់ទីអវកាស ហើយចុះមកដល់ផ្ទៃផែនដីវិញដោយសុវត្ថិភាព ដែលបានធ្វើឲ្យពិភពលោក មានការចាប់អារម្មណ៍យ៉ាងខ្លាំង៕

ប្រភព៖ Business Insider