ដំណឹងដែលថា លោក មូយីដឌីន យ៉ាស៊ីន (Muhyiddin Yassin) នឹងសុំឈប់ពីតំណែងនាយករដ្ឋមន្ត្រីម៉ាឡេស៊ី គឺទម្លាយឲ្យដឹងពីមាត់របស់សមាជិករដ្ឋាភិបាល និងជារដ្ឋមន្ត្រីទទួលបន្ទុកបេសកម្មពិសេស Mohamad Redzuan Yusof ហើយព័ត៌មាននេះ ត្រូវផ្តល់ដំណឹងជម្រាបជូនសមាជិកសភាដែលជាប់ឆ្នោត នៅក្នុងបក្សរបស់លោក រួចហើយ។
ប្រភពពីរដ្ឋមន្ត្រីដដែល បានឲ្យដឹងថា នាយករដ្ឋមន្ត្រីបានព្យាយាមទាក់ទាញចិត្តនិងពន្យល់អ្នកតំណាងរាស្ត្រ ពីបក្សផ្សេងៗដែរ ដើម្បីគាំទ្របេក្ខភាពរដ្ឋាភិបាលរបស់លោក ក៏ប៉ុន្តែ អ្នកតំណាងរាស្ត្របក្សផ្សេងៗ បញ្ជាក់ថា បក្សរបស់លោក គ្មានសមាជិកសភា គ្រប់គ្រាន់ឡើយ។
ជាក់ស្តែង នៅថ្ងៃសុក្រ នាយករដ្ឋមន្ត្រីបានគៀងគរសំឡេងគាំទ្រពីគណបក្សទំនាស់ ដោយសន្យាធ្វើកំណែទម្រង់ផ្សេងៗយ៉ាងច្រើន ជាថ្នូរ។ ក៏ប៉ុន្តែ ការសន្យានេះ ប្រហែលមិនទទួលការផ្តល់ទំនុកចិត្តទេ។
សម្ព័ន្ធក្រុមដែលប្រឆាំងនឹងនាយកមន្ត្រី មាំមួនពេក នោះគឺអតីតនាយករដ្ឋមន្ត្រី Mahathir Mohamad និងមេប្រឆាំងក៏លិចធ្លោ Anwar Ibrahim។ អ្នកនយោបាយទាំងពីរ តាមពិតទៅ ជាអតីតសត្រូវនឹងគ្នា។ កាលពីអំលុងទសវត្សរ៍១៩៩០ ពេលជាប្រមុខរដ្ឋាភិបាល លោក Mahathir Mohamad បានបណ្តេញលោក Anwar Ibrahim ពីគណ:រដ្ឋមន្ត្រី ហើយលោក Anwar Ibrahim ក៏ត្រូវជាប់បទចោទប្រកាន់ពីរឿងអាស្រូវផ្លូវភេទនិងពុករលួយរំលោភអំណាច ហើយត្រូវចាប់ដាក់គុក។ ក៏ប៉ុន្តែ ប្រមាណជិត៣០ឆ្នាំក្រោយ អ្នកទាំងពីរនេះ បានផ្សះផ្សាគ្នានៅឆ្នាំ២០១៨ ហើយ បានពួតដៃគ្នា ដើម្បីទម្លាក់នាយករដ្ឋមន្ត្រីបច្ចុប្បន្ន។ ជាច្រើនសប្តាហ៍មកហើយ អ្នកទាំងពីរបានទាមទារឲ្យនាយករដ្ឋមន្ត្រី លោក មូយីដឌីន យ៉ាស៊ីន ចុះពីតំណែង ស្របតាមសម្រែកទាមទាររបស់បាតុករម៉ាឡេស៊ីដែរ។
តាំងពីដើមខែសីហាម្ល៉េះ ដែល រដ្ឋសភាម៉ាឡេស៊ី ត្រូវបើកអង្គប្រជុំសម្រេចករណីរឿងប្រមុខរដ្ឋាភិបាល តែត្រូវខកខានព្រោះមានផ្ទុះមេរោគកូវីដនៅក្នុងសភា និងត្រូវលើកពេលរហូតមកទល់ពេលនេះ៕
មតិយោបល់