CAMSOC-ភ្នំពេញ៖ គិតត្រឹមម៉ោង១០ និង៣០នាទីព្រឹកថ្ងៃពុធ ទី២៨ ខែកក្កដា ឆ្នាំ២០២១ ម្ចាស់ផ្ទះជប៉ុន ដណ្តើមបានមេដាយមាសកើនដល់១០គ្រឿង ដែលចំនួនច្រើនជាងគេនេះ បានធ្វើឲ្យម្ចាស់ផ្ទះអូឡាំពិកហ្គេមមួយនេះ ឡើងមកក្តោបក្តាប់លើកំពូលតារាងមេដាយជាបណ្តោះអាសន្នវិញ នៅក្នុងព្រឹត្តិការណ៍ Tokyo Olympics 2020 ខណៈចិន និងសហរដ្ឋអារិក កំពុងប្រជែងគ្នាទៅវិញទៅមកយ៉ាងខ្លាំង លើកំពូលតារាងមេដាយ ពីចំណាត់ថ្នាក់លេខ១ដល់លេខ៣។
ជប៉ុន ដែលជាម្ចាស់ផ្ទះកីឡាអូឡាំពិក រដូវក្តៅលើកទី២នេះ បានឈ្នះមេដាយសរុប១៨គ្រឿង ដោយក្នុងនោះ មាស១០ ប្រាក់៣ និងសំរឹទ្ធ៥គ្រឿង តាមពីក្រោយដោយអាមេរិក ឈ្នះបាន២៥គ្រឿង ក្នុងនោះ មាស៩ ប្រាក់៨ និងសំរឹទ្ធ៨ នៅពេលចិន ឈរនៅលេខ៣ មានមេដាយមាស៩ ប្រាក់៥ និងសំរិទ្ធ៧ សរុប២១គ្រឿង។
សូមបញ្ជាក់ថា ម្ចាស់ផ្ទះជប៉ុន មានកីឡាករ-កីឡាការិនីប្រកួតប្រជែងមេដាយ ៥៥២នាក់ ច្រើនជាងគេ ដោយឈរនៅលំដាប់ទី២ បន្ទាប់ពីអាមេរិកដែលបញ្ជូនមក ៦១៣នាក់។ រីឯប្រទេសអូស្រ្តាលី ឈរនៅលេខ៣ ក្នុងការបញ្ជូនអត្តពលិកមក ៤៧៨នាក់ និងចិន ៤០៦នាក់។ ការប្រកួតប្រជែងមេដាយកំពុងត្រូវបានធ្វើឡើងយ៉ាងស្វិតស្វាញជារៀងរាល់ថ្ងៃ ដោយពុំទាន់មានប្រភេទកីឡាណាមួយបានបញ្ចប់នៅឡើយទេ ក្នុងចំណោម ៣៣ប្រភេទកីឡា ចែកចេញជា ៣៣៩វិញ្ញាសាសរុប ដែលមានអត្តពលិកសរុប ១១,៣២៦នាក់ មកពី ២០៥ប្រទេសចូលរួមនៅ Tokyo Olympics 2020 លើកទី៣២។ ដោយឡែក កម្ពុជាបានបញ្ជូនទៅអត្តពលិករបស់ខ្លួន ៣នាក់ផងដែរ លើ ២ប្រភេទកីឡា គឺកីឡាហែលទឹក និងអត្តពលកម្ម ដែលកំពុងបង្កើនការហ្វឹកហាត់ជាមួយអត្តពលិកចម្រុះជាតិសាសន៍ ដើម្បីត្រៀមចូលរួមប្រកួត នាថ្ងៃទី៣០ និងថ្ងៃទី៣១ ខែកក្កដា ឆ្នាំ២០២១៕
មតិយោបល់