កាលពីខែសីហា លោក Erywan Yusof អនុរដ្ឋមន្ត្រីក្រសួងការបរទេសប្រ៊ុយណេ ត្រូវបានសមាគមអាស៊ាន ចាត់តាំងឲ្យធ្វើជាតំណាង ដើម្បីរៀបចំ បើកផ្លូវចរចានយោបាយនៅភូមា។ ដោយទទួលរងនូវសំពាធខ្លាំងពីសហគមអន្តរជាតិ លោក Erywan Yusof បានថ្លែងអំពាវនាវ ឲ្យរបបសិកភូមា បើកផ្លូវអនុញ្ញាតឲ្យលោកចាប់ផ្តើមបេសកកម្មនេះ ឲ្យបានឆាប់ ហើយលោកសូមជួបគ្រប់ភាគីនយោបាយភូមាទាំងអស់ នៅពេលលោកធ្វើដំណើរទៅ។
ឆ្លើយតបនឹងការអំពាវនាវនេះ លោក Zaw Min Tun អ្នកនាំពាក្យរបបសិកភូមា បានបញ្ជាក់ ឲ្យដឹងនៅថ្ងៃទី១តុលាថា សម្រាប់ពេលនេះ វាប្រហែលជាមិនអាចទៅរួចទេ ដែលរបបសិកនឹងអនុញ្ញាត ឲ្យតំណាងអាស៊ាន ចូលទៅជួប ជាមួយភាគីនយោបាយភូមា ដែលកំពុងតែប្រឈមមុខនឹងការចោទប្រកាន់នៅតុលាការ។ ដោយមិនបានបញ្ជាក់ថា នឹងអនុញ្ញាតិឲ្យតំណាងអាស៊ាន ចូលទៅភូមានៅពេលណា អ្នកនាំពាក្យរបបសិករូបនេះ បានត្រឹមតែអះអាងថា គេនឹងបើកផ្លូវ ឲ្យតំណាងអាស៊ានជួបជាមួយភាគីទាំងអស់ នៅពេលសមស្របមួយ។
គួរបញ្ជាក់ថា លោកស្រីអ៊ុងសាន ស៊ូជី កំពុងរងនូវបទចោទប្រកាន់ ជាច្រើនសំណុំរឿង ដែលមេធាវីលោកស្រីអះអាងថា សុទ្ធតែជាការចោទប្រកាន់ បែបឆាកល្ខោន ដើម្បីបិទផ្លូវលោកស្រី មិនឲ្យធ្វើនយោបាយជារៀងរហូត។ មេធាវីលោកស្រី បានបញ្ជាក់ថា រហូតមកទល់ពេលនេះ លោកស្រី មិនទាន់បានទទួលលិខិតអញ្ជើញ ឬសំណូមពរសុំជួប ពីសំណាក់តំណាងអង្គទូតបរទេស តំណាងស្ថាប័នអន្តរជាតិណាមួយទេ។
ដោយឡែក លោក Mg Mg Soe អ្នកវិភាគនយោនបាយនៅភូមា បានលើកឡើងថា ការចរចានយោបាយភូមា ដែលគេមិនអាចជួបជាមួយលោកស្រី អ៊ុងសាន ស៊ូជី បាន គឺវាមិនជាការចរចានោះទេ។ លោកបន្ថែមថា របបសិកត្រូវតែបោះជំហានមួយកម្រិតទៀត បើកផ្លូវឲ្យគេជួបលោកស្រីអ៊ុងសាន ស៊ូជី ប្រសិនបើខ្លួនមានឆន្ទៈបើកការចរចាពិតប្រាកដ។
សូមរំលឹកថា ប្រមាណ៩ខែមកហើយ ដែលភូមាបានធ្លាក់លង់ជ្រៅក្នុងវិបត្តិយោបាយ ក្រោយការធ្វើរដ្ឋប្រហារ នៅថ្ងៃទី១កុម្ភៈ។ បាតុករប្រមាណ១១០០នាក់បានស្លាប់ និងជាង៨ពាន់ត្រូវរបបសិកចាប់ដាក់ឃុំ។ វិបត្តិនយោបាយ គួបផ្សំជាមួយវិបត្តិកូវីដ១៩ កំពុងធ្វើឲ្យប្រជាជនភូមា រស់នៅក្នុងការលំបាកបំផុត។ យ៉ាងណាមិញ កាលពីថ្ងៃទី៣០កញ្ញាម្សិលមិញ លោក Andrew Kirkwood អ្នកសម្របសម្រួលកិច្ចការមនុស្សធម៌របស់អង្គការសហប្រជាជាតិ ប្រចាំនៅភូមា បានថ្លែងថា គិតត្រឹមពេលនេះ មានប្រជាជនភូមាប្រមាណ៣លាននាក់ ដែលត្រូវការជំនួយមនុស្សធម៌ជាចាំបាច់។
កាលពីថ្ងៃទី២៩កញ្ញា លោកអគ្គលេខាធិការអង្គការសហប្រជាជាតិ បានអំពាវនាវថា កាលៈទេសៈនេះបន្ទាន់ណាស់ ដែលសហគមអន្តរជាតិ ត្រូវតែជួយជ្រោមជ្រែង បើកផ្លូវចរចានយោបាយនៅភូមា ដើម្បីឲ្យប្រទេសនេះ ស្តារស្ថិរភាព សន្តិសុខ លទ្ធិប្រជាធិបតេយ្យ និងពង្រឹងការគោរពសិទ្ធិមនុស្ស សិទ្ធិនយោបាយ របស់សហគមជនជាតិជាតិភាគតិចទាំងអស់ ដែលនៅភូមា៕
មតិយោបល់