Post News Media ព័ត៌មានជាតិ រដ្ឋបាលរាជធាន...

រដ្ឋបាលរាជធានីភ្នំពេញបើកការដ្ឋានស្ថាបនាកំណាត់ផ្លូវជាតិលេខ៥ ចាប់ពីមុខរោងចក្រ SKD ដល់មុខឃ្លាំងសាំង ប្រវែង២គីឡូម៉ែត្រ

ភ្នំពេញ: កំណាត់ផ្លូវជាតិលេខ៥ ចាប់ពីមុខរោងចក្រ SKD ដល់ PK2+000 ឃ្លាំងសាំងប្រវែង​២គីឡូម៉ែត្រ ត្រូវបានរដ្ឋបាលរាជធានីភ្នំពេញបើកការដ្ឋានស្ថាបនាជាផ្លូវការហើយ នាព្រឹកថ្ងៃទី៣ ខែកញ្ញា ឆ្នាំ​២០១៦​​នេះ ដើម្បីសម្រួលដល់ការធ្វើដំណើររបស់ប្រជាពលរដ្ឋ ។នេះជាការចាប់ផ្តើមដំណាក់ការទី១ ក្នុងចម្ងាយផ្លូវ​ប្រវែងជាង១១គីឡូម៉ែត្រ ។

លោកប៉ា សុជាតិវង្ស មានប្រសាសន៍ថា យើងបានកសាងផ្លូវច្រើនណាស់ ដោយសារផ្លូវជាសសៃឈាម​សេដ្ឋ​កិច្ចជាតិ។ ជាក់ស្តែងសម្រាប់ផ្លូវជាតិលេខ៥នេះ គឺជាផ្លូវដែលសំខាន់មួយក្នុងចំណោមផ្លូវជាតិជាច្រើនទៀត ជាផ្លូវ​ដែល​ដឹកអង្ករចេញយ៉ាងធំផងដែរ។

លោកបន្តថា ទន្ទឹមនឹងការកសាងផ្លូវឲ្យស្អាតនេះវាបានបង្ករឲ្យមានគ្រោះថ្នាក់ចរាចរណ៍រាល់ថ្ងៃផងដែរ ។លោកថា មកដល់ពេលនេះ គ្រោះថ្នាក់ដោយគ្រាប់មីន ជំងឺអេដស៍មិនមែនជាបញ្ហាខ្លាំងក្លានោះទេ តែអ្វីដែលមានការព្រួយ​បារម្ភនោះ គឺគ្រោះថ្នាក់ចរាចរណ៍នេះតែម្តង ដោយក្នុងមួយថ្ងៃគ្រោះថ្នាក់ចរាចរណ៍នេះបានសម្លាប់​មនុស្សពី៤​នាក់​ទៅ៦នាក់។ ដោយមូលហេតុនេះហើយទើបរាជរដ្ឋាភិបាលបង្កើតឲ្យមានច្បាប់ចរាចរណ៍ថ្មីឡើង ដើម្បីធ្វើយ៉ាងណា​កាត់បន្ថយអត្រាគ្រោះថ្នាក់ចរាចរណ៍នេះឲ្យមានកម្រិតទាប។

លោកបន្តថា ក្រោយឆ្នាំ១៩៧៩ប្រទេសជាតិយើងចេញពីចំណុចសូន្យ ប៉ុន្តែប៉ុន្មានឆ្នាំចុងក្រោយនេះ ដោយសារ​ប្រទេសជាតិមានសុខសន្តិភាព នោះបានធ្វើឲ្យប្រទេសយើងមានការរីកចម្រើនយ៉ាងឆាប់រហ័ស យើងមានអ្វីគ្រប់​បែបយ៉ាងមកដល់ពេលនេះ គឺផ្តើមចេញការដឹកនាំដ៏ត្រឹមត្រូវរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជាប្រមុខដឹកនាំ។

