កំណែទម្រង់យុទ្ធសាស្រ្ត កំពុងតែត្រូវបានចាប់ផ្តើមធ្វើហើយ។ យើងនឹងកាត់បន្ថយឲ្យបានច្រើនបំផុត នូវការបញ្ជូនកម្លាំងទៅធ្វើបេសកកម្ម ដែលស្ថិតនៅក្រៅតំបន់ភូមិសាស្ត្រ នៃសម្ព័ន្ធអាត្លង់ទិកខាងជើង។ នេះគឺជាប្រសាសន៍លើកឡើង របស់លោក Jens Stoltenberg អគ្គលេខាធិការអូតង់ នៅចំពោះមុខអ្នកកាសែត មុននឹងបើកការប្រជុំនៅទីស្នាក់ការក្នុងក្រុងព្រុចស៊ែល។ លោកបានបន្ថែមថា កម្មវត្ថុថ្មីគឺ ធ្វើយ៉ាងណារៀបកម្លាំងឲ្យល្អ ឲ្យចំគោលដៅ នឹងចំកាលៈទេសៈ។
កិច្ចប្រជុំរបស់អូតង់ នឹងមានការចូលរួម ពីរដ្ឋមន្ត្រីការពារជាតិនៃប្រទេសសមាជិកទាំងអស់ ដោយលោក Lloyd Austin រដ្ឋមន្ត្រីការពារជាតិអាមេរិក ក៏នឹងមានវត្តមានដែរ។ នៅថ្ងៃសុក្រ ការជជែកគ្នានឹងផ្តោតសំខាន់ទៅលើ តួនាទីរបស់សហភាពអឺរ៉ុប និងការចង់បានរបស់ប្រទេសខ្លះ ដូចជាបារាំងជាដើម ទាក់ទិននឹងការបង្កើតកម្លាំងពិសេសរបស់អឺរ៉ុប ដើម្បីធ្វើបេសកកម្មជំនួសអូតង់ នៅពេលណាដែលអូតង់ មិនអាចឬមិនចង់ធ្វើ។
លោកអគ្គលេខាធិការអូតង់ បានបញ្ជាក់ថា ចិន និងរុស្ស៊ីកំពុងពង្រឹង និងវិវឌ្ឍន៍សព្វាវុធទំនើបសំបើមណាស់ ជាក់ស្តែងមីស៊ីលល្បឿនលឿនជាងសំឡេង អាវុធអវកាស ព្រមទាំងសមត្ថភាពវាយប្រហារដោយប្រើប្រព័ន្ធបច្ចេកវិទ្យាជាដើម។ កត្តាទាំងអស់នេះ គឺបានជំរុញឲ្យអូតង់ ត្រូវតែពិចារណារៀបផែនការជាថ្មី ដើម្បីការពារទប់ទល់។
គួរបញ្ជាក់ថា កិច្ចប្រជុំអូតង់នៅពេលនេះ គឺជាឱកាស ឲ្យសមាជិកនិយាយលើកឡើង បូកសរុបពីបទពិសោធន៍ល្អ និងអាក្រក់ បន្ទាប់ពីការដកទ័ពយ៉ាងតក់ក្រហល់របស់អូតង់ និងអាមេរិក ចេញពីអាហ្វហ្កានីស្ថាន។ ជាការដកទ័ពដែលមតិខ្លះលើកឡើងថា ជាបរាជ័យដ៏ធំរបស់អូតង់ ទាំងដែលតាំងពីដំបូង អូតង់មិនគួរទៅចូលរួមក្នុងសង្គ្រាមនៅអាហ្វហ្កានីស្ថានសោះ ព្រោះវាមិនមែនជាដែនភូមិសាស្ត្ររបស់អូតង់។ លោករដ្ឋមន្ត្រីការពារជាតិអាមេរិក បានអះអាងថាភាគីអាមេរិក ត្រៀមខ្លួននិយាយក្នុងអង្គប្រជុំនេះ អំពីបទពិសោធន៍ ដែលបានទាញចេញពីបញ្ហាចលាចល អាណាធិបតេយ្យ ដែលបានកើតឡើង ក្នុងអំឡុងពេលដកទ័ពចេញពីអាហ្វហ្កានីស្ថាន។
ដោយឡែក មន្ត្រីទូតអឺរ៉ុបម្នាក់បានលើកឡើងថា អូតង់បរាជ័យ និងគ្មានការទទួលខុសត្រូវ ព្រោះប្រតិបត្តិការដកទ័ពជម្លៀសមនុស្សចេញពីកាប៊ុល បានធ្វើឡើង ដោយគ្មានពិគ្រោះយោបល់ ឬជូនដំណឹងដល់សមាជិកផ្សេងទៀត សូម្បីតែមួយម៉ាត់។ ជាងនេះទៀត ក្នុងពេលដែលអូតង់កំពុងដកទ័ព ទាំងលោកអគ្គលេខាធិការ និងអគ្គលេខាធិការរង សុទ្ធតែកំពុងតែសំរាកវិស្សមកាលលំហែរកាយ៕
មតិយោបល់