ពលករ ចំនួន ២៩នាក់ ក្នុងនោះស្រី ១៣នាក់ បម្រុងឆ្លងដែនទៅធ្វើការនៅប្រទេសថៃ ត្រូវបានឃាត់ខ្លួនដោយកម្លាំង តំបន់ប្រតិបត្តិការសឹករង ដែលឃាត់បានក្នុងភូមិសាស្ត្រ ភូមិល្វា ឃុំបឹងបេង ស្រុកម៉ាឡៃ ខេត្តបន្ទាយមានជ័យ។

នៅយប់ថ្ងៃទី៧ ឈានចូល ថ្ងៃទី៨ ខែតុលា ឆ្នាំ២០២១ ឧត្តមសេនីយ៍ត្រី រិទ្ធ រ៉ម មេបញ្ជាការរង ទទួលទិសម៉ាឡៃ បានទទួលបទបញ្ជាពី ឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ បានដឹកនាំ កម្លាំង ១៥នាក់ ល្បាតសហការជាមួយ នគរបាលការពារព្រំដែនគោកលេខ៨១៥ ក៏បានពើបប្រទះពលករចំនួន ២៩នាក់ បម្រុងឆ្លងដែនចេញទៅប្រទេសថៃ នឹងត្រូវបានកម្លាំងល្បាតសហការណ៍ ឃាត់ខ្លួនបានតែម្តង។

ក្រោយឃាត់ខ្លួនបាន ពលករទាំង ២៩នាក់ ក៏បានធ្វើការសួរនាំ ដើម្បីរកឱ្យឃើញមេខ្យល់អ្នកនាំផ្លូវ។ ក្រោយធ្វើការអប់រំសួរនាំរួចមក កងកម្លាំងក៏បានបញ្ជួនពលករទាំងអស់នោះ ទៅធ្វើចត្តាឡីស័ក នៅមណ្ឌលចត្តាឡីស័ក ស្រុកម៉ាឡៃ។

សូមបញ្ជាក់ថា ចាប់តាំងពីកងកម្លាំង តំបន់ប្រតិបត្តិការសឹករងខេត្តបន្ទាយមានជ័យ ត្រូវបានបញ្ជូនទៅបំពេញប្រតិបត្តិការ សហការជាមួយកម្លាំងចម្រុះ ទប់ស្កាត់ពលករលួចឆ្លងដែន និងទប់ស្កាត់ការឆ្លងរីករាលដាល នៃជំងឺកូវីដ-១៩ បាន ឃាត់ខ្លួនពលករឆ្លងដែនបញ្ជូនទៅមណ្ឌលចត្តាឡីស័កជាបន្តបន្ទាប់ និងឃាត់ខ្លួនមេខ្យល់បានមួយចំនួន បញ្ជូនទៅសមត្ថកិច្ចជំនាញចាត់វិធានការតាមផ្លូវច្បាប់។

ដើម្បីពង្រឹងទប់ស្កាត់ការលួចឆ្លងដែនខុសច្បាប់ លោក ឧត្តមសេនីយ៍ ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ បានដាក់បទបញ្ជាយ៉ាងម៉ឺងម៉ាត់ ដល់កម្លាំងទាំងអស់ ត្រូវល្បាតជាប់ជាប្រចាំ ២៤ម៉ោងលើ២៤ម៉ោង ដោយប្តូរវេនគ្នា និងត្រូវមានកិច្ចសហការល្អ ជាមួយកងកម្លាំងចម្រុះ ដើម្បីធាននាបង្ក្រាបបានទាំងស្រុងនូវរាល់បទល្មើសឆ្លងដែនខុសច្បាប់ និងទប់ស្កាត់ការឆ្លងរាលដាល នៃជំងឺកូវីដ-១៩ ក្នុងភូមិសាស្រ្តទទួលខុសត្រូវរបស់តំបន់ប្រតិបត្តិការសឹកងរបន្ទាយមានជ័យ។

លោកមេបញ្ជាការតំបន់ប្រតិបត្តិការសឹករងបន្ទាយមានជ័យ បានសំណូមពរដល់បងប្អូនប្រជាពលរដ្ឋពិសេសពលករដែលបម្រុងឆ្លងដែរទៅធ្វើការនៅប្រទេសថៃ កុំឱ្យចាញ់បោកមេខ្យល់ ដែលតែងតែបញ្ចុះបញ្ចូល នាំពលករឆ្លងដែនដោយខុសច្បាប់ ដោយមិនគិតពីសុខសុវត្ថិភាព និងខាតបង់ប្រាក់ជាបន្តបន្ទាប់៕