(Reuters) - ក្រុមតាលីបង់បានអំពាវនាវឲ្យមេដឹកនាំសាសនារបស់ប្រទេសអាហ្វហ្គានីស្ថានជំរុញឲ្យមានការរួបរួមគ្នា នៅពេលដែលពួកគេប្រារព្ធពិធីថ្វាយបង្គំថ្ងៃសុក្រ ជាលើកដំបូងរបស់ពួកគេបន្ទាប់ពីក្រុមអ៊ិស្លាមនិយមនេះដណ្តើមប្រទេសបាន ខណៈការតវ៉ាប្រឆាំងនឹងការកាន់កាប់បានរាលដាលដល់ទីក្រុងជាច្រើនរួមទាំងរដ្ឋធានី Kabul កាលពីថ្ងៃព្រហស្បតិ៍។
សាក្សីម្នាក់បាននិយាយថា មនុស្សជាច្រើនបានស្លាប់នៅពេលដែលក្រុមសកម្មប្រយុទ្ធតាលីបង់បានបាញ់ទៅលើក្រុមមនុស្សនៅទីក្រុង Asadabad ភាគខាងកើត។ សាក្សីម្នាក់ទៀតបានរាយការណ៍ថាមាន ការបាញ់កាំភ្លើងនៅជិតកន្លែងធ្វើបាតុកម្មមួយក្នុងទីក្រុង Kabul ប៉ុន្តែការបាញ់នោះហាក់ដូចជាក្រុមតាលីបង់កំពុងបាញ់ទៅលើអាកាស។
នៅថ្ងៃដែលអាហ្វហ្គានីស្ថានរំលឹកទិវាឯករាជ្យជាតិរបស់ខ្លួនចេញពីក្រោមការត្រួតត្រារបស់ចក្រភពអង់គ្លេសកាលពីឆ្នាំ ១៩១៩ មានវីដេអូមួយបានផ្សព្វផ្សាយតាមបណ្តាញសង្គម ដោយបានបង្ហាញក្រុមប្រជាជនមានប្រុស ស្រីនៅទីក្រុង Kabul គ្រវីទង់ជាតិពណ៍ខ្មៅ ក្រហម និងបៃតង។ ដោយពួកគេបានស្រែកថា “ទង់ជាតិរបស់យើង អត្តសញ្ញាណរបស់យើង” ។
រីឯការតវ៉ាខ្លះនៅកន្លែងផ្សេងទៀត ប្រព័ន្ធផ្សព្វផ្សាយបានរាយការណ៍ថា ប្រជាជនបានបំផ្លាញទង់ពណ៍សរបស់ក្រុមតាលីបង់។
ប៉ុន្តែមិនអាចសុំការអត្ថាធិប្បាយពីអ្នកនាំពាក្យក្រុមតាលីបង់បានភ្លាមៗទេ។
ការធ្វើបាតុកម្មខ្លះមានលក្ខណៈតូចតាច ប៉ុន្តែរួមបញ្ចូលគ្នាជាមួយប្រជាជនរាប់ពាន់នាក់ដែលកំពុងព្យាយាមចាកចេញពីប្រទេសពួកគេ នេះបានគូសបញ្ជាក់ពីបញ្ហាប្រឈមដែលក្រុមតាលីបង់កំពុងគ្រប់គ្រងប្រទេស។
មន្ត្រីអង្គការណាតូ និងតាលីបង់បាននិយាយថា ទីក្រុង Kabul មានភាពស្ងប់ស្ងាត់ប៉ុន្តែប្រជាជន ១២ នាក់ត្រូវបានសម្លាប់នៅក្នុង និងជុំវិញព្រលានយន្តហោះ។
យោធាអាមេរិកបាននិយាយថា ទាហានសហរដ្ឋអាមេរិកប្រមាណជាង ៥.២០០ នាក់ កំពុងការពារអាកាសយានដ្ឋានទីក្រុង Kabul ខណៈដែលច្រកទ្វារជាច្រើនត្រូវបានបើក និងយន្តហោះចម្បាំងអាមេរិកកំពុងហោះហើរជុំវិញទីក្រុងដើម្បីធានាសន្តិសុខសម្រាប់ប្រតិបត្តិការជម្លៀសអ្នកការទូត និងប្រជាជនស៊ីវិលរួមទាំងពលរដ្ឋអាហ្វហ្គានីស្ថានមួយចំនួន ៕
មតិយោបល់