(ប៉េកាំង)៖ យោធាចិននៅថ្ងៃច័ន្ទ ទី១២ ខែកក្កដានេះបានអះអាងថា ខ្លួនបានបណ្តេញនាវាចម្បាំងអាមេរិកមួយគ្រឿង ឲ្យចេញពីតំបន់ដែនទឹកនៅក្បែរប្រជុំកោះ Paracel Islands ក្នុងតំបន់ជម្លោះសមុទ្រចិនខាងត្បូង។

បើតាមយោធាចិន នាវាចម្បាំងអាមេរិក USS Benfold បានបំពានចូលទៅកាន់ដែនទឹកក្បែរប្រជុំកោះ Paracel ដោយខុសច្បាប់ និងបំពានលើដែនអធិបតេយ្យភាពរបស់ចិន ព្រមទាំងបំផ្លាញដល់ស្ថិរភាពសមុទ្រចិនខាងត្បូង។ យោធាចិន ក៏បានអំពាវនាវផងដែរឲ្យសហរដ្ឋអាមេរិក បញ្ឈប់ជាបន្ទាន់ នូវសកម្មភាពបង្ករឿងរបៀបនេះ។

ក៏ប៉ុន្តែ យោធាអាមេរិកបាននិយាយថានាវាចម្បាំង USS Benfold បានធ្វើដំណើរតែក្នុងតំបន់ដែនទឹកអន្តរជាតិប៉ុណ្ណោះ ហើយនឹងបន្តធ្វើដំណើរទៅកាន់គ្រប់ទីកន្លែងដែល ច្បាប់អន្តរជាតិអនុញ្ញាតដើម្បីបង្ហាញពីសេរីភាពនៃការធ្វើនាវាចរ៕