ប្រទេសចិនបានដាក់ចេញនូវការរឹតត្បិតទៅលើការធ្វើដំណើរទ្រង់ទ្រាយធំ ដែលរួមទាំងការបិទអាកាសយានដ្ឋាននានាជាបណ្តោះអាសន្ន និងការជូនដំណឹងអំពីការធ្វើដំណើរសម្រាប់ប្រជាពលរដ្ឋទៅកាន់កន្លែងផ្សេងៗនៅទូទាំងប្រទេសដើម្បីទប់ស្កាត់ការរីករាលដាលនៃទម្រង់វីរុសឌែលតា។

តំបន់ថ្នាក់ខេត្តទាំង ៣១ នៅក្នុងប្រទេសចិនដីគោក បានអំពាវនាវឱ្យប្រជាពលរដ្ឋកុំធ្វើដំណើរទៅតំបន់ដែលមានហានិភ័យមធ្យម និងខ្ពស់ចំពោះជំងឺកូវីដ-១៩ ឬចាកចេញពីខេត្តដែលពួកគេរស់នៅលុះត្រាតែមានការចាំបាច់។

លោក Cui Wei មន្រ្តីមួយរូបនៃក្រុមហ៊ុន China Railway Beijing Group Co. Ltd បាននិយាយថា ស្ថានីយ៍រថភ្លើងចំនួន ២៣ បានបញ្ឈប់ការលក់សំបុត្រសម្រាប់អ្នកដំណើរដែលនៅជាប់ព្រំដែនទីក្រុងប៉េកាំងដែលត្រូវធ្វើដំណើរចេញពីស្ថានីយទាំងនេះ។

រដ្ឋធានីរបស់ប្រទេសចិននេះបានផ្អាកដំណើរការខ្សែរថភ្លើងចំនួន ១៣គូទៅកាន់ទីក្រុងណានជីង និងយ៉ាងចូវក្នុងខេត្តជាំងស៊ូ ទៅកាន់ទីក្រុងចេងចូវក្នុងខេត្តហឺណាន និងទៅកាន់ទីក្រុងចាងជៀជីនៅក្នុងខេត្តហ៊ូណាន។

យោងតាមសារាចរដែលចេញដោយក្រសួងវប្បធម៌ និងទេសចរណ៍កាលពីថ្ងៃអង្គារបានឱ្យដឹងថា បណ្តាទីភ្នាក់ងារទេសចរណ៍តាមប្រព័ន្ធអនឡាញ និងក្រៅប្រព័ន្ធអនឡាញ គួរតែតាមដានព័ត៌មានអំពីការរីករាលដាលនៃតំបន់គោលដៅ និងមិនត្រូវបញ្ជូនក្រុមទេសចរណ៍ចូលទៅ ឬទទួលក្រុមទេសចរណ៍ពីតំបន់ដែលមានហានិភ័យខ្ពស់ពីជំងឺកូវីដ-១៩ នោះទេ។

ជើងហោះហើរទាំងអស់នៅអាកាសយានដ្ឋាននៅទីក្រុងណានជីងនៃរដ្ឋធានីជាំងស៊ូ និងទីក្រុងយ៉ាងចូវត្រូវបានផ្អាក។ ស្ថានីយ៍រថយន្តក្រុងចម្ងាយឆ្ងាយចំនួន ៩ នៅទីក្រុងណានជីង និងសេវាកម្មរថយន្តក្រុងសាធារណៈនៅទីក្រុងយ៉ាងចូវក៏ត្រូវបានផ្អាកដែរ៕