ប្រតិភូអូឡាំពិកកម្ពុជា ដឹកនាំដោយឯកឧត្តម វ៉ាត់ ចម្រើន អគ្គលេខាធិការគណ:កម្មាធិការជាតិអូឡាំពិកកម្ពុជា ព្រឹកនេះចាកចេញទៅកាន់ទីក្រុងតូក្យូ ប្រទេសជប៉ុនចូលរួមប្រកួតអូឡាំពិក២០២០ ដែលដំណើរការពីថ្ងៃទី២៣ ខែកក្កដា ដល់ថ្ងៃទី៨ ខែសីហា។
ដោយត្រូវដូរជើងយន្តហោះនៅប្រទេសសិង្ហបុរី តាមការគ្រោងទុកប្រតិភូកីឡាកម្ពុជា នឹងធ្វើដំណើរដល់ប្រទេសជប៉ុនវេលាម៉ោងជាង៩យប់(ម៉ោងនៅជប៉ុន)។ កម្ពុជាមានតែកីឡាហែលទឹក និងអត្តពលកម្មប៉ុណ្ណោះចូលរួមព្រឹត្តិការណ៍នេះ។
ឯកឧត្តម វ៉ាត់ ចម្រើន បានថ្លែងប្រាប់អ្នកសារព័ត៌មានមុនចាកចេញពីមាតុភូមិថា បេសកកម្មនេះ គឺជាមោទនភាពរបស់ប្រតិភូ និងកីឡាករ-កីឡាការិនី ដែលត្រូវបានជ្រើសរើសចូលរួមព្រឹត្តិការណ៍ពិភពលោក ៤ឆ្នាំម្ដងនេះ ពិសេសឯកឧត្តមបានថ្លែងអំណរគុណជាថ្មី ចំពោះឯកឧត្តមបណ្ឌិត ថោង ខុន ប្រធានគណ:កម្មាធិការជាតិអូឡាំពិកកម្ពុជា ក៏ដូចជាឯកឧត្តម អ៊ុក សិទ្ធិជាតិ ដែលបានរៀបចំកម្មវិធីជួបសំណេះសំណាល ជូនដំណើរ និងលើកទឹកចិត្តដល់ប្រតិភូ និងអត្តពលិកកម្ពុជា កាលពីម្សិលមិញ ។
ឯកឧត្តមនាយកបេសកកម្មបានមានប្រសាសន៍ថា «អ្វីដែលយើងទាំងអស់គ្នា មានមោទនភាព គឺបេសកកម្មលើកនេះ ខុសពីលើកមុនៗ បើទោះបីមានការបារម្ភពីក្រុមគ្រួសារ ឬមិត្តភ័ក្ដ្រក៏ដោយ តែក្រុមរបស់យើង នៅតែមានឆន្ទ:មោះមុតក្នុងការចូលរួម ហើយត្រូវតែចូលរួមឲ្យបាន ដើម្បីតំណាងឲ្យព្រះរាជាណាចក្រកម្ពុជា តំណាងទង់ជាតិរបស់យើង ក្នុងពិធីបើកអូឡាំពិក ៤ឆ្នាំម្ដង ដែលយើងជាសមាជិក យើងមិនអាចលះបង់ការចូលរួមរបស់យើងបានឡើយ ។
យើងដឹងហើយថា កម្ពុជាយើងបានចូលជាសមាជិកគណ:កម្មាធិការជាតិអូឡាំពិកឡើងវិញ បន្ទាប់ពីថ្ងៃរំដោះ ៧មករាមក គឺនៅឆ្នាំ១៩៩៤ ហើយយើងបានចូលរួមការប្រកួតកីឡាអូឡាំពិក ក្រោយពីសង្គ្រាមស៊ីវិល គឺនៅឆ្នាំ១៩៩៦ ចឹងតាំងឆ្នាំ១៩៧២ រហូតដល់ឆ្នាំ១៩៩៦ ក្នុងរង្វង់នៃប្រទេសមានសង្គ្រាម យើងមិនបានចូលរួមទេ តែឥលូវនេះ គឺប្រទេសមានសុខសន្ដិភាពពេញលេញ ហើយប្រទេសជាតិក៏មានការរីកចម្រើន ចឹងហើយយើងទាំងអស់គ្នា ត្រូវតែថែរក្សាការចូលរួមក្នុងនាមសមាជិកភាព និងជាកាតព្វកិច្ចរបស់យើងឲ្យបានជារៀងរាល់ឆ្នាំ បើទោះបីមានបញ្ហាកើតក្នុងការរៀបចំអូឡាំពិកក៏ដោយ ក៏យើងត្រូវតែចូលរួមដែរ ព្រោះយើងទាំងអស់គ្នា មានស្មារតីអូឡាំពិកនៅក្នុងបេះដូងយើងទាំងអស់គ្នា
មតិយោបល់