លោកសាំ ពិសិដ្ឋ នាយកប្រធានមន្ទីរសាធារណការនិងដឹកជញ្ជូនរាជធានីភ្នំពេញ បានលើកឡើងថា ការដ្ឋានស្ថា​បនាកំណាត់ផ្លូវជាតិលេខ៥ ចាប់ពីមុខរោងចក្រ SKD ដល់ PK2+000 ឃ្លាំងសាំងនេះមានទំហំ២២ម៉ែត្រ ដោយក្នុង​នោះ ធ្វើការចាក់បេតុងសរសៃដែក ទំហំ ២,៥ម៉ែត្រ សងខាងកំរាស់ ២០សង់ទីម៉ែត្រ និងចាក់អ៊ុតកៅស៊ូ AC ៥​សង់ទីម៉ែត្រ លើតួផ្លូវចាស់ ទំហំ១៤,៥ម៉ែត្រ និងសាច់ផ្លូវថ្មីកំរាស់១០សង់ទីម៉ែត្រ ស្ថាបនាសួន​កណ្តាល​ទំហំ២​,​៥​ម៉ែត្រ តម្លើងបង្គោលភ្លើងព្រែកជា២ ព្រមទាំងដាក់លូទំហំ១,៥ម៉ែត្រ ប្រវែង២.០០០ម៉ែត្រ និងដាក់លូកាត់ទទឹង​ផ្លូវ​០,៦ម៉ែត្រ ចំនួនទីតាំង ស្ថិតក្នុងខណ្ឌឬស្សីកែវ ។

លោកបន្តថា កំណាត់ផ្លូវជាតិលេខ៥ នេះ ធ្លាប់ធ្វើការពង្រីកច្រើនលើកច្រើនសារមកហើយ ដើម្បីបំពេញទៅតាម​ត​ម្រូវ​​ការ​របស់កំណើនយានយន្ត ប៉ុន្តែប៉ុន្មានឆ្នាំចុងក្រោយនេះ រាជធានីភ្នំពេញបានពង្រីកទំហំទៅទិសខាងជើង ដែល​ពោរ​ពេញទៅដោយលំនៅដ្ឋាន និងហេដ្ឋារចនាសម្ព័ន្ធ ដែលធ្វើឲ្យយានយន្តមានកំណើនយ៉ាងខ្លាំងនោះ ធ្វើឲ្យច្រកត​ភ្ជាប់រាជធានីភ្នំពេញដ៏សំខាន់មួយ ពុំអាចធានានូវលំហូចរាចរណ៍ចេញចូលបានតទៅទៀត ដែលទាមទារធ្វើការ​ពង្រីកឲ្យបានល្អ។

ការស្ថាបនាពង្រីកកំណាត់ផ្លូវនេះ គឺជាយុទ្ធសាស្រ្តដ៏សំខាន់ក្នុងដោះស្រាយការកកស្ទះចរាចរ ចំពោះផ្លូវតភ្ជាប់ចូល​រាជធានីភ្នពេញ ដែលជាច្រកផ្លូវយុទ្ធសាស្រ្តដ៏សំខាន់តែមួយគត់ ក្នុងការតភ្ជាប់រាជធានីភ្នំពេញ ទៅបណ្តារខេត្តមួយ​ចំនួន ព្រមទាំងជួយកាត់បន្ថយអត្រាគ្រោះថ្នាក់ចរាចរណ៍ ឲ្យកាន់តែល្អប្រសើរថែមទៀត ស្រមតាមកំណើនប្រជា​ពល​រដ្ឋ និងកំណើនយានយន្តពេលបច្ចុប្បន្ននេះ និងដើម្បីចូលរួមចំណែកអនុវត្តឲ្យបានជោគជ័យ​នូវយុទ្ធ​សាស្រ្ត​ចតុកោណ របស់រាជរដ្ឋាភិបាល ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជា​ណា​ចក្រកម្ពុជា៕

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ

ស្ថាបនាផ្លូវ