(Reuters) - នៅថ្ងៃសុក្រនេះ កងទ័ពសហរដ្ឋអាមេរិកដែលកំពុងជួយជម្លៀសប្រជាជនអាហ្វហ្កានីស្ថានដែលព្យាយាមភៀសខ្លួនចេញពីការគ្រប់គ្រងរបស់ក្រុមតាលីបង់ បានត្រៀមខ្លួនទប់ទល់នឹងការវាយប្រហារដែលនឹងមានបន្ថែមទៀត បន្ទាប់ពីក្រុមរដ្ឋអ៊ីស្លាមបានវាយប្រហារទៅលើច្រកទ្វារមួយចំនួនដែលមានមនុស្សកុះករនៅអាកាសយានដ្ឋានទីក្រុង Kabul ដោយបានសម្លាប់ប្រជាជនស៊ីវិលជាច្រើននាក់ និងទាហានសហរដ្ឋអាមេរិកយ៉ាងហោចណាស់ចំនួន ១៣នាក់ផងដែរ។
តាមសម្តីរបស់មន្ត្រីសុខាភិបាលទីក្រុង Kabul បាននិយាយថា ប្រជាជនស៊ីវិលចំនួន ៦០នាក់ ត្រូវបានសម្លាប់នៅក្នុងការវាយប្រហារកាលពីថ្ងៃព្រហស្បតិ៍។ វីដេអូដែលថតដោយអ្នកកាសែតអាហ្វហ្គានីស្ថានបានបង្ហាញពីសាកសពរាប់សិបនាក់ ដែលរាយប៉ាយជុំវិញប្រឡាយមួយនៅក្បែរអាកាសយានដ្ឋាន ។ សាក្សីជាច្រើននាក់បាននិយាយថា យ៉ាងហោចណាស់មានការបំផ្ទុះគ្រាប់បែកពីរគ្រាប់ និងការបាញ់ប្រហារទៅលើតំបន់នោះ។
ក្រុមរដ្ឋអ៊ីស្លាម (ISIS) បាននិយាយថា អ្នកបំផ្ទុះគ្រាប់បែកអត្តឃាតរបស់ខ្លួនម្នាក់បានសម្រេចគោលដៅទៅលើ “អ្នកបកប្រែ និងអ្នកសហការជាមួយកងទ័ពអាមេរិក”។ ក្រុមមន្ត្រីសហរដ្ឋអាមេរិកក៏បានស្តីបន្ទោសទៅលើក្រុមនេះ និងប្តេជ្ញាថាសងសឹកវិញ។
ឧត្តមសេនីយ៍ Frank McKenzie មេបញ្ជាការនៃទីបញ្ជាការកណ្តាលកងទ័ពអាមេរិកបាននិយាយថា មេបញ្ជាការសហរដ្ឋអាមេរិកបានប្រុងប្រយត្ន័ចំពោះ ការវាយប្រហារដែលអាចមានបន្ថែមទៀតពីក្រុមរដ្ឋឥស្លាម រួមទាំងអាចមានគ្រាប់រ៉ុក្កែត ឬយានយន្តបង្កប់គ្រាប់បែកសំដៅទៅកាន់អាកាសយានដ្ឋាន។
លោកបាននិយាថា “យើងកំពុងធ្វើអ្វីគ្រប់យ៉ាង ដែលយើងអាចធ្វើបានដើម្បីត្រៀមខ្លួន”។
កងកម្លាំងសហរដ្ឋអាមេរិកកំពុងព្យាយាមបញ្ចប់ការដកខ្លួនទាំងស្រុងចេញពីប្រទេសអាហ្វហ្គានីស្ថាននៅត្រឹមថ្ងៃទី៣១ ខែសីហា ជាថ្ងៃកំណត់ដោយប្រធានាធិបតីលោក Joe Biden ដែលលោកបាននិយាយថា សហរដ្ឋអាមេរិកបានសម្រេចនូវហេតុផលត្រឹមត្រូវដំបូងរបស់ខ្លួនតាំងពីយូរណាស់មកហើយ ដោយចូលមកកាន់ប្រទេសនេះកាលពីឆ្នាំ២០០១ ដើម្បីកំចាត់ក្រុមសកម្មប្រយុទ្ធ al Qaeda និងការពារកុំឱ្យមានការវាយប្រហារដូចថ្ងៃ ទី១១ ខែកញ្ញាមកលើខ្លួនម្តងទៀត។
លោកប្រធានាធិបតី Biden បាននិយាយថា លោកបានបញ្ជាឲ្យមន្ទីរបញ្ចកោណរៀបចំផែនការវាយប្រហារលើក្រុម ISIS-K ដែលជាសម្ព័ន្ធរបស់រដ្ឋអ៊ីស្លាមដោយបានអះអាងថា នឹងទទួលខុសត្រូវ។
អំឡុងការអត្ថាធិប្បាយតាមកញ្ចក់ទូរទស្សន៍ពីសេតវិមាន លោកប្រធានាធិបតី Biden បាននិយាយថា “យើងនឹងមិនអភ័យទោស និងមិនភ្លេចនោះទេ។ យើងនឹងតាមប្រមាញ់អ្នក និងធ្វើឲ្យអ្នកសងអ្វីគ្រប់យ៉ាងមកវិញ”។
វីដេអូពីកន្លែងកើតហេតុបានបង្ហាញពីសាកសពជាច្រើនដែលស្ថិតនៅក្នុងប្រឡាយក្បែររបងអាកាសយានដ្ឋាននោះ ខណៈដែលសាកសពមួយចំនួនត្រូវបានស្រង់ចេញ និងដាក់គរលើគ្នា កំឡុងពេលដែលប្រជាជនស៊ីវិលជាច្រើននាក់ស្រែកយំ និងស្វែងរកមនុស្សជាទីស្រលាញ់របស់ពួកគេ ៕
មតិយោបល់