យោងតាមលិខិតប្រកាសមួយ របស់តំណាងរដ្ឋភិបាលអាមេរិក ព្រមទាំងប្រទេសសម្ព័ន្ធមិត្ត បានបញ្ជាក់ថា គេបានទទួលការធានាអះអាងយ៉ាងច្បាស់ ពីក្រុមតាលីបង់ថា គេនឹងអនុញ្ញាតឲ្យជនបរទេស ក៏ដូចជាប្រជាជនអាហ្វហ្កានីស្ថាន អាចធ្វើដំណើរចាកចេញពីអាហ្វហ្កានីស្ថាន ដោយសុវត្ថិភាព បើអ្នកនោះមានលិខិតស្នាមធ្វើដំណើរត្រឹមត្រូវ បន្ទាប់ពីថ្ងៃទី៣១សីហា។
លិខិតនោះបន្ថែមថា ប្រទេសហត្ថលេខី មានបារាំង អង់គ្លេស អេស្ប៉ាញ អូស្ត្រាលី និងជប៉ុន នឹងបន្តចេញទិដ្ឋាកា និងឯកសារចាំបាច់នានា ជូនដល់ប្រជាជនអាហ្វហ្កានីស្ថានណា ដែលចង់ធ្វើដំណើរចាកចេញពីប្រទេសនេះ។
ថ្លែងក្នុងបទសម្ភាសន៍មួយ ផ្តល់ឲ្យដល់ទូរទស្សន៍បារាំង TF1 នៅល្ងាចថ្ងៃអាទិត្យទី២៩សីហា លោកម៉ាក្រុងដែលកំពុងស្ថិតនៅប្រទេសអ៊ីរ៉ាក់ បានលើកឡើងថា បារាំងរួមជាមួយសម្ព័ន្ធមិត្ត កំពុងតែចរចាជាមួយក្រុមតាលីបង់ ដើម្បីធ្វើយ៉ាងណាឲ្យប្រជាជនអាហ្វហ្កានីស្ថាន អាចចាកចេញពីប្រទេសដោយសុវត្ថិភាព នៅក្រោយថ្ងៃទី៣១សីហា។ លោកម៉ាក្រុងបន្ថែមថា នៅមានប្រជាជនអាហ្វហ្កានីស្ថានជាច្រើនពាន់នាក់ទៀត ដែលត្រូវការការការពារ។
សូមបញ្ជាក់ថា ប្រតិបត្តិការជម្លៀសមនុស្សតាមយន្តហោះ របស់ប្រទេសធំៗ ដូចជាបារាំង អង់គ្លេស អាល្លឺម៉ង់ ជាដើម ត្រូវបានបិទបញ្ចប់ហើយ។ បច្ចុប្បន្នគឺនៅសល់តែកងទ័ពអាមេរិកតែប៉ុណ្ណោះ ដែលនៅបង្ហើយកិច្ចការនៅទីក្រុងកាប៊ុល មុននឹងចាកចេញទាំងស្រុងនៅថ្ងៃទី៣១សីហា។ ទោះយ៉ាងនេះក្តី ប្រជាជនអាហ្វហ្កានីស្ថានរាប់ពាន់នាក់ នៅតែពពាក់ពពូន ស្វែងរកវិធីដើម្បីអាចធ្វើដំណើរចាកចេញពីប្រទេស ដោយម្នាក់ខ្លាចក្រែងរបបផ្តាច់ការរបស់ក្រុមតាលីបង់។
ទន្ទឹមគ្នានេះ បញ្ហាសន្តិសុខកំពុងចោទឡើងជាខ្លាំង ដោយគេភ័យបារម្ភពីការវាយប្រហារភេរវកម្ម នៅតំបន់ក្បែរព្រលានយន្តហោះ។ យ៉ាងណាមិញ កាលពីរសៀសថ្ងៃអាទិត្យទី២៩សីហា កងទ័ពអាមេរិកបានបញ្ជាយានដ្រូន កម្ទេចរថយន្តមួយគ្រឿង ដែលផ្ទុកទៅដោយគ្រាប់ផ្ទុះ ខណ:រថយន្តនោះ កំពុងតែបើកសំដៅ ទៅកាន់ព្រលានយន្តហោះក្រុងកាប៊ុល។ ប្រតិបត្តិការនៅនាទីចុងក្រោយរបស់កងទ័ពអាមេរិកនេះ បានបញ្ចៀស អំពើភេរវកម្ម ដែលតាមការសង្ស័យ គឺជាគម្រោងរបស់ក្រុមជីហាតអង្គការរដ្ឋអ៊ីស្លាម៕
មតិយោបល់